रिपब्लिकन पार्टीका राष्ट्रपति डोनाल्ड ट्रम्पलाई डेमोक्रेटिक पार्टीका राष्ट्रपति पदका उम्मेदवार जो बाइडेनले अमेरिकी राष्ट्रपतिको निर्वाचनमा चुनौती दिइरहेका छन्।
बुधबार राष्ट्रपति ट्रम्प र उनका प्रतिस्पर्धी बाइडेनका बीच वादप्रतिवाद भएको छ। उक्त वादप्रतिवादमा दुवैले व्यक्तिगत लञ्छना लगाउनेदेखि अमेरिकामा घटिरहेका घटनाहरूको चर्चा गरेका छन्।
उनीहरूको यो जुहारीलाई बिबिसीले ‘बिटर ह्वाइट हाउस डिबेट’को संज्ञा दिएको छ।
दुवै प्रतिद्वन्द्वीले स्वास्थ्य, न्याय, नस्लीय भेदभाव र अर्थव्यवस्था जस्ता फरक मुद्दामा आधारित भएर वादप्रतिवाद गरेका थिए। त्यही क्रममा दुवैजना एकअर्काप्रति तीखो हमला समेत गर्न पछि परेनन्।
वादप्रतिवादका क्रममा जब जो बाइडेनले देशमा चलिरहेको महामारी‚ स्वास्थ्यसेवा र अर्थतन्त्रको बारेमा कुरा निकाले त्यसबेला ट्रम्पले बाइडेनलाई ‘सट अप’ अर्थात् चुप लाग्नुस् भन्ने शब्द प्रयोग गरेका छन्।
कोभिड-१९ महामारीको विषयमा सोधिएको प्रश्नमा ट्रम्पले जो बाइडेन यदि आफ्नो ठाउँमा भएको भए अमेरिकामा तुलनात्मक रूपमा धेरै मानिसको मृत्यु हुने आरोप लगाए भने त्यसको जवाफमा बाइडेनले यस्ता किसिमका महामारीसँग लड्नका लागि ट्रम्पसँग कुनै पनि पूर्वयोजना नभएको बताएका थिए।
अमेरिकामा अहिलेसम्म ७० लाखभन्दा बढी कोभिड-१९ का संक्रमितहरू छन् भने तीमध्ये करिब २ लाख व्यक्तिले ज्यान गुमाइसकेका छन्।
बाइडेनले कोरोना भाइरसको महामारीलाई नियन्त्रण गर्नका लागि ट्रम्प प्रशासन असक्षम रहेको भन्दै उनको आलोचना गरेका थिए भने त्यसको जवाफमा राष्ट्रपति ट्रम्पले उक्त माहामारी नियन्त्रण गर्न सरकार सफल भएको बताएका थिए।
उनले भने‚ ‘हाम्रो सरकार कोरोना भाइरससँग लड्नका लागि मास्क, पिपिई किट र औषधिलाई पर्याप्त मात्रामा संक्रमितसम्म पुर्याएको छ। कोरोना भ्याक्सिन समेत केही महिनाभित्रै आउनेछ। भ्याक्सिन बनाउने कम्पनीसँग पनि मेरो कुरा भइरहेको छ।’
यसै सन्दर्भमा ट्रम्पले भारत, रूस र चीनले कोरोना संक्रमणबाट मृत्यु हुनेहरूको वास्तविक आँकडा लुकाएको आरोप लगाए। दुवै नेताले एकअर्काप्रति मास्कदेखि भ्याक्सिन र भौतिक दूरीसम्मका मुद्दामा रहेर वादप्रतिवाद गरेका थिए।
बाइडेनले ट्रम्पलाई मास्कको प्रयोगमा गम्भीर नभएको आरोप लगाए भने त्यसको प्रत्युत्तरमा ट्रम्पले बाइडेनको मजाक उडाउँदै भने‚ ‘बाइडेन २ सय फीट पर बस्दा पनि फराकिलो मास्क लगाएर आउने गर्छन्।’
