यही वैशाख ३० गते हुने स्थानीय तह निर्वाचनका लागि राजनीतिक दल र उम्मेदवारहरू प्रचार–प्रसारमा व्यस्त छन्। उनीहरूले आफ्ना अजेण्डा बुझाउनेदेखि आफूलाई किन मत दिने भनी जनतालाई बताइरहेका छन्।
मतदान हुनुभन्दा ४८ घण्टाअघि मौन अवधि लागू हुने भएकाले त्यसअघि नै सबै वडा र टोलसम्म पुग्ने उम्मेदवारको प्रयास जारी छ। काठमाडौं जिल्लाको शंखरापुर नगरपालिका पनि उम्मेदवारहरूले घरदैलो अभियान तीव्र पारेका छन्। यो नगरमा नेपाली कांग्रेस र एकीकृत समाजवादीले तालमेल गरेका छन् भने माओवादी केन्द्र र नेकपा एमाले एक्लाएक्लै प्रतिस्पर्धामा छन्। माओवादी केन्द्रबाट मेयरका उम्मेदवार बनेका मधु केसी (निरज)सँग नेपाल लाइभले गरेको कुराकानी :
तपाईंलाई जनताले किन भोट दिने?
सर्वप्रथम त शंखरापुर नगरपालिका राज्य पुनर्संरचनाको समयमा विलय गराउने प्रयास भएको थियो। त्यसलाई बचाउन स्वतन्त्र अस्तित्व कायम गराउन लड्ने पार्टी माओवादी केन्द्र हो। त्यसैले अब यसलाई अझ विकास र समृद्ध नगरपालिका बनाउनका लागि मेरो उम्मेदवारी हो। यहाँका जनताहरू मैले उम्मेदवारी दर्ता गराएपछि निकै उत्साहित भएको पाएको छु। अहिले पनि म घरदैलोमा व्यस्त छु। जनताको घर आँगनमा पुगिरहँदा मलाई यहाँका जनताहरूले धेरै सकारात्मक रुपमा हौसला दिनु भएको छ।
जनताहरूले हामीले खोजेको उम्मेदवार भनेर भन्नु भएको छ। मधु केसी ‘निरज’लाई हामीले खोजेको हो र यसपटक मत दिएर नगरको जिम्मेवारी दिन्छौं भन्नुभएको छ। हाम्रो अजेण्डा भनेको शंखरापुर नगरपालिकालाई अलग अस्तित्व कायम गरेपछि अब यसलाई काठमाडौं जिल्लाकै नमूना नगरपालिका बनाउने हो। यो क्षेत्र धेरै गाउँ र थोरै सहर भएको क्षेत्र हो। काठमाडौं जिल्ला भए पनि यहाँ धेरै विकासका काम गर्नुपर्ने छ। त्यसका लागि इमान्दार नेताहरूको आवश्यकता छ र त्यो भनेको मै हुँ भनेर जनतासमक्ष वाचा गरेको छु। जनताले पनि घरदैलोको क्रममा मलाई यही वाचा गर्नु भएको छ।
यहाँको पूर्वाधार विकास र कृषि विकासका लागि हाम्रो जित आवश्यक छ। जसको नीति उसको नेतृत्व भन्ने माओवादी केन्द्रको मूल नीतिअन्तर्गत हामी प्रचारमा लागेका छौं। यहाँ नीति बनाउने काम माओवादी केन्द्रले गरेकाले अब नेतृत्व पनि पाउने छ। जनताले विश्वास गरेर जिम्मेवारी दिने छन्। नगरको समग्र विकास र उन्नति अनि कृषिको उन्नति र यो नगरलाई व्यवस्थित सहर बनाउन माओवादी केन्द्रले जित हात पार्न जरुरी छ।
फोहोर व्यवस्थापन र सडक विस्तारमा तपाईंका योजना के छन्?
फोहोर व्यवस्थापन अबको चुनौती हो। यसका लागि हामी अहिलेदेखि नै योजना बनाएर काम गर्छौं। हाम्रो नगरमा अहिले त्यति धेरै विकराल समस्याको रुपमा भइसकेको छैन। तर, हामी यसलाई आगामी १० वर्षको भविष्य परिकल्पना गरेर योजना बनाउने छौं। हामीले अहिलेदेखि नै कुहिने र नकुहिने तथा प्रयोग हुने र नहुने अलग गराउने अभ्यासको थालनी गराउने योजना अघि सारेका छौं। त्यस्तै गाउँ क्षेत्रमा कुहिने फोहोरबाट मल बनाउने, नकुहिने फोहोरहरूलाई आफ्नै नगरभित्र कसरी व्यवस्थापन गर्ने भन्ने हाम्रो अलग्गै योजना छ।
त्यस्तै, सडक हाम्रो ठूलो समस्या हो। अहिले पनि नगरका सबै टोल र बस्तीमा सडक पुगेको छैन। अझै भनौं राम्रो सडक पुग्न सकेको छैन। हामी नगरको नेतृत्वमा पुगेपछि ग्रामिण सडकहरूलाई सँधैभरि मोटर हिँड्न सक्ने बनाउने छौं। प्रत्येक वडामा नगरस्तरीय सडकहरू विस्तार गर्ने मेरो योजनामा उल्लेख छ। मुख्य सडकहरूलाई केन्द्रीय योजनासँग समन्वय गरेर निर्माण अघि बढाउने छौं। सडक सञ्जालले सबै क्षेत्रमा जोड्न सकेमा यहाँ उत्पादन हुने तरकारी र अन्य उत्पादनले बजार पाउनेछन्। जसले गर्दा नगरको आयस्तर वृद्धि हुने छ। त्यस्तै, नगरले केही क्षेत्रमा तरकारी पकेट क्षेत्र पनि बनाउने छ। सामूहिक र व्यक्तिगत रुपमा व्यावसायिक खेती विस्तार गर्न नगरले अनुदान सहयोग उपलव्ध गराउने छ।
नगरलाई व्यवस्थित बनाउन र रोजगारी सिर्जना गर्न के गर्नुहुन्छ?
