काठमाडौं- प्रधानमन्त्री तथा मन्त्रिपरिषद्को कार्यालयले राष्ट्रिय गौरवका २४ आयोजना सम्पन्न हुने संशोधित मिति तय गर्दै त्यसअनुसार काम गर्न सबै मन्त्रालयलाई निर्देशन दिएको छ। विगत वर्षहरूमा नै सम्पन्न हुनुपर्ने ती आयोजनाको काम अहिलेसम्म पनि पूरा भएको छैन। राष्ट्रिय गौरवका घोषणा गरेको १ दशक हुँदा पनि एउटा आयोजनाको काम सम्पन्न हुन नसकेको हो।
राष्ट्रिय गौरवका आयोजनामध्ये ४ वटा आयोजनाको काम यसै वर्ष सकिने लक्ष्य निर्धारण गरिएको छ। प्रधानमन्त्री कार्यालयका अनुसार राष्ट्रिय गौरवको सिक्टा सिँचाइ आयोजना, माथिल्लो तामाकोशी जलविद्युत आयोजना, मेलम्ची खानेपानी आयोजनाको पहिलो चरण र गौतम बुद्ध अन्तर्राष्ट्रिय विमानस्थलको काम यसै वर्ष सकिने लक्ष्य तय गरिएको छ।
चालु आर्थिक वर्षको बजेटबाट प्रस्तावित महाकाली सिँचाइ आयोजना र रेल तथा मेट्रोरेल आयोजनाको सम्पन्न हुने मिति यकिन छैन। महाकालीका लागि चालु वर्षमा नै बजेट विनियोजन गरिएको छ भने रेलवे आयोजनाको काम अघि बढ्न सकेको छैन। पूर्व-पश्चिम र उत्तर दक्षिण रेल निर्माणको काम अघि बढाउने घोषणा बजेटमा आएको भए पनि काम अघि बढेको छैन।
प्रधानमन्त्री कार्यालयका अनुसार राष्ट्रिय गौरवका रानी जमरा कुलरिया सिँचाइ आयोजना आर्थिक वर्ष २०८०/०८१ भित्र सम्पन्न गर्ने लक्ष्य राखिएको छ। यसैगरी बबई सिँचाइ आयोजना र भेरी बबई डाइभर्सन बहुद्देश्यीय आयोजना (४८ मेगावाटको विद्युत आयोजनासमेत) आर्थिक वर्ष २०७९/०८० भित्र सम्पन्न गर्ने लक्ष्य राखिएको छ। सुनकोशी मरिन सिँचाइ आयोजना आर्थिक वर्ष २०८०/०८१ मा सम्पन्न गर्ने लक्ष्य राखिएको प्रधानमन्त्री कार्यालयले जानकारी दिएको छ।
जलविद्युततर्फ मिलेनियम च्यालेन्ज कर्पोरेसन (एमसिसीको सहयोगमा बन्ने विद्युत प्रसारण आयोजनाको काम २०८१/०८२ भित्र सम्पन्न हुने जनाइएको छ। यसअन्तर्गत काठमाडौंको लप्सीफेदीदेखि नुवाकोट हुँदै बुटवलसम्म एउटा प्रसारण लाइन र हेटौंडासम्म दोस्रो प्रसारण लाइन तथा केही सबस्टेसन बन्नेछन्।
१२ सय मेगावाट क्षमताको बुढीगण्डकी जलविद्युत आयोजनाको काम आर्थिक वर्ष २०८३/०८४ भित्र सम्पन्न गर्ने गरी मिति तय गरिएको छ। तर यो आयोजना निर्माणको मोडालिटी नै टुंगो लागेको छैन। पश्चिम सेती यसअघि नै अनिश्चित बनेको छ।
प्रधानमन्त्री कार्यालयका अनुसार १८७९ किलोमिटर लम्बाइको पुष्पलाल मध्यपहाडी लोकमार्ग आर्थिक वर्ष २०७९/०८० मा सम्पन्न गर्ने लक्ष्य राखिएको छ। हुलाकी मार्ग पनि आर्थिक वर्ष २०७९/०८० भित्र सक्ने लक्ष्य राखिएको छ। यो आयोजनाको कुल लम्बाइ १ हजार ७ सय ९२ किलोमिटर छ।
नेपाली सेनाले अघि बढाइरहेको काठमाडौं-तराई-मधेस द्रुतमार्ग आर्थिक वर्ष २०८०/०८१ भित्र सक्ने लक्ष्य राखिएको छ। साढे ७२ किलोमिटर लामो यो आयोजनाभित्र पर्ने पुलको काम सुरु भएको छैन। जसका कारण तोकिएको मितिमा सम्पन्न हुनेमा शंका छ।
उत्तर-दक्षिण नदी करिडोरमा तीनवटा आयोजना अघि बढेका छन्। १६२ किलोमिटर लामो कोशी करिडोरको काम आर्थिक वर्ष २०८०/०८१ भित्र सक्ने लक्ष्य राखिएको छ। त्यस्तै २८४ किलोमिटर लामो कर्णाली करिडोरको काम आर्थिक वर्ष २०७९/०८० भित्र सक्ने लक्ष्य तोकिएको छ। नदी करिडोरका तीन आयोजनामध्ये यो आयोजनाको काम सुस्त छ।
उत्तर-दक्षिण लोकमार्गअन्तर्गत कालीगण्डकी करिडोरको काम तीव्र गतिमा अघि बढेको छ। यो आयोजनाअन्तर्गत गैंडाकोट-राम्दी-मालढुंगा खण्डको काम आर्थिक वर्ष २०८०/०८१ भित्र सक्ने लक्ष्य तोकिएको छ। यसैगरी बेनी-जोमसोम-कोरोला खण्डको काम आर्थिक वर्ष २०७९/०८० भित्र सक्ने लक्ष्य राखिएको छ।
बारामा निर्माण हुने निजगढ अन्तर्राष्ट्रिय विमानस्थल आर्थिक वर्ष २०८५/०८६ भित्र सक्ने लक्ष्य राखिएको छ। पोखरा क्षेत्रीय अन्तर्राष्ट्रिय विमानस्थलको काम आर्थिक वर्ष २०७९/०८० भित्र सक्ने लक्ष्य राखिएको छ।
त्यसैगरी राष्ट्रपति चुरे संरक्षण कार्यक्रम आयोजनाको काम आर्थिक वर्ष २०९३/०९४ मा सक्ने लक्ष्य राखिएको छ। पशुपति क्षेत्र विकास कोष र लुम्बिनी विकास कोषको काम आर्थिक वर्ष २०७८/०७९ भित्र सक्ने लक्ष्य राखिएको छ।
सरकारले पूर्वाधार विकासका लागि उच्च प्राथमिकता दिन राष्ट्रिय गौरवका आयोजना घोषणा गरेको थियो। तत्कालीन प्रधानमन्त्री डा बाबुराम भट्टराईले आर्थिक वर्ष २०६८/६७ मा राष्ट्रिय गोरवका आयोजना छनोट गरि निर्माणलाई प्राथमिता दिन सुरु गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
