यही वैशाख ३० गते हुने स्थानीय तहको निर्वाचनका लागि देशका ७५३ वटै स्थानीय तहमा चुनावी सरगर्मी बढेको छ। कतै पाँचदलीय गठबन्धन छ, कतै दुई-तीन दलको गठबन्धन छ। तर, धेरैजसो स्थानीय तहमा सबै पार्टीहरू आ-आफ्नो हिसाबमा चुनावी अभियानमा छन्।
अहिले दल र उम्मेदवारहरू मत माग्दै जनताको घरदैलोमा छन्। आफ्ना योजना र संकल्पन सुनाइरहेका छन्। यिनैमध्येका एक हुन् कैलालीको लम्कीचुहा नगरपालिकामा नागरिक उन्मुक्ति पार्टीको तर्फबाट मेयरको उम्मेदवारी दिएका महेन्द्र उपाध्याय। इन्जिनियरको जागिर छाडेर राजनीतिमा होमिएका महेन्द्रसँग के छन् योजना? उनी किन राजनीतिमा आए र नागरिक उन्मुक्ति पार्टी नै किन रोजे? यही सेरोफेरोमा रहेर उनीसँग नेपाल लाइभले गरेको कुराकानी :
तपाईं इञ्जिनियर पेशा छाडेर राजनीतिमा किन आउनुभयो?
म राजनीतिमा आउनुको कारण स्थानीय तहमा भएको भ्रष्टाचारलाई देखेर, त्यसलाई रोक्नका लागि हो। मैले ‘मिञ्झारी’ पुस्तक लेख्दा थारु समुदायको गाउँगाउँमा पुगेको थिएँ। थारु गाउँमा नै बस्ने भएकाले त्यो पुस्तक लेख्दा म थप भिजें। यो किताब स्थानीय तहको निर्वाचनको नतिजापछि मात्र बजारमा आउँदैछ। मेरो जागिर चाहिँ म जुम्ला र कालिकोट हेर्ने गरी शहरी विकास तथा भवन डिजाइन कार्यालयमा थियो। म त्यहाँको इन्जिनियर थिएँ। सरकारी जागिर छाडेर आफ्नो नगरको इन्जिनियरिङ गर्न राजनीतिमा आएको छु।
यहाँका मुख्य दलका खोक्रा भाषण सुनेर म दिक्क भइसकेको थिएँ। यसको विकल्प के होला भनेर खोजीमा थिएँ। त्यही क्रममा राजनितिमा आइपुगेँ।
किन नागरिक उन्मुक्ति पार्टी नै रोज्नुभयो?
मैले थारुका मुद्दामाथि पहिलेदेखि नै कलम चलाउने गरेको थिएँ। मेरो आगामी पुस्तक पनि त्यही विषयमा छ। पहाडिया सोचले ग्रस्त समाजमा थारुमाथि विभेद भएको आँखाले देखेको छु। थरुहट थारुहरुको मुद्दाभन्दा पनि माओवादीको कमाइ खाने विषय बनेको छ। माओवादीका कारण थारुका मुद्दा ओझेलमा परेका हुन्। टीकापुर घटना २०७२ भदौमा भयो। जसकारण थारु आन्दोलनका व्यक्ति जेल परे। यी सबै कुरालाई नजिकबाट नियालिरहेको छु। त्यसैले रेशम चौधरीको पार्टीमा मैले अगाडि बढ्ने मञ्च पाएँ। त्यसैले यो पार्टी रोजेको हुँ।
तपाईंका अजेण्डा के–के छन्?
म एजेण्डा भन्दिनँ। मैले विकासको मोडेल अघि सारकोको छु। के–के अजेण्डा भनेर भन्दा पनि मैले कसरी विकास गर्ने प्रक्रिया अघि बढाएको छु भन्ने महत्त्वपूर्ण हो। जस्तो पहिलो रोजगार हो। देशमा बढ्दो बेरोजगारीलाई ध्यानमा राख्दै रोजगारी कसरी सिर्जना गर्ने भनेर प्रक्रिया अघि बढाएको छु। सुशासनका लागि रोजगार चाहिन्छ। रोजगारीका लागि आवश्यक रहेका उद्योगहरु यहाँ छैनन्।
नेपालले अहिले पनि ५० अर्बभन्दा माथिको कागज आयात भइरहेको छ। यो दुःखद विषय हो। कागजको उत्पादन गरेर प्लाष्टिकलाई पूर्णरुपमा बन्देज लगाउने मेरो सोच छ।
त्यसैगरी खेलकुदमा मेरो विशेष रुचि छ। म २५ लाख रुपैयाँ खेलमा लगानी गर्नेछु। पुराना खेलाडीको संयोजकत्वमा खेलकुद समिति बनाइनेछ। वडामा ३० जना खेलाडीको समूह बनाइनेछ। ती समूहलाई ५० हजारको खेल सामाग्री वितरण गरिनेछ। युवाहरुलाई खेलमा समावेश गरे लागु औषधको प्रयोगमा पनि कमि आउँछ।
यहाँका धेरै मानिस कृषिमा आश्रित छन्। तिनका लागि के गर्नुहुन्छ?
रोजगारी सिर्जनाका लागि भैँसी पाल्नेलाई नगरले नै भैँसी किनिदिनेछ। तर, गोबर भने नगरलाई निःशुल्क दिनुपर्नेछ। त्यसबाट गोबरग्यास उत्पादन गरेर ५० प्रतिशत एलपीजीको ग्यासको प्रयोग घटाइनेछ।
लम्कीचुहा नगरपालिकामा चार वटा खोला छन्। यहाँको उर्वर भूमिमा पूरै बाँस लगाउने, पाँच वर्षसम्म ठूलो भइसक्छ। नगरले नै बाँसको बजारीकरण गरिदिन्छ। कैलालीमा सात वटा नगर र एउटा उपमहानगर छ। यसरी रोजगारी सिर्जना गर्छु। इन्जिनियर भएको नाताले कन्क्रिटको विकल्पमा बाँस प्रयोगलाई महत्त्व दिन्छु।
कृषिमा जसको जोत, उसको पोत हुनेछ। बाँझो जग्गामा नगरले नै खेती गर्नेछ। जग्गाको मालिक बीउ छर्न र बाली उठाउन मात्र आउनेछन्। ‘स्मार्ट कृषि एप’को सुरुवात गरिनेछ। नगरले नै खेत जोत्ने मेसिन किनेर खेतीपाती गर्नेछ।
शिक्षा र स्वास्थ्यलाई सुलभ बनाउने योजना के छन्?
लम्कीचुहा नगर कृषिका लागि उर्वर भूमि हो। कक्षा ८ देखि नै कृषि पढाउने योजना छ। ८ कक्षा पढ्ने विद्यार्थीलाई १० वटा गमला वितरण गरिनेछ। विद्यार्थी कक्षा ९ मा पुगे २० वटा विरुवा वितरण गर्नुपर्नेछ। यसरी शिक्षालाई व्यवहारिक बनाइनेछ।
स्वास्थ्यमा सरकारले दिने ७२ प्रकारको औषधि निःशुल्क वितरण गरिनेछ। अहिले अस्पतालले सिटामोलबाहेक औषधि सित्तैमा उपलब्ध गराएको छैन। अब यसलाई अनिवार्य गरिनेछ। शिक्षा, स्वास्थ्य र खेलकुदमा ३ करोड लगानी गरिनेछ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
-1735478914.png)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
