काठमाडौं- तीन वर्षअघि मोडल तथा कलाकार निशा घिमिरेको फोटो, भिडियोमा उनको मोटोपनलाई लिएर भद्दा टिप्पणी आउँथे। उनलाई राम्रो अभिनय गर्न नजान्ने कलाकार भनेर आलोचना गरिएका हुन्थे। र, उनलाई फिल्ममा मौका दिइएको विषयमा नेपाली फिल्म उद्योगलाई समेत गाली गरेका थिए कतिपयले।
अचेल अवस्था फेरिएको छ। अहिले माथिका प्रतिक्रिया भएकै फोटो र भिडियोको मुनि निशा पहिलेकै अवस्थामा फर्किउन् भनेर प्रार्थना गरिरहेको देख्न सकिन्छ।
उनको शरीरलाई भद्दा मजाक बनाउनेहरु पहिलेकै अवस्थाको कामना गर्न कसरी पुगे त? उत्तर निकै दुःखदायी छ। किनभने निशा घिमिरे अहिले बोल्न सक्दिनन्। न हिँड्न सक्छिन्, न आफैं खान। पहिले ६० किलोको शरीर अहिले २० किलोमा झरेको छ। उनी अहिले हाड र छालामात्रै टाँसिएको जीवित कंकाल बनेकी छन्।
को हुन् निशा घिमिरे?
ललितपुरमा जन्मिएकी निशा परिवारकी कान्छी सन्तान हुन्। मध्यमवर्गीय परिवारमा जन्मिएपनि उनका परिवारले केही अभाव हुन दिएनन्। सानैदेखि कला क्षेत्रमा रुची राखेकी उनलाई परिवारले सुरुमा यसमा साथ दिएन। तर, परिवारको कुरा नटेरेरै उनी कलाकारितामा लागिरहिन्।
उनले आफ्नो करिअर म्युजिक भिडियोबाट सुरु गरिन्। तिजको गीतमा खेलेपछि कलाकारिताको यात्रा थालेकी निशालाई विस्तारै फोटोसुट, मोडलिङ्का अफरहरु आउन थाल्यो। उनले अन्तर्वार्ताका क्रममा भन्थिन्, ‘मलाई छोटा र ग्ल्यामर देखिने कपडा लगाउन मनपर्छ।’
अभिनय रगतमा भएको, ठूलो कलाकार त हैन, आफूसँगै यस क्षेत्रमा प्रवेश गरेकाहरुलाई सजिलै अभिनयमा जित्न सक्ने आत्मविश्वास देखाउँथिन् उनी। कुराकानीका क्रममा भन्थिन्, ‘म ठूला कलाकार रेखा थापाहरुलाई त जित्न सक्दिनँ तर, आफूसँगैका साथीहरुको भन्दा अब्बल अभिनय गर्छु।’
उनले भोजपुरी भाषामा बनेको ‘मधेशी पुत्र-२’ चलचित्रमा मुख्य भूमिका निर्वाह गरिन्। ‘डियर जिन्दगी’ टेलिश्रृङ्खलामा पनि अभिनय गरिन्।
यी अभिनयमा उनले शुभचिन्तकलाई आफूतिर तान्न सकिनन्।
पहिले दुब्लो, पातलो शरीर लिएर कलाकारितामा छिरेकी उनी बढ्दो तौलले तनावमा पनि हुन्थिन्। त्यसैमाथि ‘बडी सेमिङ’ हुनेखालका भद्दा प्रतिक्रियाले उनलाई भित्रैदेखि टुक्र्याउँथ्यो।
तर, हिम्मत जुटाउँथिन्। ‘सागरभित्र छिरिसकेपछि मोती नटिपी फर्कन्नँ’ भन्ने दृढताले उनी २०७५ सालमा भारतको देहरादुनमा अभिनय विषयमा डिप्लोमा पढ्न गइन्।
परिवारले उनलाई भारत पठाउन चाहेको थिएन। कलाकारिता क्षेत्रमा प्रवेश गरेको नै मन परेको थिएन। तर, जसोतसो उनले परिवारलाई मनाइन्। नेपालमा भनेजस्तो अभिनय पढाउने ठाउँ नभएको र आफू यही क्षेत्रमा केही गरेर देखाउने भन्दै उनले परिवारलाई मनाएकी थिइन्। छोरीको इच्छा र खुशीलाई नकार्न नसकेर उनका परिवारले निशालाई भारत जान स्वीकृति दियो।
यसरी आइलाग्यो बज्रपात
भारत गएको दुई महिनापछि उनीसँगै अन्य ४ जना विद्यार्थी कार लिएर घुम्न निस्केका थिए। त्यही समयमा एउटा ट्रकले नराम्रोसँग ठक्कर दियो। ठक्कर दिएको ट्रक र त्यसका चालकलाई प्रहरीले अहिलेसम्म पक्राउ गर्न सकेको छैन। किनभने कुन ट्रकले ठक्कर दियो भन्ने नै अहिलेसम्म खुलेको छैन।
निशासहितको टोलीलाई प्रहरीले अस्पताल पुर्यायो। उनका बाबुले भोलिपल्ट फोन गर्दा प्रहरीले उठायो र घटनाबारे जानकारी दियो। आर्थिक अवस्था राम्रो नभएपनि जग्गा धितो राखेर उनको परिवारले निशाको उपचार सुरु गर्यो। भारतमा खर्च धान्न मुस्किल परेपछि परिवारले उनलाई नेपाल ल्याए। ट्रमा सेन्टरमा उपचार सुरु भयो तर, केही सुधार आएन।
तीन महिनासम्म पनि उनको स्वास्थ्यमा सुधार नआएपछि उनलाई ट्रमा सेन्टरले थेरापी गराउन अनुरोध गर्दै घर पठायो। आर्थिक अभावका कारण उनीहरुले थेरापी सेन्टर लैजान सकेनन्। त्यसलै २०७६ सालमा परिवारले सहयोगका लागि अपिल समेत गरेको थियो।
त्यो समयमा केही सहयोग रकम जम्मा भएपनि त्यो पर्याप्त भएन। निशाको स्वास्थ्य अवस्थामा सुधार पनि आएन।
हाड र छाला मात्रै भएकी निशाको नवजीवन परोपकार संस्थाका अध्यक्ष दुर्गानाथ दाहालले फोटो र भिडियो खिचेर सामाजिक सञ्जालमार्फत् सहयोगको अपिल गरे।
उनको त्यो पोष्ट सामाजिक सञ्जालमा भाइरल भयो। निशाको हाड र छाला मात्रै भएको तस्वीर र उक्त पोष्ट देखेर नर्भिक अस्पतालकी प्रबन्ध निर्देशक मेघा चौधरीले निशाको निःशुल्क उपचारको जिम्मा लिइन्। उनको अहिले नर्भिकमा उपचार भइरहेको छ।
के भएको छ निशालाई?
चिकित्सकका अनुसार निशाको महत्वपूर्ण अंगहरू मुटु, कलेजो, मिर्गौला, फोक्सो लगायतमा खासै समस्या देखिएको छैन। उनको समस्या भनेको नशामा छ। त्यसैले उनको सुधारको आशा चिकित्सकले लिएका छन्।
निशाको दर्दनाक अवस्थाबारेका खबर बाहिरिएसँगै उनको सहयोगमा रकम जुट्ने क्रम बढेको छ। केही कलाकारले उनका परिवारलाई भेटेरै नगद सहयोग गरिरहेका छन्। उनका शुभचिन्तकहरुले पनि स्वास्थ्य लाभको कामना गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786875773.jpg)
-1786602170.png)
-1786513116.png)
