काठमाडौं- नेपाल क्रिकेट संघ (क्यान)ले ओमानमा हुने टी-२० विश्वकप ग्लोबल क्वालिफायरको बन्द प्रशिक्षणका लागि पहिलो चरणमा बोलाएका ३० मध्ये ११ खेलाडीले मात्रै रिपोर्टिङ गरेका छन्।
क्यानले बिहीबार एक विज्ञप्ति जारी गर्दै ३० खेलाडीलाई तीन बजेसम्म रिपोर्टिङ गर्न निर्देशन दिएको थियो। तर, उक्त समयमा ११ खेलाडीले मात्रै रिपोर्टिङ गरेको क्यान स्रोतले जानकारी दिएको छ।
‘११ खेलाडी होटलमा पुगेका छन्। यस्तै, ५ खेलाडी भने भैरहवाबाट आउँदै छन् भन्ने जानकारी पाएका छौं,’ ती पदाधिकारीले नेपाल लाइभसँग भने,‘ तर, कारबाहीमा परेका चार खेलाडीसँगै अरु सिनियर खेलाडी होटलमा आइपुगेका छैनन्।’
क्यानले निलम्बन गरेको कप्तान ज्ञानेन्द्र मल्ल र उपकप्तान दीपेन्द्रसिंह ऐरीलाई समेत रिपोर्टिङ गर्न बोलाएको छ। यस्तै, सोमपाल कामी र कमलसिंह ऐरीलाई पनि बन्द प्रशिक्षणमा बोलाइएको छ।
मंसिर २९ गते बसेको क्यानको बैठकले अनुशासन उल्लंघन गरेको भन्दै मल्ल, दीपेन्द्र, सोमपाल र कमलमाथि कारबाही गरेको थियो। कप्तानबाट मल्ललाई हटाएर उक्त जिम्मेवारी लेग स्पिनर सन्दीप लामिछानेलाई दिइएको छ।
यता, उपकप्तानको जिम्मेवारी भने कसैलाई पनि दिइएको छैन। यस्तै, उनीहरूलाई ६ महिनाको सेन्ट्रल कन्ट्र्याक्टसमेत राखिएको छैन। उनीहरुले क्यानको सो निर्णय खारेज हुनुपर्ने माग राखेका छन्। तर, क्यानले अन्य निर्णय परिवर्तन गर्न सकिने भएपनि कप्तान परिवर्तन नहुने र ग्रेडिङ नसच्चिने बताउँदै आएको छ।
‘खेलाडीहरुले सबै क्यानको निर्णय खारेज हुनुपर्ने माग अगाडि सारेका छन्। तर, क्यान खेलाडीहरुको मागलाई बेवास्ता गरेर अगाडि बढ्न खोजिरहेको छ। मलाई थाहा भएअनुसार उनीहरु (खेलाडी) अब के गर्ने भन्ने बिषयमा छलफल गरिरहेका छन्। निश्कर्ष के आउँछ पछि नै थाहा हुनेछ,’ ती पदाधिकारीले भने।
बोलाएका सबै खेलाडीले होटलमा रिपोर्टिङ नगरेपछि आइतबारबाट सुरु हुने भनिएको प्रशिक्षण प्रभावित हुने देखिएको छ। सबै खेलाडी बन्द प्रशिक्षणमा नआउँदा योजना प्रभावित हुने भएकाले क्यानका केही पदाधिकारी प्रशिक्षक पुबुदु दासानायेकेसँग छलफल गरिरहेका छन्।
क्रिकेट टिम व्यवस्थापक विनोद दासका अनुसार ३० खेलाडीको नाम सार्वजनिक गरे पनि प्रधानमन्त्री कप छनोटको प्रदर्शनको आधारमा पुन: बन्द प्रशिक्षणमा बोलाउन सकिनेछ।
‘बोलाइएकामध्ये १७ जना सम्झौताका खेलाडी हुनुहुन्छ। पछिल्ला तीन घरेलु प्रदर्शनका आधारमा बाँकी १३ जनालाई बोलाइएको हो। प्रधानमन्त्री कपको प्रदर्शनपछि पुन: टोली घोषणा हुनेछ,’ उनले भने।
बोलाइएका खेलाडी
सन्दीप लामिछाने, ज्ञानेन्द्र मल्ल, दिपेन्द्रसिंह ऐरी, शरद भेषावकर, करण के.सी, सोमपाल कामी, आरिफ शेख, विनोद भण्डारी, कुशल मल्ल, कुशल भुर्तेल, मोहम्मद आसिफ शेख, कमलसिंह ऐरी, शाहब आलम, सन्दीप जोरा, अविनाश बोहरा, सुशन भारी, पवन सर्राफ, विक्रम सोब, भीम सार्की, रोहितकुमार पौडेल, प्रदीप ऐर, गुलशनकुमार झा, नन्दन यादव, जितेन्द्रकुमार मुखिया, विवेककुमार यादव, सौरभ खनाल, राजेश पुलामी मगर, किशोर महतो, सागर ढकाल र हरिशङ्कर साह
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।