नयाँ दिल्ली- भारतीय अभिनेता रजनीकान्तले जनवरी २०२१मा आफ्नो राजनीतिक पार्टी सुरु गर्ने घोषणा गरेका छन्। उनको पार्टीले तमिलनाडु विधान सभाका लागि चुनाव लड्ने घोषणासमेत गरेको छ। उनका समर्थकहरु ९० को दशकदेखि यो घोषणाको पर्खाइमा थिए। रजनीकान्तको राजनीतिक रुचिका बारेमा तमिलनाडुका मानिसहरुले पहिलो पटक सन् १९९६ मा थाहा पाएका थिए। उक्त समयमा जयललिता तमिलनाडुकी मुख्यमन्त्री थिइन्। उनका छोरा विएन सुधाकरणको वैवाहिक सम्बन्धमा गरिएको अत्यधिक खर्चले चर्चा र आलोचना दुवै खेप्नुपरेको थियो जयललितालाई।
रजनीकान्तले उक्त समयमा खुलेरै सरकारमा धेरै भष्टाचार रहेको भन्दै आलोचना गरेका थिए। यस्ता प्रकारका सरकार सत्तामा रहनुहुँदैन भन्दै उनले जनताको कर दुरुपयोग रोक्नुपर्ने बताएका थिए। यही वर्ष उनले पहिलो पटक राजनीतिक विषयमा टिप्पणी गरेका थिए। एमजीआर कडगम पार्टीका नेता आएम बीरप्पनको उपस्थितिमा एक समारोहमा रजनीकान्तले तमिलनाडुमा ‘बम कल्चर’का बारेमा कुरा गरेका थिए।
उनले सो अवसरमा तमिलनाडुमा फैलिएको ‘बम कल्चर’को जिम्मेवारी राज्य सरकारले लिनुपर्ने बताएका थिए। सन् १९९६मा मुपनारले कांग्रेस छाडेर तमिल मनीला कांग्रेस नामक पार्टी बनाए। उक्त समय केन्द्रमा कांग्रेसका पिभी नरसिंह राव नेतृत्वमा थिए। कांग्रेस पार्टीले तमिलनाडुमा एआइएडीएमकेसँग गठबन्धन बनाएको थियो। यसको विरोधमा मुपनारले आफ्नै मनीला कांग्रेस पार्टी बनाए, जसले डिएमकेसँग गठबन्धन गर्यो।
चुनावमा समर्थन
रजनीकान्तले यो गठबन्धनको खुलेर सर्मथन गरे। उनले कुनै पार्टीलाई खुलेर समर्थन गर्ने घोषणा गरेको यो नै पहिलो घटना थियो। एआइएडिएमके सरकारकाप्रति आम मानिसको आक्रोश उक्त समयमा देखिएको थियो। यसको फाइदा डिएमके गठबन्धनलाई भयो। उक्त गठबन्धन भारी मतले निर्वाचन जित्न सफल पनि भयो र सत्तामा आयो। यो जितमा रजनीकान्तको सर्मथनको ठूलो हात भएको चर्चासमेत गर्ने गरिन्छ।
उनका फ्यानहरुले डिएमके गठबन्धनको समर्थनमा र मुपनारको पार्टीका उम्मेदवारहरुलाई जिताउन सहयोग गरे। सन् १९९८मा पनि रजनीकान्तले संसदीय निर्वाचनमा डिएमके गठबन्धन र मुपनर पार्टीको उम्मेदवारलाई समर्थन गरे। तर यो निर्वाचनमा उनलाई पहिलेजस्तो समर्थन आएन। एआइएमडिएमके गठबन्धनले यो पटक भारी बहुमत ल्याउन सफल भयो।
यसपछि रजनीकान्तले विस्तारै सत्तारुढ एआइएमडिएमके पार्टीको आलोचना गर्न कम गर्न थाले। पुनः सन् २००२ मा कावेरी जल विवाद चरम रुपमा थियो। केही राजनीतिक दलहरुले रजनीकान्त कर्नाटकबाट आएकाले यसमा कुनै पनि राय नराखेको आरोप लगाए। यो आरोपपछि रजनीकान्तले तमिलनाडु फिल्म उद्योगका तर्फबाट आयोजना गरिएको भोक हड्तालमा भाग लिए र उनको समर्थन तमिलनाडुका मानिसका लागि रहेको घोषणासमेत गरे।
उनले यो मुद्दा अघि बढाउनका लागि आफ्नो तर्फबाट एक करोड रुपैयाँ दान दिने घोषणा समेत गरे। सन् २००४ मा जब बाबा फिल्म बन्यो यसमा रजनीकान्तलाई धार्मिक नेतृत्व र राजनीतिमा प्रवेश गरेको नायकको रुपमा देखाइयो। तर डा रामदास नेतृत्वको पिएमके पार्टीले यसको स्क्रीनिङ्गमा अवरोध गरे। कयौं स्थानमा यो पार्टीका कार्यकर्ता र रजनीकान्तका समर्थकका विचमा झडपसमेत भयो। रजनीकान्त चेन्नइको राघबेन्द्र म्यारिज हलमा आफ्ना फ्यानहरुसँग बसेर पिएमकेलाई भोट नदिन खुलेआम लविङमा समेत उत्रिए। तर यसको असर भने पिएमकेका उम्मेदवारला परेन।
