आगामी वैशाख ३० मा हुने स्थानीय तहको निर्वाचनमा अधिकांश पालिकामा कुनै न कुनै किसिमको तालमेल भएका छन्। सत्ता गठबन्धनआबद्ध दलहरुले केन्द्रीय रूपमै घोषित तालमेल गरेका छन्। अर्कोतिर, नेकपा एमालेले पनि सम्भव भएका पालिकामा तालमेल गरेको छ। त्यसैले यसपटकको निर्वाचनमा अधिकांश स्थानमा दुई पक्षीय प्रतिस्पर्धा हुने निश्चितप्रायः छ।
नेपाल लाइभले प्रतिस्पर्धामा उत्रिएका विभिन्न उम्मेदवारहरुसँग संवाद गरिरहेको छ। ती उम्मेदवारको मौलिक अजेन्डादेखि प्रतिस्पर्धी उम्मेदवारप्रतिको मूल्यांकनबारे पनि जिज्ञासा राखेका छौँ। यसपटक काठमाडौंको गोकर्णेश्वर नगरपालिका प्रमुखमा नेपाली कांग्रेसबाट उम्मेदवारी दिएका दीपक रिसालसँग गरेको कुराकानी प्रस्तुत गरेका छौँ :
तपाईंलाई जनताले किन भोट दिने?
म पहिला पनि नगरपालिकाको प्रमुख सल्लाहकार भएर काम गरेको अनुभव छ। मेयर सन्तोष चालिसेको प्रमुख सल्लाहकार हुँदा मैले काम गर्ने तरिका सिकेँ। जनतासँग धेरै परिचित भएँ। हामीले फोहोरमैला व्यवस्थापन, खानेपानीसम्मको काम गर्यौँ। विकासका पूर्वाधार निर्माण पनि सुरु गरेका छौं। नगरभित्र थालनी भएको विकासको निरन्तरताका लागि पनि मेरो जित आवश्यक छ।
जोरपाटी–सुन्दरीजल बाटो विस्तारको काम सक्नेदेखि नगरले अघि सारेका अन्य आयोजना पूरा गर्न मेरो नेतृत्व यहाँका जनताले आवश्यक भएको महसुस गरेका छन्। यो क्षेत्रको पर्यटकीयदेखि अन्य विकासका लागि पनि मैले केही योजना बनाएको छु। यो योजना अबको पाँच वर्षमा कार्यान्वयनमा लैजाने हो, त्यसपछि गोकर्णेश्वर स्व:निर्भर हुन्छ। सुन्दरीजलदेखि शिवपुरीसम्मको पर्यटकीय क्षेत्रदेखि तारेभीरसम्मको विकासका लागि मेरो उम्मेदवारी हो।
त्यस्तै धार्मिक पर्यटकका लागि गोकर्णेश्वर मन्दिर, उत्तरवाहिनी, सुन्दरीजलको बीपी संग्रहालयलाई पर्यटकीय रुपमा विकास गर्ने योजना अघि सारेको छु। हामीले १६ करोड रुपैयाँमा पुनःनिर्माण गरेका छौं। यो स्थान अब पशुपतिपछिको धार्मिकस्थल हुने छ।
फोहोर व्यवस्थापन र सडक विस्तारमा तपाईंको योजना के?
गोकर्णेश्वर काठमाडौंकै पहिलो नगर हो, जसले आफ्नो फोहोर आफैँ व्यवस्थापन गर्छ। हामी सिसडोलमात्र होइन अन्यत्र कतै फोहोर पठाउँदैनौं। हामीले जापान पुगेर फोहोर व्यवस्थापनको मोडेल हेरेर मेसिन ल्याएका छौं। नगरको फोहोर यहीभित्र व्यवस्थापन गरेका छौं। जल्ने फोहोर जलाउने, पुनः प्रयोग हुने र मल बनाउनेजस्ता कार्यक्रम चलाइरहेका छौं। अबका दिनमा पनि मैले फोहोर व्यवस्थापनका लागि काम गर्ने छु। हामी नगरभित्रको फोहोर अब घर–घरमै प्रयोगमा ल्याउनेदेखि व्यवस्थापनसम्मका काम गर्छौं। कौसी खेतीदेखि अन्यमा त्यसको प्रयोग गर्न नगरले नै सहयोग गर्छ। कौसी खेती प्रतिस्पर्धादेखि गृहिणीहरुलाई फोहोर कसरी कम गर्नेसम्मका तालिम हामी दिन्छौं।
नगरलाई व्यवस्थित बनाउने र रोजगारी सिर्जना गर्ने योजना के हो?
