तस्बिर: कपिलदेव खनाल
काठमाडौं- विभिन्न आयोजना निर्माण गर्ने जिम्मा पाएका ठेकेदार कम्पनीहरूले समयमै काम नगरेपछि स्थानीयले स्वतस्फूर्त रूपमा विरोध गर्ने क्रम बढेको छ। केही वर्षयता स्थानीयले नयाँ-नयाँ शैलीमा विरोध जनाउँदै ठेकेदारलाई दबाब दिँदै आएका छन्।
यही क्रममा बालाजु-त्रिशूली सडकखण्ड निर्माणको जिम्मा पाएको ठेकेदारविरुद्ध विरोधमा स्थानीय जुटेका छन्। ठेकेदार कम्पनीले समयमा काम नगरेपछि दबाब दिन स्थानीयले पोस्टर टाँस्न थालेका छन्। उनीहरुले ठेकेदारको फोटोसहित दबाबमूलक सन्देश लेखिएको पोस्टर बिजुलीको पोल तथा सार्वजनिक सवारीमा टाँस्न थालेका हुन्।
सडक आयोजनाहरू समयमा नै सम्पन्न नहुने समस्याले सरकार तथा सडक उपभोक्ता आममानिस आक्रान्त बनेका छन्। ठेकेदार कम्पनीहरुले सडकको ठेक्का लिने र विभिन्न बहानामा समयमा काम नगर्ने प्रवृत्ति मुलुकको लागि ठूलो समस्या बन्दै आएको छ। यस्तो प्रवृत्तिबाट आजित बनेका स्थानीय स्वतस्फूर्त रुपमा विरोधमा उत्रिएका हुन्।
बालाजुदेखि त्रिशूलीसम्मको सडक स्तरोन्नतिका लागि सरकारले भारतको एक्जिम बैंकसँग ऋण लिएर काम सुरु गरेको थियो। बालाजुदेखि नुवाकोटको पिपलटारसम्मको सडकलाई दुई खण्डमा विभाजन गरेर विस्तारको काम सुरु गरिएको हो।
बालाजु-रानीपौवा सडकखण्डअन्तर्गतको १७ किलोमिटर सडक निर्माणका लागि एआइपिएल-सैलुङ जेभीले ठेक्का पाएको थियो। पूर्वप्रधानमन्त्री पुष्पकमल दाहाल ‘प्रचण्ड’का घरबेटी शारदा अधिकारीको कम्पनी सैलुङले उक्त खण्ड निर्माणको ठेक्का पाएको हो। यो सडक निर्माणको सम्झौता २०१४ को जुनमा भएको थियो। सम्झाैताअनुसार २०१६ को जुनमै सडक निर्माण सम्पन्न हुनुपर्थ्यो।
तर, दुई वर्षको अवधिमा ठेकेदार कम्पनीले सामान्य काम मात्र गरेको आयोजनाको भनाइ छ। उक्त खण्डको निर्माणका लागि आयोजनाले हालसम्म पाँच पटक समय थप गरिसकेको छ। सन् २०१९ मेमा सकिएको म्याद पाँचौ पटक थपिएको हो।
मुड्खुबाट सुरु हुने यो सडकखण्डको ठेक्का ३१ करोड रुपैयाँमा लागेको हो। हालसम्मको भौतिक प्रगति करिब ५५ प्रतिशत मात्र रहेको छ। भारतीय कम्पनी एआइपिएल साझेदार भएपनि यो सडकको निर्माण कार्य सैलुङ कस्ट्रक्सनले गरिरहेको छ। प्रचण्डनिकट ठेकेदार अधिकारीको कम्पनी सैलुङले ठेक्का पाएका अधिकांश काम अलपत्र अवस्थामा रहेका छन्। जसको स्थानीयबाट सर्वत्र विरोध भइरहेको छ।
ठेकेदार कम्पनीले समयमा काम नगर्दा स्थानीयले धेरै दुःख पाएकाले छिटो काम सक्न दबाब दिन विरोधका कार्यक्रम गरिएको ककनीका स्थानीय कृष्ण लामाले बताए। ‘लामो समयदेखि निर्माण सम्पन्न हुन नसकेको यो खण्डमा निर्माण छिटो सक्न दबाब दिने उद्देश्यका साथ हामीले स्वःस्फूर्त रुपमा विरोध गरेका हौं,’ उनले भने, ‘चार/पाँच वर्षअघि नै निर्माण सकिनुपर्नेमा हालसम्म आधा पनि काम भएको छैन। त्यसैले पोस्टर/पर्चामार्फत विरोध जनाएर काम सक्न दबाब दिएका हौं।’
गत वर्ष पनि विभिन्न सडक आयोजनाहरुमा स्थानीयले निर्माण कम्पनीका प्रमुखको फोटोसहित विरोधका नारा लेखेर पोल तथा गाडीमा टाँसेर विरोध जनाएका थिए। त्यसरी विरोध गरेपछि केही आयोजनाको काममा प्रगतिसमेत देखिएको थियो।
गत वर्ष भक्तपुर-नगरकोट-सिपाघाट क्षेत्रमा पनि यस्तै विरोध भएको थियो। पोल तथा सार्वजनिक सवारीमा काम नगर्ने ठेकेदारको फोटो टाँसेर सर्वसाधारणले विरोध जनाएपछि भक्तपुर-नगरकोट-सिपाघाट सडकको कामले तीव्रता पाएको थियो। २०१४ को जुन ५ मा ठेक्का सम्झौता भएको उक्त सडकको पाँच पटक म्याद थपिसकिएको छ। सुरुको सम्झौताअनुसार भक्तपुर-नगरकोट-सिपाघाट सडक २०१६ को जुनमा सकिनुपर्थ्यो।
१५ किलोमिटर लम्बाइको उक्त बाटो निर्माणका लागि एआइपिएल-सैलुङ जेभीले ३१ करोड ५२ लाख रुपैयाँमा ठेक्का लिएको थियो। अहिले यो आयोजनाको लागत बढिसकेको छ।
गत वर्ष कात्तिक २३ गतेदेखि साइटमा काम सुरु भएको केही दिनमै स्थानीयले ठेकेदार अधिकारीको फोटो पोल तथा सार्वजनिक सवारीमा टाँसेर भद्र विरोध जनाएका थिए। भारतीय कम्पनी एआइपिएलसँग संयुक्त रुपमा ठेक्का हात पारेको सैलुङ कन्स्ट्रक्सनले अहिले काम गरिरहेको छ।
पासाङ ल्हामु राजमार्गअन्तर्गतको बालाजु-त्रिशूली खण्डको रानिपौवा-पिपलटार सडक निर्माणको ठेक्का दिनेशचन्द्रलाल अग्रवाल, नागर्जुन र कोशी एन्ड न्यौपाने जेभीले पाएका हो। आयोजनाले ठेकेदार कम्पनीसँग जुन २०१५ मा सम्झौता गरेको थियो। सम्झौताअनुसार ३४ किलोमिटरको उक्त सडकखण्ड २०१८ को मार्चमा सकिनुपर्थ्यो। उक्त ठेक्का ४४ करोड ३४ लाख रुपैयाँमा स्वीकृत भएको थियो।
बालाजुदेखि त्रिशूलीसम्मको सडक ७० किलोमिटर रहेको छ। यो सडकको ट्रयाक ३५ मेगावाटको त्रिशूली जलविद्युत् आयोजना निर्माणका क्रममा २०१८ सालमा खुलेको थियो। हाल एक लेन रहेको यो सडक दुई लेनमा विस्तार गर्ने काम भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782224905-1782225890.jpeg)
-1764146706.png)
