वैशाख ३० गते हुने स्थानीय तहको निर्वाचनमा महानगरपालिका र उपमहानगरपालिकामा पाँच दलीय गठबन्धन भए पनि नगर र गाउँपालिकास्तरमा दलहरुले आफूअनुकूल गठबन्धन गरेका छन्। नेकपा एमालेले पनि सम्भव भएसम्मका स्थानमा अन्य दलसँग गठबन्धन गरेको छ। काठमाडौंको शंखरापुर नगरपालिकामा नेपाली कांग्रेस र नेकपा एकीकृत समाजवादीबीच तालमेल भएको छ। गठबन्धनबाट नगर प्रमुखका उम्मेदवार एलपी श्रेष्ठ छन्। उनले काठमाडौंका अन्य नगरमा जस्तै फोहोर व्यवस्थापन र सडक स्तरोन्नतिको विषयलाई आफ्नो प्रमुख एजेण्डा बनाएका छन् नै, ग्रामीण क्षेत्रको योजनाबद्ध विकासको परिकल्पना पनि गरेका छन्। श्रेष्ठसँग नेपाल लाइभले गरेको कुराकानीको सम्पादित अंश-
तपाईंलाई नै जनताले किन भोट दिने?
मलाई स्थानीय तहको समृद्धिका लागि मत दिनुस् भन्न चाहन्छु। मैले यो क्षेत्रलाई राम्रोसँग बुझेको छु। शंखरापुर क्षेत्रको यातायात तथा शिक्षाको विकास, यहाँको स्वास्थ्य अवस्था सुधार र स्थानीयको हकहितको संरक्षण गर्न मलाई स्थानीयले भोट दिएर जिताउनुहुन्छ भन्ने विश्वास छ।
यो क्षेत्र काठमाडौंभित्र नै पर्ने भए पनि अन्य क्षेत्रभन्दा पिछडिएको छ। यसको विकास गरेर अन्य पालिकासरह बनाउन पनि मलाई भोट दिन आग्रह गर्छु। हामी अहिले नेपाली कांग्रेससँग गठबन्धन गरेर चुनावी मैदानमा आएका छौं। यसले पनि हामीलाई आगामी दिनमा थप काम गर्न उत्साह थप्ने आशा छ।
फोहोर व्यवस्थापन र सडक बिस्तारमा तपाईंका योजना के छन्?
हामी सम्बन्धित निकायसँग योजनाबद्ध रुपमा मिलेर फोहोर व्यवस्थापनमा अघि बढ्नेछौं। यसका लागि हामीले प्रस्ताव अगाडि बढाएका छौं। निजी क्षेत्रसँगको सहकार्यका लागि कुरा गरिरहेको छु। त्यसबारे छलफल भइरहेको छ।
यस्तै, साँखु–चाबहिल सडकको स्तरोन्नतिको विषयमा पनि छलफल भइरहेको छ। यसमा केही विवाद देखिएका छन्। सम्बन्धित निकायसँग बसेर मुआब्जाको विषयमा देखिएका समस्या समाधान गर्न पनि छलफल गरिरहेका छौं। यो समस्या चाँडै समाधान हुने देखिएको छ।
यसैगरी ग्रामीण क्षेत्रको विकासका लागि योजनाबद्ध रुपले हामीले सडक निर्माणकोे काम अगाडि बढाउने छौं। अहिले सडकका नाममा जुन प्रकारको प्राकृतिक दोहनको काम भइरहेको छ। त्यसलाई रोक्ने मेरो योजना छ। यस्तो कार्यलाई व्यवस्थित गरेर काम अगाडि बढाइनेछ। हामीले सडकको स्तरोन्नतिका अजेन्डा पनि राखेका छौं।
नगर व्यवस्थित बनाउने र रोजगारी सिर्जना गर्ने योजना के–के छन्?
यस पालिकालाई बिउबिजन उत्पादन गर्ने केन्द्रको रुपमा स्थापित गराउने मेरा मुख्य उद्देश्य हो। विशेषगरी यो काठमाडौंभित्रको ग्रामीण क्षेत्र हो। यहाँ कृषिजन्य उत्पादन राम्रो गर्न सकिन्छ। त्यसका लागि जग्गा पनि छ। यसो भएका कारण रोजगारी सिर्जना गर्न यहाँका स्थानीयलाई कृषि पेसामा आबद्ध गराउने मेरो मुख्य योजना छ।
यहाँ कृषि उत्पादनको बजारीकरण पनि राम्रो छ। यो क्षेत्र मौसमको हिसाबले पनि तीन वटा मौसम हुने वातावरण भएको क्षेत्र हो। तराई, पहाडी र उपत्यकाको मौसम यो क्षेत्रमा हुन्छ। यस्तो मौसममा विशेषगरी आलु खेतिमा विशेष ध्यान दिने मेरो योजना छ।
तपाईंले प्रतिस्पर्धी उम्मेदवारलाई कसरी हेर्नु भएको छ?
अहिले हाम्रो प्रतिस्पर्धीको रुपमा एमाले, माओवादी केन्द्र र राप्रपाका साथीहरु हुनुहुन्छ। तर, यो एकीकृत समाजवादीको राम्रो क्षेत्र रहेकाले अन्य पार्टीको तुलनामा हाम्रो पार्टीका उम्मेदवार बलियो रहेको मैले मानेको छु ।
यो क्षेत्र माधव नेपालको क्षेत्र पनि भएका कारण उहाँले यहाँको विकासका लागि महत्वपूर्ण योगदान पनि दिनु भएको छ। कांग्रेससँगको गठबन्धनले हामीलाई अझ मजबुत बनाएको छ।
शिक्षाको गुणस्तर सुधारका लागि कसरी काम गर्नुहुन्छ ?
ग्रामीण क्षेत्र भएकाले पनि टाढाका विद्यार्थीहरु यो क्षेत्रमा आउन कठिन अवस्था छ। यसलाई सहज बनाउने हाम्रो योजना छ। काठमाडौंका अन्य क्षेत्रको तुलनामा यस क्षेत्रमा ७० प्रतिशतमात्र विद्यार्थी बाहिरबाट आउने गरेका छन्। यसलाई बढाउने पनि योजना । यसमा हामीले यातायातको सुविधामा पनि जोड दिनेछौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