गोकर्णेश्वर गाउँ र नगर मिसिएर बनेको छ। बौद्धदेखि बागद्वारसम्म फैलिएको यो क्षेत्रमा दुवैलाई व्यवस्थापन गर्नुपर्ने छ। सुन्दरीजलदेखि माथिका गाउँहरुमा शिक्षादेखि स्वास्थ्यको पहुँच वृद्धि गर्नुपर्ने छ भने सहरमा स्वास्थ्यको चाप बढ्दै गएकाले गुणस्तरीय अस्पतालहरु निर्माण गर्नुपर्ने छ। यसका लागि नगरले गुरुयोजना र पञ्चवर्षीय रणनीति बनाएर काम गर्छ। म व्यवस्थित योजनामा काम गर्ने मानिस हुँ। यसले रोजगारी पनि दिन्छ।
अब यो क्षेत्रमा रोजगारीका कार्यक्रमहरु वृद्धि गर्नुपर्ने छ। यसका लागि मेरो कार्यकाल स्वर्ण बनाउने योजना छ। मैले केही कुरा आफ्नो घोषणापत्रमा पनि उल्लेख गरेको छु। म यहाँ शिक्षा र स्वास्थ्यका लागि धाएर अरु नगर वा महानगरसम्म पुग्न नपरोस् र ग्रामीण पुरुष र महिलाहरुले पनि काम गर्न सक्ने हुनुपर्छ भनेर योजना बनाएर काम गर्ने छु। त्यस्तै अहिले धेरै देखिएको समस्या युवा बेरोजगारी हो। यसका लागि युवाहरुलाई प्राविधिक शिक्षामा संलग्न गराएर गोकर्णेश्वरभित्रै त्यसको विस्तारको काम गर्ने छु। हस्तकला, कृषि उत्पादन र सीपमूलक रोजगारीका क्षेत्रमा लगानी गरेर काम गर्छु ।
प्रतिस्पर्धी उम्मेदवारलाई कसरी हेर्नु भएको छ?
यो क्षेत्रमा नेपाली कांग्रेसकै बाहुल्यता छ। त्यही पनि हामीसँग प्रतिस्पर्धा हुने भनेको नेकपा एमाले र माओवादी केन्द्रको हो। माओवादी केन्द्र र एकीकृत समाजवादीले गठबन्धन गरेर प्रतिस्पर्धा गरिरहेका छन्। त्यस्तै केही संख्यामा राप्रपाका मतदाता पनि छन्। मुख्य रुपमा एमालेसँग प्रतिस्पर्धा हो। अरुलाई पनि सामान्यचाहिँ सोच्न मिल्दैन। निर्वाचन भनेको प्रतिस्पर्धा हो। सबैसँग प्रतिस्पर्धा हुन्छ भन्ने सोच राखेर मैले चुनाव प्रचार थालेको छु।
शिक्षाको गुणस्तर सुधार र स्वाथ्यको पहुँच वृद्धिका लागि कसरी काम गर्नुहुन्छ?
हामीले नै पहिलोपटक स्थानीय पाठ्यक्रम सुरुवात गरेका हौं। यहाँको धर्म, संस्कृति र नैतिकता पढाउनुपर्छ भनेर सुरुवात गरेका थियौं। अहिले यो किताब लोकप्रिय भएको छ। यो निजी र सरकारी दुवैमा पढाइ हुन्छ। अहिले ८ कक्षासम्म यसको पढाइ हुन्छ। म सल्लाहकार हुँदा १६ वटा माध्यमिक विद्यालयमा नयाँ अभ्यास सुरु गरिएको थियो। ती योजनालाई अब निरन्तरता दिने हो। जोरपाटीदेखि बागद्वारसम्मका क्षेत्रलाई समान बनाउन नगरले अब योजना बनाउँछ। शिक्षा र स्वास्थ्यमा हामी राजनीति गर्दैनौं। सबै विद्यालयमा प्राविधिक शिक्षा लागू हुनपर्छ भन्ने मेरो धारणा हो। यसका लागि पनि नगरले अब काम गर्छ।
स्वास्थ्य बिमाको काम अब नगरपालिकाले गर्ने छ। नेपाल मेडिकल कलेजलाई नगरले सहयोग गरेको छ। तर, त्यो निजी हो। हामीले नगर अस्पतालको अवधारणालाई नै अगाडि बढाउनु पर्छ। गोकर्णमा रहेको नगर अस्पताललाई अब सहरी अस्पताल पनि बनाउनुपर्छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
-1743318385.png)
