आगामी वैशाख ३० मा हुन स्थानीय तहको निर्वाचनमा अधिकांश पालिकामा कुनै न कुनै किसिमको तालमेल भएका छन्। सत्ता गठबन्धन आबद्ध दलहरुले केन्द्रीय रूपमै घोषित तालमेल गरेका छन्। अर्कोतिर, नेकपा एमालेले पनि सम्भव भएका पालिकामा तालमेल गरेको छ। त्यसैले यसपटक अधिकांश स्थानमा दुई पक्षीय प्रतिस्पर्धा हुने निश्चितप्रायः छ।
नेपाल लाइभले प्रतिस्पर्धामा उत्रिएका विभिन्न उम्मेदवारहरुसँग संवाद गरिरहेको छ। ती उम्मेदवारको मौलिक अजेन्डादेखि प्रतिस्पर्धी उम्मेदवारप्रतिको मूल्यांकनबारे जिज्ञासा राखेकाे छ। त्यसैक्रममा काठमाडौंको कीर्तिपुर नगरपालिकाको प्रमुखमा नेकपा एमालेबाट उम्मेदवारी दिएका केशरत्न बज्राचार्यसँग बीपी अनमाेलले गरेको कुराकानी प्रस्तुत छ:
कीर्तिपुर नगरपालिकाका मतदाताले तपाईंलाई किन भोट दिने?
हामीले कीर्तिपुर नगरको समग्र विकासका योजना अगाडि बढाएका छौं। अध्यक्ष केपी शर्मा ओलीले ‘समृद्ध नेपाल, सुखी नेपाली’ अभियान सञ्चालन गर्नुभएको छ। त्यो अभियानलाई अघि बढाउँदै कीर्तिपुरलाई समृद्ध बनाउन पूर्वाधार तयार गर्दै अगाडि बढेको अवस्था छ। हिजोको स्थानीय सरकार पनि एमालेले नै नेतृत्व गरेको थियो। कीर्तिपुरलाई ऐतिहासिक, धार्मिक, पुरातात्विक र पर्यटकीय दृष्टिकोणले विकास गर्नुपर्छ भनेर हामीले धेरै पूर्वाधार तयार गरिसकेका छौं। अब तिनै पूर्वाधारमा टेकेर अगाडि बढ्नुपर्ने अवस्था छ। हाम्रो नेतृत्वमा नै त्यो पुरा हुनेछ।
स्थानीय सरकारले स्वामित्व र अभिभावकत्व ग्रहण गर्दै शिक्षामा आम कीर्तिपुरवासीको पहुँच पुगोस् भन्ने हिसाबमा सरकारी र सामुदायिक विद्यालयलाई व्यवस्थापन गरेर अगाडि बढाउने सोचेका छौं। केन्द्र सरकारले पनि कीर्तिपुरमा दुई वटा विद्यालय नमुना विद्यालयको रुपमा लिएको छ। हामीले अरु विद्यालयलाई पनि नमुना बनाएर एउटा प्राविधिक विद्यालयको अवधारणासहित अगाडि बढ्ने विषयमा विज्ञ र शिक्षाविदसँग सल्लाह गरेर काम गर्ने सोचेका छौं। यो सबै एमालेका उम्मेदवारबाट मात्रै सम्भव छ भन्ने आम कीर्तिपुरवासीले बुझेका छन्।
प्राविधिक शिक्षालाई प्रभावकारी बनाउने हिसाबले योजना अघि बढाउने छौं। खेलकुद क्षेत्रको हकमा पनि समृद्ध बनाउन योजना बनाएका छौं। खेलकुदकै क्षेत्रमै स्नातक तहसम्मको अध्ययन गराउने हिसाबले पाठ्यक्रम नै तयार गरेर त्रिविसँग सहकार्य गरेर अघि बढिसकेको अवस्था छ।
रोजगारको सम्बन्धमा पनि विभिन्न सीपमा आधार भएका व्यक्तित्वहरु हुनुहुन्छ। उहाँहरुलाई संगठित बनाएर कीर्तिपुरमा औद्योगिक विकास गर्ने र रोजगार सिर्जना गर्न सक्ने गरी खाका तयार गरेका छौं। नागरिकका आधारभूत आवश्यकतादेखि लोककल्याणकारी अभियानसम्मका सामाजिक क्षेत्रमा सुधार ल्याउन अगाडि बढ्ने परिपाटीको विकास भएको छ। यस अर्थमा नेकपा एमालेलाई नै कीर्तिपुरवासीले विश्वास गरेर मतदान गर्ने छन्।
शैक्षिक सुधारको त कुरा गर्नुभयो। तर, सामुदायिक र निजी विद्यालयबीचको अन्तर धेरै छ। सामुदायिक विद्यालयको गुणस्तरमा सुधार हुन सकेको छैन। तपाईंले कसरी काम गर्ने योजना बनाउनुभएको छ?
