–शरच्चन्द्र भण्डारी
काठमाडौं- नेपाल र संघीय गणतन्त्र जर्मनीबीच कूटनीतिक सम्बन्ध स्थापना भएको ६० वर्ष पुगेको छ।
पारस्परिक सम्बन्ध स्थापनाको ६०औँ वर्ष प्रवेशका अवसरमा दुई देशबीचका उच्च अधिकारीले विगत केही दिनदेखि नेपालको आर्थिक–सामाजिक विकासका निम्ति परामर्शसमेत गरेका छन्।
भूकम्पपछिको पुनःनिर्माण, भौतिक पूर्वाधार निर्माण, ऊर्जा, शिक्षा, स्वास्थ्य र मानवाधिकार संरक्षणमा नेपालले निर्वाह गरेको भूमिकाको सराहना गर्दै जर्मनीको प्रतिनिधिमण्डलले संघीय गणतन्त्र नेपालको चौतर्फी विकासमा सक्दो सहयोग गर्ने प्रतिबद्धता व्यक्त गरेको छ।
अर्थ मन्त्रालयको अन्तर्राष्ट्रिय आर्थिक सहयोग समन्वय महाशाखाका प्रमुख श्रीकृष्ण नेपालको नेतृत्वमा शनिबार र आइतबार दुई दिन द्विपक्षीय छलफल र परामर्श भएको थियो।
द्विपक्षीय पारस्परिक सम्बन्ध स्थापनाको ६०औं वार्षिकोत्सवका अवसरमा आइतबार साँझ जर्मनीका राजदूतको निवासमा आयोजित समारोहमा परराष्ट्रमन्त्री प्रदीपकुमार ज्ञवालीले दुई देशबीच राजनीतिकस्तरमा हुने उच्चस्तरीय भ्रमणबाट आपसी सम्बन्ध अझ प्रगाढ हुने बताए। यस्ता भ्रमण आदानप्रदान गर्नु अहिले ज्यादै सामयिक भएको मन्त्री ज्ञवालीको भनाइ थियो। लामो समयदेखि दुई मुलुकबीच उच्चस्तरीय संवाद् एवं भेटघाट नभएकोतर्फ मन्त्री ज्ञवालीले जर्मनीका राजदूत रोलान्ड सेफेरको ध्यानाकर्षण गराएका थिए।
सांस्कृतिक सहयोग, जनता–जनताबीचको सम्पर्क र सम्बन्ध, तल्लो तहका जनतासँगको सम्पर्क र सम्बन्ध विस्तारमा जोड दिँदै मन्त्री ज्ञवालीले दुई राष्ट्रबीचको भावी सम्बन्धलाई अझ प्रगाढ तुल्याउनुपर्ने बताए।
नेपालको आर्थिक उन्नयनको प्रयासमा जर्मनीबाट प्रत्यक्ष वैदेशिक लगानीको मात्रामा वृद्धि, व्यापारिक एवं व्यावसायिक सम्बन्ध विस्तार, प्रविधि र ज्ञान हस्तान्तरण तथा सन् २०२२ मा अल्पविकसित मुलुकबाट स्तरोन्नति तथा सन् २०३० मा मध्यम आययुक्त मुलुकका रुपमा नेपाललाई स्थापित गर्न जर्मनीको सहयोग महत्वपूर्ण हुने मन्त्री ज्ञवालीले बताए।
राजदूत सेफेरले एकीकृत पार्टीका रुपमा सरकारले जनताका आकांक्षा तथा निर्वाचनका बेला गरेका वाचा पूरा गर्ने तथा विगतका तिक्तता बिर्सेर उज्ज्वल भविष्य र मेलमिलापलाई उच्च प्राथमिकता प्रदान गर्ने विश्वास व्यक्त गरे।
स्वास्थ्य तथा ऊर्जाका क्षेत्रमा जर्मनीले निरन्तर सहकार्य गर्ने प्रतिबद्धता व्यक्त गर्दै राजदूत सेफेरले प्रतिस्पर्धात्मक विश्व बजारमा बिक्री हुने साना तथा मझौला उद्योगका उत्पादन प्रवर्धनमा सघाइरहने दृढता व्यक्त गरे।
सरकार–सरकारबीचको सहकार्यबाट मात्र नेपालको आर्थिक उन्नयनका आकांक्षा पूरा नहुने विचार व्यक्त गर्दै उनले जर्मनी र युरोपका अन्य देशका उद्यमी व्यवसायीले नेपालमा लगानी गरुन् भन्ने आफ्नो चाहना रहेको बताए। उनले भने, 'निजी क्षेत्रसँगको साझेदारीमा स्थापना हुने उद्योगमा विश्वसनीय र दिगो रोजगारीका अवसर सिर्जना हुनेछन्।'
संयुक्त राष्ट्रसंघको अस्थायी सदस्यका लागि आगामी निर्वाचनमा जर्मनीले गर्न लागेको प्रतिस्पर्धा र त्यसमा नेपालबाट समर्थन प्राप्त भएकामा नेपाल सरकारप्रति राजदूत सेफेरले आभार प्रकट गरेका थिए। नेपालको साथ र सहयोगबाटै शान्ति स्थापनाको बहुपक्षीय कार्यमा नेपाली सेनाको योगदान स्मरणीय हुने पनि उनले बताए। रासस
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
