फाइल तस्बिर
काठमाडौं- मंगलबार बिहान पौने १ बजे राप्रपा अध्यक्ष कमल थापाले ट्विट गरे- 'धर्म/संस्कृतिविरुद्धको आक्रमण, ब्रम्हलुट र सर्वसत्तावाद परास्त गरी समृद्ध नेपाल बनाउन देशले वैकल्पिक विचार बोकेको शक्ति खोजेको छ। यही आवश्यकता पूरा गर्न राप्रपाको एकता भएको हो। मतभेद/चित्त नबुझेका कुरा सहमतिबाट टुंग्याउन सकिन्छ, सार्वजनिक बहसको बिषय नबनाऔॅ।'
थापाले राप्रपाकै अन्य दुई अध्यक्षहरु (पूर्व राप्रपा संयुक्तका अध्यक्षद्वय पशुपतिशमशेर राणा र प्रकाशचन्द्र लोहनी) लाई मेन्सन गर्दै उक्त कुरा लेखेका थिए। त्यसको केही बेरअघि पनि उनले लेखेका थिए- 'डा प्रकाशचन्द्र लोहनीले एक टिभी अन्तर्वार्ताको माध्यमबाट पार्टी एकताबारे एकपक्षीय रूपमा जुन भ्रम सिर्जना गर्ने प्रयास गर्नु भएको छ, त्यो पार्टी एकताको भावनाविपरीत छ। एकता खल्बल्याउने मनसायबाट अभिप्रेरित देखिन्छ।'
सोही दिन बेलुका साढे ४ बजे प्रकाशचन्द्र लोहनीले ट्विटबाटै कमल थापालाई जवाफ फर्काए-'चित्त नबुझेका कुरा सहमतिबाट टुंग्याउने काम गरौं भन्ने कमल थापाजीको ट्विट पढें। मेरो पनि यही भावना हो। समर्थन छ।'
राप्रपाका नेताहरुले केही दिनभित्रै पार्टी एकताले पूर्णता पाउने दाबी गरेको लामो समय भइसक्यो। तर निकट समयमै त्यसले निष्कर्ष पाउने संकेत देखिँदैन। बरु, पार्टीका दुई अध्यक्षबीच सामाजिक सञ्जालमा खुबै घोचपेच हुने र 'बतासे' चल्ने गरेको छ। उल्लेखित ट्विटहरु त्यसकै संकेत हो।
राप्रपाका तीन अध्यक्षहरु पशुपति शमशेर राणा, प्रकाशचन्द्र लोहनी र कमल थापामध्ये लोहनी र थापा सामाजिक सञ्जालमा अलि बढी सक्रिय छन्। अन्य विषयका अतिरिक्त उनीहरु आफ्नो पार्टीका विषयमा पनि लेखिरहेका हुन्छन्। उनीहरुको स्टाटस/ट्विटले पार्टीभित्रको आन्तरिक विवादलाई संकेत गर्छन्। जसले पार्टी एकताप्रति कार्यकर्तामा आशंका बढाइदिने गरेको छ।
राप्रपा एकताले पूर्णता नपाउनुमा मुख्यगरी दुई कारण छन्। पहिलो, एकीकृत पार्टी दर्ता गर्नुपर्छ कि पर्दैन? दोस्रो, चुनाव चिह्न गाई कि हलो?
