काठमाडौं– चेन्नई सुपर किंग्सले इन्डियन प्रिमियर लिग (आईपीएल)मा आफ्नो पहिलो दुवै खेल हारेको यो इतिहासमा पहिलो पटक हो। तर, चेन्नई आइतबार पञ्जाब किंग्सविरुद्ध आफ्नो जितको खाता खोल्न चाहन्छ।
चेन्नई पहिलो खेलमा कोलकाता नाइट राइडर्ससँग ६ विकेटले पराजित भएको थियो। यस्तै, दोस्रो खेलमा नवप्रवेशी लखनऊ सुपरजायन्ट्ससँग ६ विकेटले नै पराजित भएको थियो।
ब्रेबोर्न स्टेडियमको पिच ब्याटिङ अनुकूल मानिन्छ। यो पिचमा चेन्नईका ड्वेन ब्राभो र ड्वेन प्रिटोरियस जस्ता सुस्त गतिका बलरहरू उपयोगी साबित हुन सक्छन्। तर, चेन्नईले ‘पावरप्ले’मा विकेट लिने दीपक चाहरलाई गुमाउने छ। उनी चोटका कारण टोलीमा फर्किने सम्भावना न्यून छ।
कोलकाता र लखनऊविरुद्धको खेलमा चेन्नईका कुनै पनि बलरले ‘पावरप्ले’मा विकेट लिन सकेनन्। टोलीको चिन्ता दीपकको चोट मात्र होइन एडम मिल्ने र क्रिस जोर्डनको अनुपलब्धता पनि हो। त्यसैले चेन्नईले लखनऊविरुद्ध निकै महँगो साबित भएका मुकेश चौधरी र तुषार देशपाण्डेलाई निरन्तरता दिने सम्भावना छ।
यता, पञ्जाबको टोली पनि कोलकातासँग हार बेहोरेर मैदान फर्किँदै छ। यद्यपि, पञ्जाबले आफ्नो पहिलो खेलमा रोयल च्यालेन्जर्स बैंग्लोरविरुद्ध २०६ रनको विशाल लक्ष्य पछ्याउँदा ठूलो जित हात पारेको थियो। पञ्जाबले आफ्नो बलिङमा सुधार गर्नुपर्छ।
पञ्जाबलले दुई खेलमा ६ विकेट मात्र लिएको छ। कागिसो रबाडा र राहुल चाहरले उत्कृष्ट प्रदर्शन गरेका छन् भने अर्शदीप सिंह र हरप्रीत ब्रारमा सुधारको आवश्यक छ।
कागजमा दुवै टोलीको ब्याटिङ उत्कृष्ट देखिन्छ र यो सिजन दुवैले २०० भन्दा बढी रन बनाएका छन्। त्यसैले ब्याटिङमैत्री पिचमा रनको वर्षा देख्न पाइने आकलन गरिएको छ।
जोनी बेयरस्टो क्वारेन्टाइन पूरा गरेपछि पञ्जाब टोलीमा सामेल हुन तयार छन्। उनले ओडिन स्मिथको स्थान लिन सक्नेछन्। अर्कोतर्फ राज बावाको स्थान सन्दीप शर्माले लिन सक्छन्।
एडम मिल्ने चोटका कारण चेन्नईको उद्घाटन खेलबाट बाहिर भएका थिए। प्रशिक्षक स्टिभन फ्लेमिङले उनी फिट भएको संकेत गरेका छन्। यदि यस्तो भयो भने उनले मुकेश या तुषारको स्थान लिन सक्छन्।
सम्भावित ११
चेन्नई सुपर किंग्स: १. ऋतुराज गायकवाड, २. रोबिन उथप्पा, ३. मोइन अली, ४. शिवम दुबे, ५. अम्बाती रायडु, ६. रवीन्द्र जडेजा (कप्तान), ७. महेन्द्र सिंह धोनी (विकेटकिपर), ८. ड्वेन ब्राभो, ९. ड्वेन प्रिटोरियस, १०. एडम मिल्ने, ११. तुषार देशपाण्डे/मुकेश चौधरी
पञ्जाब किंग्सः १. शिखर धवन, २. मयंक अग्रवाल (कप्तान), ३. भानुका राजपाक्षे, ४. लियाम लिभिङ्स्टन, ५. जोनी बेयरस्टो, ६. शाहरुख खान, ७. हरप्रीत ब्रार, ८. कागिसो रबाडा, ९. राहुल चाहर, १०. सन्दीप शर्मा, ११. अर्शदीप सिंह
रणनीतिक बिन्दु