राज्यले सामुदायिक विद्यालयमा धेरै लगानी गरेको छ। तर, नतिजामा हामी सन्तुष्ट हुन सक्ने अवस्था अझै बनिसकेको छैन।
एउटा कालखण्डमा सामुदायिक विद्यालय व्यवस्थापन समितिको सदस्य रुपमा पनि काम गरेको अनुभव छ। सामुदायिक विद्यालयमा राज्यको लगानीअनुसार क्षमता विकास र मानवश्रोत साधनको विकास गर्न प्रविधिमैत्री बनाउनका लागि तालिम, गोष्ठीलगायतका कामसहित अघि बढ्न सक्छौं। कीर्तिपुर एउटा शैक्षिक केन्द्र पनि हो। यहाँ रहेका शिक्षाविद्हरुसँग बसेर एउटा अवधारणा तयार पारेर जानुपर्छ। सामुदायिक विद्यालयको भौतिक पूर्वाधार र पठनपाठन व्यवस्थित बनाउनुपर्छ।
सरकारी विद्यालयको पठनपाठन सुधार गर्नुपर्छ। निजी र सरकारी विद्यालयबीचको खाडल पुर्न निजी विद्यालयलाई पनि हामीले दुश्मन र फरक विचारका रुपमा हेर्नुहुँदैन। निजीलाई पनि स्थानीय शिक्षा समितिभित्र ल्याएर स्थानीय सरकारले ती विद्यालयहरुलाई के–कस्तो सुविधा दिन सकिन्छ भन्नेबारे छलफल गर्न सकिन्छ।
उहाँहरु आफैँ एउटा शिक्षा नियमावली विधिमा आउनका लागि उत्साहित हुनुहुन्छ। त्यो वातावरण हामीले बनाइदिनुपर्छ। निजी विद्यालयको व्यवस्थापनका लागि हामी नेतृत्व अलि उदार भइदिनुपर्छ। खुल्ला हृदयले हेरिदियो भने उहाँहरु पनि आउनुहुन्छ। मैले धेरै समस्या नै देखेको छैन। स्थानीय सरकारले स्वस्फूर्त रुपमा निष्पक्ष रुपमा अभिभावकत्व ग्रहण मात्रै गरिदिए पनि उहाँहरु स्थानीय सरकारलाई तयार गर्न तयार हुनुहुन्छ।
फोहोर व्यवस्थापनदेखि साँघुरा सडकलाई विस्तार गर्दै कीर्तिपुर नगरलाई व्यवस्थित बनाउने तपाईंका योजना के छन्?
नयाँ वस्ती विकासमा त हामीले एउटा मापदण्ड नै बनाएर अगाडि बढेका छौं। त्यसको समस्या नै भएन। तर अन्य वस्तीमा बाटो विस्तारका कुराहरु अप्ठ्यारा छन्। हिजो म सामाजिक अभियानमा लाग्दाखेरि विभिन्न सामाजिक द्वन्द्व व्यवस्थापनमा पनि मैले सहज तरिकाले भूमिका खेलेको हुँदा मूल सडकका कीर्तिपुरका बासिन्दाको एउटा विश्वास मप्रति छ। यहाँका सडक तथो ट्राफिक व्यवस्थापन गर्ने योजना हामीसँग छन्। म स्काउटमा संलग्न भएर लामो समयदेखि काम गरेकाले पनि सडक र ट्राफिक व्यवस्थापनका विषयमा अलिकति जानकार छु।
हामीले सडकलाई विस्तार गर्ने क्रममा नयाँ घरहरु बनाउँदा सडकको मापदण्ड अनुसार त छँदैछ। वैकल्पिक सडकको व्यवस्था गर्नुपर्छ। सडक तथा पैदलयात्रीको सुरक्षा, सडक अपांगमैत्री बनाउनेलगायतका विषयमा ध्यान दिएर काम गर्नुपर्छ भन्ने मेरो योजना छ। सबै विषयमा राजनीतिक नेृतत्वसँग ज्ञान नहुन सक्छ। तर, नेतृत्वसँग इच्छाशक्ति हुनुपर्छ भन्ने मान्यता राख्छु। विषयगत विज्ञहरुलाई खुला रुपमा काम गर्न दियौं भने उहाँहरुले एउटा योजना बनाउनुहुन्छ। र, हामीले त्यसलाई दृढताका साथ पालना गर्छौं।
यस्तै, हामीले घरदेखि नै फोहोर व्यवस्थापनको कार्य अगाडि बढाउने सोचेका छौं। कुहिने फोहोरको व्यवस्थापन घरमै गरी त्यसबाट मल उत्पादन गर्न सकियोस् भनेर योजना बनाएका छौं। हामीले केन्द्रीकृत कृषि विकास गर्दै अनुदानमार्फत् छरिएर रहेका किसानका लागि कृषि अभियान चलाउने सोचेका छौं।
जनताले निःशुल्क सिफारिस लिन सक्ने वातावरण बनाउन सकियोस् भन्नेतर्फ अघि बढेका छौं। जनतालाई कर नबढाउने तर करको दायरा बढाउनेतर्फ सोच्नुपर्छ। र, केही करमा मिनाह गर्न सकिन्छ। पूर्ण अपांगता भएका व्यक्तिहरुको हकमा सेवा सुविधालाई निःशुल्क गर्ने योजना पनि बनाएका छौं। यस्तो अभ्यास निवर्तमान मेयरको नेतृत्वमा भएको थियो।
कीर्तिपुरमा कांग्रेस–जसपा गठबन्धन बनेको छ। माओवादी केन्द्र र समाजवादी एक्लाएक्लै चुनावमा होमिएका छन्। एमालेको मुख्य प्रतिस्पर्धी को हो र तपाई आफ्नो प्रतिस्पर्धीको विषयमा के भन्नुहुन्छ?
प्रतिस्पर्धा भनेको कांग्रेस–जसपा गठबन्धनसँग नै हुन्छ। यो गठबन्धनका कारणले हामी उत्साहित पनि छौं। हामीलाई त्यसले थप मनोबल बढाएको छ। त्यही भएर हामी आत्तिएका छैनौं। अहिलेको राजनीतिक तरलतामा जुन गठबन्धन बनेको छ, त्यसबाट कीर्तिपुरवासीहरु अचम्मित भएका छन्। हामी जनताको साथमा उत्साहित भएर चुनावमा होमिएका छौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
