फाइल तस्वीर। प्रधानमन्त्री केपी शर्मा ओलीलाई विश्वासको मत दिने कि नदिने भन्ने विषयमा जसपामा विवाद छ। जनता समाजावादी पार्टी (जसपा)का संघीय परिषद् अध्यक्ष बाबुराम भट्टराई र अध्यक्ष उपेन्द्र यादव प्रधानमन्त्री ओलीविरुद्ध उभिने बताइरहेका छन्। तर, अध्यक्ष महन्थ ठाकुर र वरिष्ठ नेता राजेन्द्र महतो विश्वासको मत दिने पक्षमा छन्। जसपाका नेता शरतसिंह भण्डारी कुनै पक्षमा उभिन हतार गर्न नहुने बताउँछन्। कोरोना परीक्षणका लागि संसद् भवन पुगेका उनीसँग गरिएको संक्षिप्त कुराकानीः
अहिलेकै अवस्थामा जसपा नेपाली कांग्रेस र माओवादी केन्द्रसँग हुनुपर्छ कि प्रधानमन्त्री ओलीसँग?
हाम्रो हिसाबले हेर्दा सबै मतियार हुन्। यो मुलुकलाई अहिलेको उपलब्धि रक्षा गर्दै निकास दिने कुरामा हामी आफैं अघि बढ्नुपर्छ। सबै पार्टी फेल भइसके। त्यसैले अहिलेको अवस्थामा जसपाले नेतृत्व लिएर अघि बढ्नुपर्छ। हामीले वैकल्पिक पार्टी भन्दै थियौं, वैकल्पिक शक्ति स्थापित हुन समय लाग्छ सोचेका थियौं। आवश्यकताको समय आइसकेको छ। अब हामी त्यसतर्फ जानुपर्छ।
जसपाकै नेतृत्वमा अघि बढ्ने त भन्नुभयो। तर, जसपा आफैं कता लाग्ने भनेर अलमलिरहेको देखिन्छ नि?
नेपालमा राजनीति छिनछिन र पलपलमा फेरिरहेको छ। यहाँको मौसम र राजनीति उसैगरी परिवर्तन भइरहेको छ। बिहान चिसो थियो, कोट लगाएर आइयो अहिले गर्मी भयो। त्यस्तै राजनीतिमा २७ गते नै के हुन्छ थाहा छैन। हामीलाई त कांग्रेस र माओवादी नै २७ गते एकै ठाउँ हुन्छन् कि हुँदैनन् भन्ने शंका छ।
तपाईंको पार्टीको एक समूह नै कांग्रेस र माओवादीसँग गठबन्धन बनाउन जुटिरहेको छ त?
प्रमुख प्रतिपक्ष पार्टी नेपाली कांग्रेसले असंवैधानिक प्रधानमन्त्रीलाई राजीनामा माग गर्नुपर्थ्यो। जबसम्म राजीनामा आउँदैन, तबसम्म संसद् चल्न दिनुहुँदैनथ्यो। तर, त्यो पार्टीले अरुले जे भन्छन् त्यही गरुँला भनेर बसेको छ।
अचम्म लाग्छ हाम्रा मित्रहरू जन्ती खोजिरहेका छन् तर, दुलाहा (कांग्रेस) तयार छैन। यस्तो अवस्थामा दुलाहाले बिहे गर्ने हो कि हैन? ऊ तयार छ कि छैन? यो सबै परिस्थिति भएकाले २७ गते को दुलाहा हुन्छ, त्यसमा भर पर्छ।
यही अवस्था रह्यो भने २७ गतेपछि जसपा फुट्नेचाहिँ निश्चित भयो, हैन?
जसपा फुट्दैन। यति चाहिँ ढुक्क भएर बस्नुहोस्।
कसरी एक रहन्छ, एक रहन गर्छ चाहिँ के?
हाम्रो पार्टीले व्यापक रूपमा छलपल गर्छ। पार्टीको हितमा, मुलुकको हितमा जे हुन्छ, त्यही निर्णइ गर्छ।
कांग्रेसले त भनिसक्यो नि सरकारलाई विश्वासको मत दिन्नौं। दुलाहाले बिहे गर्न खोजेको प्रमाण होइन यो?
मतदान २७ गते गर्नुछ, पहिल्यै मत दिन्नौं भनेको छ। तपाईं विश्वासको मत दिन्न भने गर्नुहुन्छ के? त्यसको परिणाम के हुन्छ? त्यो स्पष्ट गर्नुपर्दैन? राजनीति हामीले बुझेका छैनौं? कोही प्रष्ट छैनन्। मुलुकको राजनीति प्रष्ट छैन। हेर्दै जानुस्, धेरै निर्णय परिवर्तन हुँदै जान्छन्।
अरु त निर्णय गर्दै गर्लान्। स्पष्ट हुँदै जालान्। तपाईंहरूले स्पष्ट निर्णय गर्ने बेला भयो नि?
हामी मत दिने बेलासम्म हेर्छौं। राष्ट्रिय राजनीतिमा के हुन्छ, त्यही अनुसार निर्णय गर्छौं।
तपाईंहरू फरक धार र विचारमा हुनुहुन्छ। त्यसैले निर्णय आउन मुस्किल छ भनिन्छ!
धार र विचार त लोकतान्त्रिक पार्टीमा हुन्छ र हुनुपनि पर्छ। यसलाई स्वभाविक रुपमा लिनुपर्छ।
तपाईंहरूले हस्ताक्षर संकलन नै थालिसक्नुभयो रे?
साइन गरेको कुरा सुनेको हो। तर, हामीलाई कसैले साइन गर्न भनेको छैन। साइन गर्ने कुरामा सहमति पनि छैन। कुनैपनि पार्टीको निर्णय विधिसम्मत गर्नुपर्छ। एकै ठाउँ बसेर गर्ने निर्णय हो। हामीलाई विश्वास के छ भने जे गर्ने हो, यो पार्टीले एक ढिक्का भएर निर्णय गर्छ।
यो पनि पढ्नुहोस् :
प्रतिगमन पक्षधर र विरोधीको ध्रुवीकरण हुनसक्छ, तर पार्टी फुट्दैन : उपेन्द्र यादव
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