राहुल चाहर अहिलेसम्म बायाँ हाते ब्याट्सम्यानहरुविरुद्ध घातक साबित भएका छन्। त्यसैले उनलाई मोइन अली, शिवम दुबे र जडेजाविरुद्ध मैदानमा उतार्न सकिन्छ। उनले २०१० देखि ११ पटक बायाँ हाते ब्याटरविरुद्ध विकेट लिएका छन्, जुन राशिद खान पछि दोस्रो हो। राहुलको स्ट्राइक रेट राशिदको भन्दा पनि राम्रो छ।
यता, ऋतुराज गायकवाड पहिलो दुई खेलमा ० र १ रनमा आउट हुनु चेन्नईलाई महँगो सावित भएको छ। गत वर्षको ओरेन्ज क्याप विजेता ऋतुराजको अनौठो कीर्तिमान छ। उनले ओपनरका रूपमा ३० वा सोभन्दा बढी रन बनाएको अवस्थामा टोलीले १३ खेलमध्ये १२ खेल जितेको छ।
यस अवस्थामा चेन्नईको विजयी प्रतिशत ९२.३ छ। ३० रनभन्दा कम स्कोर गर्दा यही अंक २२.२ प्रतिशतमा झर्छ। उनले फास्ट बलिङविरूद्ध सुरुमा प्राय: सावधानीपूर्वक खेल्नुपर्छ र अर्शदीप सिंह यस खेलमा थप सतर्कताको कारण हुन्। अर्शदीपविरुद्ध ऋतुराज ३ इनिङ्समा २ पटक आउट भएका छन्। यसमा १०.५ को औसत र १११ को स्ट्राइक रेट छ।
पञ्जाबलाई रबाडा र चेन्नईलाई ब्राभोको आवश्यक
तथ्यांकको हिसाबले रबाडा पछिल्ला केही सिजनमा आईपीएलका उत्कृष्ट बलर बनेका छन्। उनले २०१९ यता ७१ विकेट लिएका छन्। ५० वा सोभन्दा बढी विकेट लिने बलरहरूमध्ये रबाडाको उत्कृष्ट स्ट्राइक रेट (५१ इनिङ्समा १५ को स्ट्राइक रेटमा ७७ विकेट) छ। तर, चेन्नईविरुद्ध उनको कीर्तिमान निकै सामान्य रहेको छ।
५ इनिङ्समा मात्र ५ विकेट लिएका छन्। उनको २२.४ को स्ट्राइक रेट अन्य कुनै पनि विपक्षी बलरको तुलनामा बढी छ। गत सिजन चेन्नईविरुद्धको २ खेलमा उनले कुनै विकेट नलिइकन ७ ओभर बलिङ गरे।
चेन्नईले पहिलो २ खेलमा खासै केही उपल्ब्धि हासिल गर्न सकेको छैन। तर, ब्राभोको प्रदर्शन उच्च छ। अघिल्लो खेलमा पनि उनले लसिथ मालिंगालाई पछि पार्दै १ सय ७१औं आईपीएल विकेट लिएका थिए। उनी आईपीएलमा सर्वाधिक विकेट लिने खेलाडीको सूचीमा पहिलो स्थान छन्।
२०१९/२०२० सिजनमा फार्म र फिटनेसका कारण समस्यामा परेका ब्राभोले १८ इनिङ्समा ३० को औसत र २१.९ को स्ट्राइक रेटमा मात्र १७ विकेट लिएका थिए। अहिले उनको औसत र स्ट्राइक रेट पनि १७.७ र १३.९ मा आएको छ। बलियो र आक्रामक ब्याटिङ लाइनअप र अन्तिम ओभरमा लम्बाइ नियन्त्रण गर्ने उनको अनुभव चेन्नईका लागि अमूल्य हुनेछ।
चेन्नईले पञ्जाबविरुद्ध २५ खेलहरू मध्ये १५ मा जित निकालेको छ। सन् २०१८ यता ८ खेल मध्ये चेन्नईले ५ जितेको छ।
शिखर धवनले चेन्नईविरुद्ध ४० भन्दा बढीको औसत रन बनाएका छन् भने २०२० बाट यो औसत बढेर ६६.८ पुगेको छ।
यो पनि
आईपीएल : चार पटकको विजेता चेन्नई र नवप्रवेशी लखनऊबीच प्रतिष्ठाको लडाइँ
आईपीएल : कोलकाताको सधैं वर्चस्व, तर पञ्जाबको पक्षमा छ वानखेडे
आईपीएल म्याच प्रिभ्यू : शमी र पृथ्वीमा हुनेछ नजर
आईपीएल : पोलार्डलाई रोक्न सञ्जुसँग छन् दुईवटा उत्कृष्ट विकल्प !
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