त्यसपछि रजनीकान्त राजनीतिक दख्खल र राजनीतिक राय दिनबाट पछि हट्न थाले। तर सन् २००४,२००६ र २००८ को प्रत्येक पत्रकार सम्मेलनमा राजनीतिक अवस्थाका बारेमा उनलाई प्रश्न सोधियो। उनले सधैँ सिधा जवाफ दिएनन्। समय आओस्, समयले नै हामीलाई जवाफ दिनेछ। म पनि जवाफ दिनेछु भन्दै टार्दैै हिँडे। यस्तै टिप्पणीका बीच उनका शुभचिन्तकहरूले रजनीकान्त राजनीतिमा आउने पर्खाइमा ६ वर्ष बिताए। फेरि सन् २०१४ मा नेसनल डेमोक्रेटिक एलाइन्सले संसदीय निर्वाचनमा नरेन्द्र मोदीको नाम प्रधानमन्त्रीमा अघि बढायो।
मोदीले चेन्नईमा रजनीकान्तको निवासमा पुगेर भेट गरे। यो भेटपछि उनले मोदी एक महान नेता भएको प्रतिक्रिया दिए। उनले कुनै पनि समयमा भारतीय जनता पार्टीको नाम भने लिएनन्। सन् २०१४ मा तत्कालीन मुख्यमन्त्री जयललितालाई गैरकानुनी रुपमा सम्पत्ति आर्जन गरेको अभियोगमा १४ वर्षको जेल सजाय भयो, त्यो समयमा उनलाई सोधिएको प्रश्नमा उनको एकमात्र प्रतिक्रिया थियो ‘ह्याप्पी’।
करुणानिधि र जयललिताको निधन
पाँच डिसेम्बर २०१७ मा जयललिताको निधन भयो। तमिलनाडुका अर्का चर्चित नेता करुणनिधिको स्वास्थ्यमा समस्या देखियो। उनी सक्रिय राजनीतिबाट बाहिर बसे। ७ अगस्ट २०१८मा उनको निधन भयो। निधनअघि ३१ डिसेम्बर २०१७ मा रजनीकान्तले करुणानिधिसँग राजनीतिमा आउनेबारे छलफल गरेका थिए।
करुणानिधिसँगको भेटपछि उनले राजनीतिका बारेमा छलफल भएको पत्रकारलाई बताएका थिए। करुणानिधिले उनलाई राजनीतिका लागि शुभकामना दिएको पनि बताएका थिए। उक्त समयमै अब सक्रिय राजनीतिमा आउने संकेत गरेका थिए। तर समय बित्दै गयो। उनी मौन नै बसे। सन् २०१९ मा उनीमाथि फेरि कुन राजनीतिक दलमाथि उनको समर्थन छ भनी सोधियो। उनले कुनै पनि दल र पार्टीको समर्थन नगर्ने र उनको फ्यान क्लब निर्वाचनमा भाग नलिने बताए।
उनले २०२१ मा तमिलनाडुको आगामी विधान सभा निर्वाचनमा भाग लिई सबै क्षेत्रमा उम्मेदवार उठाउने घोषणा गरेका छन्। उनको यो घोषणापछि उनी वरिपरी पार्टीका केही गतिविधि देखिएन र राजनीतिक दलहरुले उनको आलोचना गरे। तमिलनाडुका मुख्यमन्त्री इके पलानीसामी, राज्यमन्त्री, बिजेपी नेता र डिएमके नेताले रजनीकान्तले पार्टी बनाउन दिउँ अनि कुरा गरौँला भन्नेजस्ता अभिव्यक्ति दिइरहे। पार्टी बनाउने अधिकार सबैलाई भएकाले रजनीकान्तले पनि आफ्नो छुट्टै पार्टी बनाउन सक्ने टिप्पणी उनीहरूले गरे।
तमिलनाडुका केही मन्त्रीहरुले त बच्चा जन्मनुअघि नै रजनीकान्तले न्वारन गरेको टिप्पणीसमेत गर्न भ्याए। सन् १९९१मा राजनीतिक रुचीमा रजनीकान्तको जुन यात्रा सुरु भयो‚ त्यो परिपक्व र आधिकारीक घोषणा हुन २०२० सम्मको समय लाग्यो। अब उनले तय गर्ने राजनीतिक यात्राले उनको भविष्य बताउनेछ।
बिबिसी हिन्दीबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
