काठमाडौं- प्रधानमन्त्री कप पुरुष राष्ट्रिय एकदिवसीय क्रिकेट प्रतियोगितामा प्रदेश नम्बर १ ले कर्णाली प्रदेशलाई ५९ रनले हराएको छ। २१६ रनको लक्ष्य पछ्याएको कर्णालीले ३५ ओभरमा १५६ रन बनाउँदा सबै विकेट गुमायो। प्रतियोगिताबाट बाहिरिसकेको प्रदेश १ ले अन्तिम खेलमा मिनाश थापाको पाँच विकेटको मद्धतमा सान्त्वना जित निकाल्यो।
कीर्तिपुर मैदानमा भएको खेलमा कर्णालीका लागि रविन्द्र शाहीले ३२ बलमा १८ रन, विपिन रावलले ३४ बलमा ४७ रन, निश्चल रावलले ४७ बलमा ३१ रन, हेमन्त वलीले १२ बलमा ४ रन, हिमांशु शाहीले २५ बलमा ७ रन साथै दिनेश अधिकारीले १६ बलमा ११ रन बनाए।
प्रदेश नम्बर १ का मिनाश थापाले पाँच, दिपेश कँडेलले तीन साथै मनोज तामाङले दुई विकेट लिए।
यसअघि टस जितेर पहिले ब्याटिङ रोजेको प्रदेश नम्बर १ ले पूरा ५० ओभर खेल्दै ९ विकेट जाँदा २१५ रन बनाएको थियो। जसमा श्रवण यादवले ५७ बलमा १७ रन, मिनाश थापाले २३ बलमा २५ रन, सिद्धान्त लोहनीले ९७ बलमा ६६ रन, फिर्दोष अन्सारीले ४६ बलमा १७ रन, शुभांकर उरावले २८ बलमा ३६ रन बनाएका थिए।
कर्णाली प्रदेशका लागि रविन्द्र शाहीले तीन, दिनेश अधिकारी र अनुज चुनाराले दुई दुई साथै दिवान पुन र राज शाहले एक एक विकेट लिएका थिए।
यसअघि प्रदेश १ त्रिभुवन आर्मी क्लबसँग ४ विकेटले, गण्डकी प्रदेशसँग २ विकेटले साथै एपिएफसँग १३५ रनले पराजित भएको थियो। यस्तै प्रदेश १ सँग तेस्रो खेल हारेको कर्णाली प्रदेशले गण्डकीलाई ५ विकेटले हराएको थियो भने आर्मीसँग ८० रनले पराजित भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
