कोरोना अपडेट

काठमाडौंमा खुकुलो भयो निषेधाज्ञा– सडकमा समेत बढ्न थाल्यो चहलपहल

निमेष जंग राई सोमबार, जेठ २४, २०७८ ०८:०४

काठमाडौं– कोरोना भाइरस संक्रमणको दोस्रो लहर फैलिएपछि गत वैशाख १६ गतेदेखि काठमाडौं उपत्यकामा निषेधाज्ञा जारी गरिएको थियो।

कोरोना संक्रमणको ‘चेन ब्रेक’ गर्न काठमाडौं, ललितपुर र भक्तपुर जिल्लामा निषेधाज्ञा जारी भएपछि देशका अन्य जिल्लामा पनि निषेधाज्ञा लागू भएको थियो।

गृह मन्त्रालयका अनुसार आइतबारसम्म देशभरका ७५ जिल्लामा निषेधाज्ञा लागू छ। धेरै जिल्लामा जेठ मसान्तसम्मै लागू हुने गरी निषेधाज्ञा थपिएको पनि छ।

काठमाडौं उपत्यकामा जेठको दोस्रो सातादेखि खाद्यान्न पसलसमेत खोल्न बन्द गरिएको थियो। तर, पछिल्लो पटक जेठ २१ गतेदेखि भने निषेधका आदेशहरु केही खुकुलो बनाइएको छ।

तीनै जिल्लाका प्रशासन कार्यालयहरुले बिहान ९ बजेसम्म दैनिक उपभोग्य बस्तु (खाद्यान्न, तरकारी, खाना पकाउने ग्यास, तरकारी, दूध, मासु) बिक्री हुने पसल खुला गर्ने निर्णय गरेका छन्।

स्थानीय प्रशासनको निर्णयानुसार खाद्यान्नसहित दैनिक उपभोग्य बिक्री हुने पसलमा मानिसको भिडभाड बढ्न थालेको छ।

अहिले पसलमा मात्रै हैन, सडकमा समेत मानिसहरुको चहलपहल र भिडभाड बढेको छ। महानगरीय ट्राफिक प्रहरी महाशाखाका अनुसार पछिल्ला दिनमा सवारी साधनको चाप पनि सडकमा केही बढेको छ। यद्यपि, अत्यावश्यक काम बाहेक सडकमा निस्किएका सवारी साधनलाई नियन्त्रणमा लिने गरिएको ट्राफिक प्रहरीको भनाइ छ।

करिब १ साताजति मर्निङ वाक समेत जान बन्देज लगाइको काठमाडौं उपत्यकामा अहिले भने बिहान र साँझपछि मानिसहरु सडकमा यत्रतत्र टहलिरहेका देखिन्छन्।

काठमाडौंका मुख्य सडक र चोकहरुमा अहिले ठेलामा फलफूल तथा तरकारी र आइसक्रिम बिक्री गर्नेहरु समेत देखिन थालेका छन्। यद्यपि, प्रशासनले भने ठेलामा हुने व्यापारलाई निषेध गरेको छ।

कोही काम विशेषले त कोही घर (कोठा)मा बस्दा बस्दा ‘बोर’ भएपछि ‘कलिकति रिफ्रेस हुन’ सडकमा निस्किरहेका बताइरहन्छन्।

महानगरीय प्रहरी परिसर काठमाडौंका एक अधिकारीका अनुसार सर्वसाधारणलाई सडकमा हिँडडुल गर्न प्रतिबन्धै भने लगाइएको छैन। तर, अनावश्यक भिडभाड भएको अवस्थामा भने प्रहरीले भिडभाड नगर्न भनेर सचेत गराउने गरिएको ती अधिकारी बताउँछन्।

काठमाडौं उपत्यकामा विभिन्न चरणमा गरी थपिएको निषेधाज्ञा जेठ ३१ गतेसम्मलाई लागू हुनेछ। त्यसपछि पनि संक्रमणको अवस्था हेरेर निषेधाज्ञामा कडाइ गर्ने वा खुकुलो गर्ने भन्ने निर्णय हुने अधिकारीहरुको भनाइ छ।

स्वास्थ्य तथा जनसंख्या मन्त्रालयले आइतबार सार्वजनिक गरेको तथ्याङ्कअनुसार काठमाडौं उपत्यकाका ३ जिल्लामा गरी २१ हजार ४२७ जना सक्रिय संक्रमित छन्।

निषेधाज्ञाको शुरुवाती चरणमा भन्दा पछिल्लो समय दैनिक संक्रमितहरु थपिने दर केही घटेको पनि छ। संक्रमितहरु थपिने क्रम घट्दै गएमा अबको हप्ता (असार)देखि निषेधाज्ञा खुकुलो हुँदै जाने अधिकारीहरुको भनाइ छ।