अहिले रोजगारी सबैतिरको मुख्य समस्या भइरहेको छ। शिक्षित युवाहरूको जमात बढ्दै गएको छ। उनीहरूलाई रोजगारी दिन जरुरी छ। नगरले यस क्षेत्रमा अब लगानी वृद्धि गर्नुपर्ने र केही योजनाहरू बनाउनुपर्ने छ। यसका लागि मैले नगरको नेतृत्व पाएमा दीर्घकालीन र अल्पकालीन योजना बनाएर काम गर्छु। नगरले कम्तिमा उत्पादनमूलक क्षेत्रमा लागेका कृषकहरूलाई प्रोत्साहन दिन अनुदानदेखि उनीहरूलाई बजार विस्तारका लागि नगरले सहयोग गर्ने छ।
हामीले तीनवटा ‘पी’को अवधारणा अघि सारेका छौं। पब्लिक–प्राइभेट पार्टनरसिपमा रोजगारी सिर्जनाका लागि हामीले काम गर्छौं। यसका निजी र नगरपालिका मिलेर रोजगारी सिर्जनाका लागि काम गर्ने छौं। रोजगारी यही रुपमा दिलाउँदा नगरभित्र रोजगारी सिर्जना र आत्मनिर्भर हुने अवस्था आउँछ। रोजगारीका लागि बाहिर जानुपर्ने अवस्था पनि अत्य गर्ने हाम्रो योजना छ।
तपाईंले प्रतिस्पर्धी उम्मेदवारलाई कसरी हेर्नु भएको छ?
यहाँ मुख्य रुपमा तीन पक्षीय प्रतिस्पर्धा रहेको छ। नेकपा एमाले र माओवादी केन्द्र एक्लै प्रतिस्पर्धामा छन् भने नेपाली कांग्रेस र समाजवादीले तालमेल गरेका छन्। यसरी हेर्दा सबै पक्षसँग प्रतिस्पर्धा देखिन्छ। तर, मैदानमा सबै भए पनि मेरो जित निश्चित देखिन्छ। प्रतिस्पर्धी रुपमा अरु देखिएको भए पनि यहाँका जनताहरूले नगर हाँक्नका लागि तपाईंको आवश्यकता छ भन्नु भएको छ।
तपाईंले यहाँको शिक्षाको गुणस्तर सुधारका लागि कसरी काम गर्ने योजना बनाउनुभएको छ?
अबको विकास भनेको शिक्षा हो। शिक्षामा नगरले लगानी बढाउनुपर्छ। शिक्षा र स्वास्थ्यमा नगरले विकास गर्नुपर्ने आवश्यकता छ। शिक्षाका लागि ग्रामिण विद्यालयको स्तरोन्नति गर्नुपर्ने आवश्यकता छ। त्यस्तै, सहरकेन्द्रित रहेका विद्यालयहरूलाई पनि गाउँ क्षेत्रमा लैजानुपर्ने भएकाले यसका लागि मैले नगरबाट काम गर्ने छु। नगरले आफ्नै पाठ्यक्रम पनि बनाएर लागू गर्ने छ। त्यस्तै, १२ कक्षासम्म शिक्षा निःशुल्क हुनुपर्ने मेरो घोषणापत्रमा उल्लेख छ। म नगरको जिम्मेवारीमा आएमा यसमा काम गर्ने छु।
त्यस्तै, अबको शिक्षा भनेको किताब मात्र होइन। व्यावहारिक र उत्पादनमुलक हुन जरुरी छ। त्यसका लागि नगरले प्राविधिक विद्यालय निर्माणदेखि लगानी गर्न जरुरी छ। यो क्षेत्रमा म लगानी गर्ने छु। हाम्रो क्षेत्रको अर्को समस्या भनेको स्वास्थ्य पनि हो। स्वास्थ्यमा लगानी बढाउन जरुरी छ। नगरको आफ्नै अस्पताल नभएकाले नगर अस्पताल पनि निर्माण गर्दै यहाँका नागरिकहरूलाई गुणस्तरीय स्वास्थ्य सेवा दिनुपर्ने छ। नगर अस्पताल बनाएर जनताको उपचारका लागि पहलकदमी लिने भन्ने मेरो घोषणापत्रमा उल्लेख छ। सोही अनुसार काम गर्नेछु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
