काठमाडौं– नेपाली कांग्रेसका गण्डकी प्रदेश सभा सदस्य डोबाटे विश्वकर्मा शुक्रबार विहान १० बजेसम्म प्रदेश सरकारमा मन्त्री बन्नेमा ढुक्क थिए।
सपथका लागि तयारी गर्दै गरेका विश्वकर्मालाई मुख्यमन्त्री कृष्णचन्द्र नेपाली पोखरेलको फोन आयो। मुख्यमन्त्रीले भेट्नका लागि बोलाए। तर, मुख्यमन्त्रीसँगको भेटपछि उनको मन्त्री बन्ने सपना सपनामै सीमित भयो।
मुख्यमन्त्री पोखरेलले तनहुँका सांसद विश्वकर्मालाई भने,‘तपाईंलाई मन्त्री बनाउन सकिन। मेरो समस्या बुझिदिनु होला।’ उनले मुख्यमन्त्रीलाई प्रश्न गरे,‘मैले के अपराध गरेँ? म के कुरामा अयोग्य भएँ?’
मुख्यमन्त्रीले ‘के भो के भो, यस्तै भो’ भन्ने जवाफ फर्काए। सवाल जवाफको क्रम रोकिएपछि उनी मुख्यमन्त्री निवासबाट बाहिरिए।
शुक्रबार गण्डकी प्रदेश सरकारमा कांग्रेसबाट ३ जना मन्त्री थपिए। तीनै जना सभापति तथा प्रधानमन्त्री शेरबहादुर देउवानिकट हुन्। वरिष्ठ नेता रामचन्द्र पौडेल पक्षका सांसद विश्वकर्माको नाम अन्तिम समयमा काटिएको थियो। उनको स्थानमा पोखराका विन्दुकुमार थापालाई मन्त्री बनाइएको छ।
बागलुङका मणिभद्र शर्मा कँडेललाई उद्योग तथा पर्यटन, कास्कीका विन्दुकुमार थापा कानुन, सञ्चार तथा प्रदेश मामिला र स्याङ्जाका मेखलाल श्रेष्ठले सामाजिक विकास मन्त्रालयको जिम्मेवारी पाएका छन्। श्रेष्ठ नेता गोपालमान श्रेष्ठ निकट हुन्। महिलालाई मन्त्रीमा स्थान नदिएको कांग्रेसले दलितबाट मन्त्री बन्नै लागेका विश्वकर्माको नाम पनि अन्तिम समयमा हटायो।
बिहीबार माओवादी केन्द्रले नाम टुंगाएपछि कांग्रेसबाट पनि मन्त्री निश्चित गरेर सपथ गराउने तयारी गरिएको थियो। बिहीबार कांग्रेसले आफ्ना नाम टुंगाउन सकेन। शुक्रबार १ बजे सपथ गर्ने तयारी हुँदाहुँदै विश्वकर्माको नाम हटाएर थापालाई स्थान दिइयो।
विश्वकर्माको नाम हटाउर शुक्रबार मन्त्री बनाइएका कास्कीका थापाले मुख्यमन्त्री पोखरेलसँगै गत जेठ २९ मा मन्त्रीको शपथ ग्रहण गर्न खोजेका थिए। सरकार गठन हुँदा नै मन्त्री हुन नपाएपछि उनले पार्टीभित्र निरन्तर गुनासो गर्दै आएका थिए।
पोखराका व्यापारी समेत रहेका थापाले सभापति देउवा पोखरा जाँदा बसाइ तथा खर्चको व्यवस्थापन गर्दै आएको बताइन्छ। केन्द्रको दबाबमा विश्वकर्मालाई हटाएर थापाको नाम राखिएको संस्थापनइतरका नेताहरुको बुझाइ छ।
२०३६ सालदेखि तनहुँको राजनीतिमा सक्रिय विश्वकर्मा मुख्यमन्त्री पोखरेलका बुवा गोवर्द्धन शर्माकै प्रेरणाबाट राजनीतिमा लागेका थिए। उनका बुवा टंखबीर विश्वकर्मा पनि कांग्रेसको राजनीतिमा सक्रिय थिए। २०१७ सालमा तत्कालीन राजाले दलमाथि प्रतिबन्द लगाएपछि उनी भूमिगत भएका थिए। पार्टीमा वरिष्ठ नेता पौडेलनिकट भएकाले समूह फरक भएकै कारण नाम आफ्नो नाम हटाइएको हुनसक्ने उनको बुझाइ छ।
'पार्टीभित्र स्पष्ट दुई खेमा छ। मलाई पौडेल पक्ष भनेर नै मन्त्री हुनबाट बञ्चित गरिएको होला,’ विश्वकर्माले नेपाल लाइभसँग भने,‘यो त अन्याय नै भएको हो नि।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
