काठमाडौं– जारी युरोकप २०२० अन्तर्गत आज (सोमबार) नकआउट चरणका दुई खेल हुँदै छन्। आज राति हुने पहिलो खेलमा स्पेन र क्रोएसियाबीच प्रतिस्पर्धा हुनेछ भने दोस्रो खेलमा फ्रान्सले स्विट्जरल्यान्डको सामना गर्नेछ।
डेनमार्कको पार्केन एरिनामा राति ९ः४५ बजे सुरु हुने पहिलो खेलमा स्पेन र क्रोएसिया दुबै टिम जित निकाल्दै क्वाटरफाइनलमा पुग्ने योजनामा हुनेछन्। यस्तै राति १२ः४५ बजे रोमानियाको नेसनल एरिनामा साविक उपविजेता फ्रान्स र स्विट्जरल्यान्ड क्वाटरफाइनलमा पुग्ने लक्ष्यका साथ मैदानमा उत्रँदै छन्।
आजको ‘प्लेयर्स टु वाच’ मा हामीले क्रोएसियाका लुका मोड्रिच, स्पेनका जोर्डी अल्बा र अल्भारो मोराटा, फ्रान्सका करिम बेन्जेमालाई छानेका छौं।
मोड्रिच
स्पेनविरुद्ध मैदानमा उत्रँदा क्रोएसिया कप्तान मोड्रिचमा निर्भर हुनेछ। ‘प्लेमेकर’ मोड्रिचको खेलमा टिमको प्रदर्शन निर्भर हुनेछ।
उनले जारी प्रतियोगितामा ३ खेलमा १ गोल गरेका गरेका छन्। क्रोएसियाका लागि १ सय ४१ खेल खेलेका उनले १८ गोल गरिसकेका छन्। उनले क्रोएसियाको उमेर समूहबाट समेत खेलेका थिए।
मोड्रिचसँग स्पेनिस क्लब रियल मड्रिड, इंग्लिस क्लब टोटेनहमबाट प्रिमियर लिग खेलेको अनुभवसमेत रहेको छ। त्यसैले उनी स्पेनविरुद्ध प्रभावशाली हुने अनुमान गरिएको छ।
बेन्जेमा
पोर्चुगलविरुद्ध समूह चरणको अन्तिम खेलमा गरेको दुई गोल बेन्जेमाको युरोपियन च्याम्पियनसिपमा पहिलो नै हो। रियल मड्रिडबाट देखाइरहेको उच्च फर्मका कारण उनलाई फ्रान्सले करिब ६ वर्षपछि टोलीमा फिर्ता बोलाएको थियो।
फ्रान्सबाट ८६ खेल खेल्दै २९ गोल गरेका बेन्जेमा मैदान भित्र र बाहिर उत्ति नै चर्चामा रहने खेलाडी हुन्। विभिन्न हर्कतका कारण उनलाई २०१५ देखि फ्रान्सको राष्ट्रिय टोलीमा राखिएको थिएन।
उनले घरेलु मैदानमा भएको युरो २०१६ मात्र गुमाएका थिए। यस्तै, २०१८ मा रुसमा सम्पन्न विश्वकप पनि उनले गुमाए। उनीबिनाको फ्रान्सले दोस्रो पटक विश्वकप जितेको थियो।
मोराटा
मोराटासँग रियल मड्रिड, चेल्सी, एट्लेटिकोबाट खेलेको अनुभव छ। उनले बेलारुससँगको खेलसँगै राष्ट्रिय टोलीबाट डेब्यु गरेका हुन्।
स्पेनिस क्लब एट्लेटिको मड्रिडबाट इटालियन सिरी ‘ए’ क्लब युभेन्टस पुगेका स्पेनका प्रभावशाली स्ट्राइकर मोराटाले गत सिजन क्लबका लागि ३२ खेलमा ११ गोल गरेका थिए।
क्रोएसियाविरुद्ध मोराटा स्पेनका मुख्य खेलाडी रहनेछन्। २८ वर्षीय स्ट्राइकर मोराटाले समूह चरणको ३ खेलमा १ गोल गरिसकेका छन्। उनले क्रोएसियाको डिफेन्स लाइनलाई निकै व्यस्त बनाउने अनुमान गरिएको छ।
उनीसँग स्पेनको यू १७, १८, १९ र २१ टोलीबाट खेलेको अनुभव छ। उनले सिनियर टोलीबाट ४३ खेलमा २० गोल गरेका छन्।
अल्बा
लेफ्ट ब्याकबाट खेल्ने अल्बा आक्रामक खेलाडीलाई सहयोग गर्दै आएका छन्। स्पेनिस टोलीमा अल्बाको भूमिका लेफ्ट ब्याकले रक्षा गर्नुका अलावा लेफ्ट विंग्सको भूमिका ओगट्नु हो। आधुनिक फुटबलमा यसलाई महत्वपूर्ण मानिन्छ।
सर्जियो बुस्केट कोरोना संक्रमण भएपछि अल्बाले युरोकप २०२० को पहिलो दुई खेलमा स्पेनको नेतृत्व गरेका थिए। उनले स्पेनबाट ७५ खेल खेल्दै ८ गोल गरिसकेका छन्।
बार्सिलोनाबाट खेल्ने अल्बा सन् २०१२ को युरोकपमा महत्वपूर्ण खेलाडी ठहरिएका थिए। फाइनलमा उनले इटालीविरुद्ध काउन्टरमा गएर दोस्रो गोल गरेका थिए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
