काठमाडौं- सशस्त्र प्रहरी बलको एपीएफ क्लबले प्रधानमन्त्री कप राष्ट्रिय पुरुष एकदिवसीय क्रिकेट प्रतियोगिताको फाइनलमा प्रवेश गरेको छ। बुधबार भएको पहिलो सेमिफाइनलमा एपीएफले डिफेन्डिङ च्याम्पियन पुलिस क्लबलाई ३० रनले पराजित गरेको हो।
त्रिवि क्रिकेट मैदानमा सामान्य लक्ष्य पाएपनि पुलिसले भेटाउन सकेन। २०४ रनको चुनौती पछ्याउँदै ब्याटिङ गरेको पुलिसले ४९.२ ओभरमा सबै विकेटको क्षतिमा १७३ रन मात्रै बनाएपछि एपीएफले जित निकालेको हो। पुलिसका पवन सर्राफले ४०, राशिद खानले ३४, दीपेन्द्रसिंह ऐरीले ३३, अनिलकुमार शाहले २१ र आरिफ शेखले १६ रन बनाएपनि जित दिलाउन सकेनन्।
बलिङतर्फ एपीएफका भुवन कार्कीले ९.२ ओभरमा एक मेडनसहित २१ रन खर्चिएर चार विकेट लिए। त्यस्तै, कमलसिंह ऐरी, अविनाश बोहरा र कप्तान शरद भेषवाकरले समान २–२ विकेट लिए।
यसअघि टस हारेर पहिले ब्याटिङ गरेको एपीएफले निर्धारित २० ओभरमा ९ विकेटको क्षतिमा २०३ रन बनाउन सक्यो। एपीएफका लागि शंकर रानाले सर्वाधिक ४४ रन बनाउँदा भुवन कार्कीले ४२, सन्दीप जोराले ३४, सुवाष खकुरेल र कमलसिंह ऐरीले समान १९–१९ रन बनाए।
बलिङतर्फ पुलिसका आरिफ शेखले १० ओभरमा एक मेडनसहित ३१ रन खर्चिएर तीन विकेट लिए। त्यस्तै, ललितनारायण राजवंशी र दीपेन्द्रसिंह ऐरीले समान २–२ विकेट लिए।
दोस्रो सेमिफाइनलमा बागमती प्रदेश र आर्मीबीच बिहीबार (भोलि) फाइनल प्रवेशका लागि प्रतिस्पर्धा हुनेछ। फाइनल खेल शनिबार त्रिवि क्रिकेट मैदानमा हुनेछ।
प्रतियोगिताको विजेताले १० लाख रूपैयाँ नगद पाउने छ। त्यस्तै, उपविजेताले पाँच लाख रूपैयाँ पाउनेछ। यसअघिसम्मको तीन संस्करणमा प्रधानमन्त्री कपको विजेताले २० लाख र उपविजेताले १० लाख पाउँदै आएको थिए।
तर, अन्तर्राष्ट्रिय क्रिकेट परिषद् (आईसीसी) को निलम्बनबाट फुकुवा भएर आएपछि चौंथो संस्करणदेखि प्रधानमन्त्री कपको आयोजना गर्न पाएको नेपाल क्रिकेट संघ (क्यान)ले पुरस्कार राशी आधा घटाएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769166231.png)
-1769158577.png)
-1769161919.png)
-1764146706.png)
