फिचर

जितका हिरो : पेरिसमा हुर्किएर पेरिसलाई नै निराश पारे

ऋग्वेद शर्मा सोमबार, भदौ ८, २०७७, १५:१२

काठमाडौं- कुरा भइरहेको थियो- नेमार, एमबाप्पे, लेवान्डोस्की र मुलरको, तर देखाइदिए कोम्यानले। जर्मन क्लब बायर्न म्युनिकलाई च्याम्पियन्स लिग जिताउन फ्रान्सका किंग्स्ले कोम्यानले गोल गरे। आफ्नै पूर्वक्लबविरुद्ध गोल हान्दा खेलमा एक मात्र हिरो रहे- कोम्यान।

पेरिसमा जन्मिएका २४ वर्षका कोम्यान फुबटलको सुरुवाती समय पिएसजीमा नै बिताएका खेलाडी हुन्। २००४ देखि २०१३ सम्म कोम्यान पिएसजीको युथ टिममा थिए। जहाँबाट बी टिम हुँदै सिनियर टिममा पुगेका उनी २०१४ मा इटालियन क्लब युभेन्टस गए। युभेन्टसबाट २०१५ मा लोनमा बायर्न म्युनिक गएका उनी २०१७ देखि स्थायी रुपमा बायर्नमा नै आबद्ध भए।

कोम्यान सिनियर टिमका खेलेदेखि नै लिग जितिरहेका खेलाडी हुन्। पिएजसी, युभेन्टस हुँदै अहिले बायर्नमा उनी उपाधिविहीन हुनुपरेको छैन। लगातार आठ लिग जितेका उनले च्याम्पियन्स लिग उपाधि जित्न पनि आफ्नै भूमिका अब्बल पारे।

‘यो असाध्यै खुसीको समय हो। धेरै नै रमाइलो लागिरहेको छ। तर सँगै पेरिसको हारमा दुःख पनि लागेको छ। म शतप्रतिशत बायर्न रहे पनि पेरिसको हारमा भित्र मनमा कताकता नमजा हुने रहेछ’ खेलपछि उनले भने।

रोचक त के छ भने बायर्न म्युनिकका प्रशिक्षक हान्सी फ्लिकले नसोचेको परिवर्तन पिएसजीविरुद्धको सुरुवाती टिममा गरेका थिए। कोरोना माहामारीपछि रोकिएर सुरु भएको फुटबलमा हरेक पटक फ्लिकको सुरुवाती ११ खेलाडी एकै थिए। तर फाइनलमा उनले लेफ्ट विङमा इभान पेरेसिकको स्थानमा कोम्यानलाई ल्याएर अचम्म पारे।

‘खेलाडीहरु अभ्यासका बेला मैदानमा कोम्यानलाई किंग भनेर बोलाइरहेका हुन्छन् नभन्दै उनी आजको खेलमा किंग नै भए’ खेलपछि बायर्न म्युनिकका पूर्वखेलाडी ओएनको प्रतिक्रिया यस्तो थियो।

फाइनल खेलमा कोम्यानले बलमा ३८ पटक मात्र नियन्त्रण बनाएका हुन्, तर पनि पिएसजीका राइट ब्याक केहेररलाई उनले निकै समस्यामा पारिरहे। पहिलो हाफमा उनले केहेररलाई गरेको ‘नटमेग’ त अहिले गोलभन्दा पनि ‘हाइलाइट्स’को केन्द्रमा छ।

‘यो सिजन उनी फ्रान्क रिबेरी र आर्जेन रोबेनको छायाबाट बाहिर निस्किएका छन्। उनी असाध्यै प्रतिभावान खेलाडी हुन्, आजको खेलपछि त उनी गोलमा पनि सक्षम छन् भनेर देखाइदिए’ प्रशिक्षक फ्लिकले कोम्यानबारे भने।

कोम्यानभन्दा ठीक विपरीत विङमा खेलेका सर्ज गेनाब्री भन्छन्- ‘कोम्यानले हामीलाई निकै मद्धत गरे। उनी डिफेन्डरलाई छलाएर बढ्दा विपक्षीलाई सहज हुने छैन भन्ने हामीले बुझेका थियौँ। धेरै समय त चोटका कारण बाहिर रहेका उनले फाइनलमा फर्किएर त्यसरी गोल गर्नु निकै खुसीको कुरा हो।’

कोम्यानको खेल जीवनको सबैभन्दा ठूलो क्षण त्यस्तो समय आयो जहाँ आफैले समर्थन गर्ने आफै हुर्किएको क्लबविरुद्धको गोल गरे। पिएसजीमा कोम्यान सबैभन्दा कम उमेरमा सिनियर टिममा खेल्ने खेलाडी हुन्। १६ वर्ष ८ महिनामा पिएसजी सिनियर टिममा खेलेका उनको त्यो कीर्तिमान अझै छ।

