काठमाडौं- युरोपा लिग फुटबलमा इंग्लिस क्लब आर्सनल कमजोर अवस्थाबाट खेलमा फर्किंदै अन्तिम १६ मा प्रवेश गरेको छ। पोर्चुगिज क्लब बेनफिकासँग पहिलो लेग १–१ को बराबरी खेलेको आर्सनल दोस्रो खेल ३–२ ले जित्दै समग्र ४–३ को नतिजामा अघि बढेको हो।
बिहीबार राति भएको दोस्रो लेगको खेलमा ८६औँ मिनेटसम्म आर्सनल बाहिरिने स्थिति देखिएको थियो। खेलको २१औँ मिनेटमा आर्सनलका लागि पियर इमिरिक अउबामेयाङले गोल गर्दै अग्रता बनाएका थिए। ४३औँ मिनेटमा बेनफिकाका लागि डिओगो गोन्जाल्भेसले बराबरी गोल फर्काएका थिए।
पहिलो हाफ बराबरी भएको खेलमा ६१औँ मिनेटमा राफा सिल्भाको गोलमा बेनफिकाले अग्रता बढाएको थियो। तर, ६७औँ मिनेटमा कायरन टिएर्नीको गोलमा आर्सनलले बराबरी बनायो। त्यही अवस्थामा समेत आर्सनल अवे गोलका आधारमा पछि परिरहेको थियो। जहाँ अउबामेयाङले नै ८७औँ मिनेटमा गोल गर्दै आर्सनलको जित पक्का गरे।
अउबामेयाङको दोस्रो गोल हुनुअघि सामाजिक सञ्जालमा प्रशिक्षक मिकेल अर्टेटाको विरोधमा ‘अर्टेटा आउट’ को नारा लाग्न सुरु भइसकेको थियो। तर, अउबामेयाङको गोलसँगै आर्सनल समर्थक केही शान्त भए। उनीहरुका स्टार खेलाडीले पुनः एकपटक खेल जोगाए।
गएको सिजन युरोपा लिगमा नै अन्तिम ३२ बाट आर्सनल बाहिरिएको थियो। जतिबेला ग्रिक क्लब ओलम्पियाकससँग पहिलो लेग १–० जितेको आर्सनल दोस्रो लेगमा २–१ ले पराजित भएको थियो। समग्रमा बराबरको अवस्थापछि अवे गोलका आधारमा आर्सनल बाहिरिएको थियो। त्यही अवस्थाको डर यो सिजनमा पनि आर्सनल समर्थकमा देखियो।
इंग्लिस प्रिमियर लिगमा आर्सनल अहिले ११औँ स्थानमा रहेको छ। २५ खेल खेल्दा १० जित, ४ बराबरी र ११ हारसहित आर्सनलको ३४ अंक रहेको छ। जहाँ शीर्षमा रहेको म्यानचेस्टर सिटीको २५ खेलमा नै ५९ अंक रहेको छ।
लिगमा आर्सनलमाथि यो सिजन गएका वर्ष भन्दा विशेष आश राखिएको थियो। तर, त्योअनुसार मैदानमा खेल देखिन सकेको छैन। त्यसमा चोटका कारण अउबामेयाङमा देखिएको समस्याले पनि असर गरेकै छ। उनले लिगमा २१ खेल खेल्दा ८ गोल र एक असिस्ट गरेका छन्। युरोपा लिगमा उनको तीन खेलमा तीन गोल भएको छ। समग्रमा पछिल्ला १२ खेलमा उनले ९ गोल गरेका छन्।
यसैले, प्रशिक्षक अर्टेटाले भनेका छन्, ‘अउबामेयाङमाथि मलाई पूरा विश्वास छ। उनले यस्तै अवसरहरुमा आफूलाई अगाडि बढाउन जरुरी पनि छ, त्यसैअनुसार उनले आफूलाई प्रमाणित पनि गरिरहेका छन्। फुटबलमा राम्रो पक्ष के भने अगाडि बढिरहेको समयमा अवसरहरु गोलमा परिणत पनि हुन्छन्।’
आर्सनलका पूर्वडिफेन्डर मार्टिन कियोन आर्सनलले खेलमा देखाएको जितमा बढ्ने इच्छाको तारिफ गर्दै अहिलेको जस्तो गल्ती दोहोर्याउन नहुने बताउँछन्। दुई लेगमा गरेर बेनफिकाले हानेको तीन गोल नै आर्सनलको कमजोर गल्तीका कारण भएको उनको ठम्याइ छ।
‘आर्सनल आफैले आफ्ना लागि मुस्किल अवस्था बनाएको थियो तर, उनीहरु त्यो कठिन स्थितिबाट बाहिरिन सके। सबैले प्रशिक्षकको अवस्था के होला भन्ने अनुमान गरिरहेका थिए। उनीहरु साच्चै कठिन समयबाट गुज्रिएका हुन्। त्यसमा अर्टेटा आर्सनलको भविष्यका लागि ठीक हुन् त? भन्ने प्रश्न त स्वभाविक उठि नै हाल्छ’ उनले भनेका छन्।
प्रिमियर लिगमा कमजोर भइसकेको आर्सनलका लागि अब अर्को सिजन च्याम्पियन्स लिग पुग्ने गरी खेलमा फर्कन मुस्किल नै छ। त्यसैले यो सिजन आर्सनलको विशेष ध्यान युरोपा लिगमाथि नै हुनेछ। घरेलु लिगको अवस्था बिर्साएर प्रशिक्षक अर्टेटाले आफ्नो उपस्थिति प्रमाणित गर्ने अवसर पनि युरोपा लिगमा हुने जितले नै दिनेछ।
युरोपा लिगको अन्तिम १६ मा आर्सनलसँगै इंग्लिस क्लब टोटनह्याम, म्यानचेस्टर युनाइटेड र लेस्टर सिटीसमेत रहेका छन्। क्रोयसियाको डाएनामो जाग्रेब, चेक रिपब्लिकको स्लाभिया प्राहा, ग्रिक क्लब ओलम्पियाकोस, इटालीको एसी मिलान, रोमा, नेदरल्यान्ड्सको आयाक्स, नर्वेको मोल्ड, स्कटल्यान्डको रेन्जर्स, स्पेनको भिलारियल, ग्रानडा, स्वीट्जरल्यान्डको योङ ब्वाइज साथै युक्रेनको डायनामो किभ र शख्तर डोनेस्क अन्तिम १६ मा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766743671.png)
-1766743434.png)
-1766740258.png)
-1764146706.png)
-1766648928.png)
-1763721444.png)
