काठमाडौं- अनुशासन कारबाहीमा परेका चार खेलाडीले नेपाल क्रिकेट संघ (क्यान)सँग विवाद समाधानका लागि सहमति गरेका छन्।
कारबाहीमा परेका तत्कालीन कप्तान ज्ञानेन्द्र मल्ल, उपकप्तान दीपेन्द्रसिंह ऐरी, सोमपाल कामी र कमल ऐरीसहित १४ खेलाडी बन्द प्रशिक्षणमा सहभागी नभएपछि क्यानले आइतबार उनीहरुसँग छलफल गरेको थियो।
छलफलमा क्यानका तर्फबाट अध्यक्ष चतुरबहादुर चन्द, कार्यवाहक सचिव प्रशान्तविक्रम मल्ल, कोषाध्यक्ष रोशन सिंह र मुख्य प्रशिक्षक पुबुदु दासानायके सहभागी थिए। यस्तै, खेलाडीको तर्फबाट ज्ञानेन्द्र मल्ल सहभागी थिए।
‘असन्तुष्ट सबै खेलाडी बन्द प्रशिक्षणमा सहभागी हुन तयार भएका छन्,’ क्यान स्रोतले नेपाल लाइभसँग भन्यो, ‘सोमबार बिहान ९ बजेसम्म उनीहरु बन्द प्रशिक्षणमा सहभागी हुने छन्।’
तर, त्यसअघि क्यानले मल्लसँग काठमाडौंको एक होटलमा दिउँसो छलफल गरेको थियो। छलफलमा ज्ञानेन्द्र र क्यानका पदाधिकारीहरुले आ-आफ्ना कुरा राखेका थिए। ज्ञानेन्द्रले आफूलाई टी-२० कप्तानी नदिने भए एकदिवसीय कप्तानी दिन प्रस्ताव राखेका थिए। तर, पछिल्लोपटक उक्त अडान ज्ञानेन्द्रले छाडेको ती पदाधिकारीले बताए।
'खेलाडी राष्ट्रका लागि खेल्ने हो। राष्ट्रको झण्डा बोकेर खेल्दा कुनै पनि बार्गेनिङ गर्न हुँदैन,’ छलफलमा सहभागी ती पदाधिकारीले भने, ‘कप्तानको रुपमा टिममा रहने १४ जना नै योग्य छन्।’
छलफलमा सहभागी कोषाध्यक्ष सिंहले पनि कप्तानमा सन्दीपलाई नै निरन्तरता दिने बताए। 'कप्तान परिवर्तन गरेर कुनै फाइदा छैन। हामी आफ्नो निर्णयमा अडिग छौं। सन्दीपलाई नै निरन्तरता दिन्छौं। तर, उनीमाथि गरिएको कारबाहीमा अलिक लचिलो हुने छौं,' सिंहले नेपाल लाइभलाई भने।
ज्ञानेन्द्र, सोमपाल, दीपेन्द्र र कमलले कात्तिक अन्तिम साता ग्रेडको असन्तुष्टिलाई लिएर सञ्चारमाध्यममा बोलेपछि विवाद सुरु भएको थियो। क्यानले आफ्नो विरोध गरेको भन्दै चार खेलाडीसँग कात्तिक २५ मा स्पष्टीकरण सोधेको थियो।
खेलाडीले कात्तिक ३० मा क्यानलाई जवाफ दिएका थिए। तर, क्यान सन्तुष्ट नभएपछि मल्लसहित १९ खेलाडीले हस्ताक्षर गर्दै मंसिर ५ मा ११ बुँदे मागसहित सात दिनको समय दिँदै क्यानसँग नै वर्गीकरणबारे स्पष्टीकरण सोधेका थिए। त्यसपछि विवाद झन् बढ्दै गएको थियो। क्यानले मंसिर ८ मा तीन दिनको समय दिँदै दोस्रोपटक स्पष्टीकरण सोधेको थियो।
त्यसपछि क्यानले मंसिर २९ मा नियमित कप्तान ज्ञानेन्द्र मल्ल र उपकप्तान दीपेन्द्रसिंह ऐरीलाई कप्तानबाट हटाउँदै सन्दीपलाई नयाँ कप्तानमा नियुक्त गरेको थियो। ज्ञानेन्द्र, दीपेन्द्र, सोमपाल कामी र कमलसिंह ऐरीलाई अनुशासनको कारण देखाउँदै २०२२ को सुरुआती ६ महिना ग्रेडमै नराख्ने निर्णय गरेको थियो। यी दुवै कारबाही फिर्ता हुनुपर्ने भन्दै ज्ञानेन्द्र समूहले शनिबार बोलाएको बन्द प्रशिक्षणमा गएका थिएनन्।
क्यानले शनिबार बन्द प्रशिक्षणमा बोलाएका सबै खेलाडीहरुलाई होटलमा उपलब्ध नभएपछि प्रशिक्षण नै प्रभावित बनेको छ। शनिबार र आइतबार कारबाहीमा परेका चार क्रिकेटरसँगै करण केसी, अविनाश बोहरा, सुशान भारी, कुशल भुर्तेल, विनोद भण्डारी, रोहितकुमार पौडेल, नन्दन यादव र विक्रम सोबलगायतका १४ खेलाडी अनुपस्थित थिए। अन्य १६ खेलाडी भने होटल पुगिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