पिएसजीमा रहँदा कोम्यानले दुई पटक फ्रेन्च लिग वानको उपाधि जितेका थिए। तर पिएसजी सिनियर टिममा सबै गरेर उनी मैदानमा रहेको समय भने ३९ मिनेट मात्रै हो। २०१२-१३ र २०१३-१४ को सिजन पिएसजीमा बेन्चबाट मैदान जाने कम मौका पाए पनि उनले त्यहाँ निकै सिकेका छन्।

पिएसजीबाट युभेन्टस गएपछि पनि उनले २०१५-१६ को सिरि ए उपाधि जिते। बायर्न आएपछि त उनले आफ्नो नयाँ खेल उचाइ बनाइरहेकै छन्। लिग उपाधिबाहेक पनि उनले इटाली र जर्मनमा अरु प्रतियोगिताहरु पनि जितिरहेकै छन्। आइतबारको उपाधि उनको खेल जीवनको २०औँ उपाधि थियो। २४ वर्षको उमेरमा २० उपाधि जित्नु सामान्य विषय होइन।

यो सिजन मात्र उनले उपाधिमा ह्याट्रिक गर्न सके। यो सिजन बुन्डेस लिगा र जर्मन कपको उपाधि जितेर बढेको बायर्न म्युनिकका लागि च्याम्पियन्स लिग यो सिजनमा तेस्रो उपाधि हो।

‘प्रशिक्षक फ्लिकले फाइनलमा कोम्यानलाई खेलाउने असाध्यै सहि निर्णय गरेका रहेछन्। महत्वपूर्ण समयमा यस्तो महत्वपूर्ण निर्णयले नै उनी गोलमा बढ्न सके’ बायर्न म्युनिकका पूर्वखेलाडी ओएनले सुनाए।

पिएसजीका प्रशिक्षक थोमस टचेल पनि फाइनल खेलमा खेलाडी परिवर्तन गरेकोमा आफू चकित भएको बताए।

‘बायर्नले परिवर्तन गर्न सक्ने दुई खेलाडीका बारेमा हामीले सोचेर बसिरहेका थियौँ। तर कोम्यान ल्याउलान् भनेर त कल्पनासम्म थिएन। पेरेसिकले पछिल्ला खेलहरुमा राम्रो गरिरहेका पनि थिए, तर उनको स्थानमा कोम्यान ल्याइए’ उनले भने।

पूर्वफुटबलर तथा फुटबल पण्डित रियो फर्डिनान्ड भन्छन्- ‘कोम्यान खेलाउने निर्णय असाध्यै ठूलो हो। यस्तो महत्वपूर्ण खेलमा त्यस्तो निर्णय हुनु र उनले गरेर देखाउनु असाध्यै राम्रो हो।’

गएको नोभेम्बरमा बायर्न म्युनिक प्रशिक्षक निको कोभाक बर्खास्त भएपछि फ्लिक नयाँ प्रशिक्षक नखोज्दासम्म भनेर प्रशिक्षकको जिम्मेवारीमा थिए। तर उनले यसरी आफ्नो योजना देखाइदिए कि पहिलो प्रयासमा अब्बल साबित भए। बिबिसीमा पूर्व खेलाडी क्रिस सटन भन्छन्- ‘एक मान्छेले केबाट केसम्म परिवर्तन गर्न सक्छ भन्ने उदाहरण हो यो।’

तल्लो लिगमा प्रशिक्षणको अनुभव रहेका फ्लिक जर्मनीको सहायक प्रशिक्षकको अनुभव समेत भएका व्यक्ति हुन्। तर बायर्न म्युनिकको प्रशिक्षण सम्हाल्दा उनी बाहिरि फुटबल जगतसँग परिचित थिएनन्। उनले क्लब सम्हाल्दा बायर्न फ्रान्कफुटसँग ५-१ ले हारेर लिग तालिकामा चौथो स्थानमा थियो। तर उनी आएपछि बायर्नले जित्न थाल्यो र उनको समय पनि लम्बिँदै गयो।

उनको प्रशिक्षणमा बायर्नले खेलेका ३६ खेलमा ३३ खेल जितेको छ। जहाँ पछिल्ला २१ खेलमा बायर्न अपराजित रहेको छ। जहाँ १३ अंकको भिन्नतामा बुन्डेसलिगा र जर्मन कपका साथै अहिले च्याम्पियन्स लिगको उपाधि पनि मिल्यो।