पार्टी एकताको घोषणापछि कमल थापा पक्षधरले नयाँ पार्टीलाई निर्वाचन आयोगमा दर्ता गर्नु नपर्ने तर्क राख्ने गरेका छन्। अहिले पनि उनीहरुमा त्यो मान्यता पाइन्छ। किनकि, एकीकृत पार्टीको नाम पनि कमल थापा नेतृत्वको पुरानै पार्टीको नाम राष्ट्रिय प्रजातन्त्र पार्टी नै छ। अघिल्लो हप्ता नेपाल लाइभसँग थापा पक्षका नेता मोहन श्रेष्ठले भनेका थिए- ‘राप्रपा भन्ने पार्टी पहिले नै निर्वाचन आयोगमा दर्ता छँदैछ। नयाँ राप्रपा फेरि दर्ता गर्नुपर्दैन भन्ने हाम्रो मान्यता हो।‘
थापा पक्षधरको यस्तो तर्कलाई लोहनीले सामाजिक सञ्जालबाटै प्रतिवाद गर्दै आएका छन्। सार्वजनिक रुपमा पनि बोलिरहेका छन्।
गत अगस्ट ३१ मा कमल थापाले फेसबुकमा लेखे- '२०७६ फागुन २४ गते राप्रपा र राप्रपा(संयुक्त)का बीच एकीकरण आधारपत्रमा त्रय अध्यक्षद्वारा हस्ताक्षर भई फागुन २९ गते औपचारिकरूपमा एकता घोषणा भइसकेको छ। त्यसको जानकारी निर्वाचन आयोगलाई दिईसकिएको छ। चुनावचिह्न सहमतिबाट टुंग्याइने छ। पार्टी एकताबारे आशंका र विवाद गर्नुपर्ने कुनै कारण छैन।'
थापाले स्टाटस लेखेको केही बेरपछि नै अर्का अध्यक्ष प्रकाशचन्द्र लोहनीले लेखे- 'राप्रपा (संयुक्त) र राप्रपाबीच एकता आजको आवश्यकता हो। यसलाई मूर्तरुप दिन निर्वाचन आयोगमा विधिपूर्वक दर्ता गर्नुपर्दछ। यो काममा ढिलाई नगरौं।'
पार्टीभित्र विवादको रहेको विषयमा रहेको चुनाव चिह्नलाई पनि दुई नेताले प्रतिष्ठाको विषय बनाएको पाइन्छ।
अगस्ट १८ मा कमल थापाले ‘म दबाबमा काम गर्दिनँ सबैलाई थाहा छ’ भन्दै लामो फेसबुक स्टाटस लेखे। उनले भनेका छन्- ‘गाई’ चुनाव चिह्नमा राप्रपाकै इतिहासमै अहिलेसम्मको सर्वाधिक (समानुपातिकमा करिब करिव ७ लाख) मत परेको छ। अहिले पनि राप्रपाका ९५ प्रतिशत स्थानिय तहका प्रतिनिधि, एक संघीय सांसद र ३ प्रदेशसभा सांसद ‘गाई’ चिह्नबाट निर्वाचित छन्। ‘गाई’ तुलनात्मकरूपले अत्यन्त लोकप्रिय चिह्न हो। २०४७ साल जेठ १५ गते राप्रपा स्थापना हुँदा दुई घटकमध्ये एकको चुनाव चिह्न ‘गाई’ थियो। फेरि, राप्रपाको मुख्य एजेण्डा हिन्दू राष्ट्र हो। हिन्दूत्वको प्रतीक ‘गाई’ हो। यस्तो वास्ततिकता थाहा हुँदाहुँदै राप्रपाकै केही साथीहरू चुनाव चिह्न जे भए पनि हुन्छ भन्दै हिँडेको देख्दा दु:ख लाग्छ, चित्त दुख्छ।
थापाको स्टाटसले चुनाव चिह्नलाई लिएर पार्टीभित्र विवाद रहेको स्पष्ट बुझिन्छ। जसको संकेत अगस्ट २ मै लोहनीले गरिसकेका थिए। लोहनीले लेखेका थिए- ‘कुनै पनि राजनीतिक दलहरुबीच एकता गर्दा दुवैको पहिचानलाई बिर्सेर एकले अर्कोलाई लतारेर लैजाने प्रवृत्तिले राम्रो नतिजा दिँदैन।'
राष्ट्रिय प्रजातन्त्र पार्टी र राष्ट्रिय प्रजातन्त्र पार्टी (संयुक्त) एक हुने भन्दै २०७६ फागुन २४ गते एकीकरणको आधार पत्रमा हस्ताक्षर भएको थियो। र, फागुन २८ गते औपचारिकरूपमा एकता घोषणा भएको थियो।
'पार्टीको चुनाव चिह्न ६ महिनाभित्र पार्टीको उपयुक्त निकायबाट टुंगो लगाए बमोजिम हुनेछ', आधारपत्रको बुँदा ९ मा भनिएको छ। तर, ६ महिना बितिसक्दा पनि यो विषय टुंगो लागेको छैन।
सामाजिक सञ्जालमा आउने गरेका शीर्ष नेताको धारणा र पार्टीभित्रको विवादलाई राप्रपा नेता राजाराम बर्तौला सहज रुपमा लिन्छन्। 'सामाजिक सञ्जालमा लेख्नु सामान्य विचार अभिव्यक्तिको विषय हो। पार्टीभित्र कुरा मिलिसक्यो। एक हप्ताभित्र निष्कर्ष निस्किन्छ', उनी भन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