वादप्रतिवादको होस्ट गरेका क्रिस ब्यालेसले कोरोना महामारीको बीचमा पनि भीडभाडपूर्ण सभा किन गरेको भनी ट्रम्पलाई प्रश्न गरेका थिए। यसको जवाफमा ट्रम्पले भने‚ ‘यदि बाइडेनले त्यति भीड जुटाउन सक्थे भने यिनले पनि पक्कै यस्तै गर्ने थिए।’
बाइडेनले चुट्की बजाउँदै ट्रम्पलाई कटाक्ष गर्दै भने, ‘तपाईं आफ्नो पाखुरा ब्लिचको भ्यक्सिन लगाउनुस् ताकी कोरोना निको होस्।’
ट्रम्पले बाइडेनसँग कटाक्ष गर्दै यदि बाइडेन आफ्नो ठाउँमा हुन्थे भने कोभिड-१९ का कारण २ करोड मानिसको मृत्यु हुने आरोप लगाए। त्यही बेला बाइडेनले ट्रम्पलाई ढटुवाको संज्ञा दिए।
यो डिबेटमा धेरै ठाउमा एकअर्काले विभिन्न आक्षेपहरू लगाएका थिए। दुवैले एकअर्कालाई ‘सटअप’ भन्दै आफ्नो बचाउमा उत्रिएका थिए। केही मुद्दामाथि बहस चलिरहँदा एकअर्कालाई गाली गर्ने शिलशिला यतिसम्म चल्यो कि होस्ट क्रिस वालेसले दुवैलाई ‘स्टप टकिङ’ अर्थात् चुप लाग्नुस् भन्नु परेको थियो।
यतिमात्रै होइन ट्रम्प र बाइडेनले एकअर्कालाई धेरैपटक कटाक्ष गरेका थिए। ट्रम्पले आफैंलाई अमेरिकी इतिहाँसको अहिलेसम्मको सफल र राम्रो राष्ट्रपति भएको दाबी गरे भने त्यसको प्रत्युत्तरमा बाइडेनले ट्रम्प अमेरिकी इतिहाँसकै सबैभन्दा खराब राष्ट्रपति भएको आरोप लगाए। बाइडेनले भने‚ ‘सबैलाई थाहा छ कि तपाईं एक ढँटुवा मान्छे हो।’
डिबेटकै क्रममा बाइडेनले प्रयोग गरेको शब्द ‘स्मार्ट’लाई लक्षित गर्दै ट्रम्पले भने‚ ‘मेरा अगाडि स्मार्ट भन्ने शब्द प्रयोग नगर्नुस्।’
कोरोना भाइरसको संक्रमणलाई मध्यनजर गर्दै दुवै प्रतिद्वन्द्वीहरूले हात मिलाएनन्। डिबेट ओहायोको क्लिभल्यान्डमा भएको थियो। भौतिक दूरी कायम गर्नुपर्ने भएकाले सीमित मानिसलाई डिबेटमा आउनका लागि अनुमति दिइएको थियो।
डिबेटको सुरूवातमा होस्ट क्रिस भ्यालेसले दुवै प्रतिद्वन्द्वीसँग अमेरिकी सर्वोच्च अदालतका लागि चुनिने भनिएका न्यायाधीशको नामांकनको विषयलाई लिएर प्रश्न उठाएका थिए।
जो बाइडेन पूर्वअमेरिकी राष्ट्रपति बाराक ओबामा राष्ट्रपति पदमा उठ्दा उपराष्ट्रपति पदका लागि उम्मेदवार भएका थिए। बाइडेन अमेरिकी राजनीतिमा सन् १९७० देखि नै सक्रिय रहँदै आएका छन्।
विभिन्न कम्पनीहरूले गरेको अनुसन्धानमा १० जना अमेरिकी मतदातामध्ये १ जनालाई मतदान कसरी गर्ने भन्नेबारे सिकाउनुपर्ने अवस्था छ।
एजेन्सीहरूको सहयोगमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786461863.jpg)
-1786461424.png)
-1786458626.jpg)
-1764146706.png)
-1786437116.jpg)
-1786184812.png)
