काठमाडौं- संवैधानिक परिषद्को नियूक्तिका विषयमा नेपाल कम्युनिस्ट पार्टीका अध्यक्ष एवम् प्रधानमन्त्री केपी शर्मा ओली र अर्का अध्यक्ष पुष्पकमल दाहाल‘प्रचण्ड’बीच सहमति हुन नसक्दा लामो समयदेखि रिक्त पदपूर्ति हुन सकेको छैन।
दुई अध्यक्षबीच सहमति हुन नसकेपछि संवैधानिक परिषद्(काम,कर्तव्य अधिकार र कार्यविधि) अध्यादेश २०७७ ओलीले जारी गरेका छन्। यही विषयलाई लिएर बुधबार बस्ने स्थायी कमिटी बैठकमा विवाद चर्किने देखिएको छ। एकपछि अर्को विवाद थपिँदै जाँदा पार्टी विभाजनको अवस्था आउन सक्ने विश्लेषण गर्न थालिएको छ। यसै विषयमा केन्द्रित भई नेकपा प्रमुख सचेतक देव गुरुङसँग नेपाल लाइभले गरेको संक्षिप्त कुराकानीको सारांश:
संवैधानिक नियुक्तिसम्बन्धी अध्यादेश आएपछि के भन्न चाहनुहुन्छ?
अध्यादेश जारी गर्ने लामो समयदेखि कोशिस भइरहेको थियो। प्रधानमन्त्रीसँग जोडेर मैले मिडियासँग ठ्याक्कै केही भनेको छैन। यी विषय व्यक्तिगत रूपमा जोडिएको विषय पनि होइन। अहिले नेकपामा वैचारिक बहस चलिरहेको छ। त्यसैमा बहस गरिरहेका छौँ।पार्टी लाइनको पोइन्ट अफ भ्यूबाट हेर्दा सर्वसत्तावादी‚ एकाधिकारवादी र निषेधवादी चिन्तन रहिरहँदासम्म त्यसले डेमोक्रेसी सामूहिकतालाई मान्दैन। त्यसले पार्टी कमिटीको निर्णयलाई पनि मान्दैन। पार्टी विधानलाई पनि मान्ने कुरा भएन। पार्टीले गरेका निर्णय कार्यान्वयन गर्ने कुरा त परको भयो। यो स्वतः विचारको श्रृंखलामा आउने कुरा भए। अरु त्यसमा अरु केही होइन।
तपाईंलाई व्यक्तिगत रुपमा प्रधानमन्त्रीज्यूले राजीनामा माग्नुभएको हो?
मैले व्यक्तिगत रुपमा त्यो बोलेको कुरा होइन। मैले केही भनेको पनि छैन। त्यो विषयमा मैले मिडियामा पनि केही भनेको छैन। थाहा भएन। फरक मत राख्नेहरुले स्वतःनिषेध गर्छन्। त्यो शासनको मनोविज्ञानको कुरा हो।
अब अध्यादेश आएपछि के हुन्छ?
अध्यादेशको विषयमा पार्टी कमिटीमा छलफल होला। सदन चालू हुने समय पनि आइसक्यो। हिउँदे अधिवेशन डाक्ने बेला भइसक्यो। अधिवेशन नबोलाउने अध्यादेशको प्रक्रियाबाट जाने भनेको संसदीय अभ्यासका दृष्टिकोणले पनि गैरसंवैधानिक भयो। यस्तो गर्नु संसदीय अभ्यासको विपरीत हो। कतिपय जरुरी भएका विषयको अध्यादेश जारी गर्न सकिँदैन भन्ने हुँदैन। तर यो अध्यादेशको विषय त्यति जरुरी विषय पनि होइन।
प्रधानमन्त्रीको यस्तो खालको व्यवहारले के सर्वसत्तावादतिर उद्धृत भएको हो?
त्यो सर्वसत्तावादतिर उद्त छन्/छैनन् व्यक्तिगत रुपमा कसैको टिकाटिप्णी गर्न चाहन्न। चिन्तन र प्रवृत्तिगत रुपमा हेर्नुपर्छ। एकाधिकारवादी प्रवृत्ति, अलोकतान्त्रिक चिन्तन र प्रवृत्तिलाई हेर्नुपर्ने हुन्छ। हामीले घटनाक्रमलाई हेर्ने हो। को पात्र र प्रवृत्ति भन्नेतिर जानु हुँदैन। विचारमा फेरि अदलबदल भइरहन्छ। त्यो बहसको विषय होइन। अबको बहसको विषय कुन विचार ठिक हो र कुन विषय ठिक होइन भन्ने हो।
प्रधानमन्त्रीले एकपछि अर्को गर्दै विवाद सिर्जना गरिरहनुभएको छ‚ अब कसरी अगाडि बढ्नुहुन्छ?
स्थायी कमिटी बैठक चलिरहेको छ। बैठकमै छलफल भई कमिटीले निर्णय गर्ने कुरा हो। पार्टी कमिटीमा त्यो विषयमा गम्भीर छलफल हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1677243823-1775234234-1789571125.jpg)
-1786602170.png)
