काठमाडौं- स्पेनिस क्लब बार्सिलोनाको यो सिजन खराब समय रह्यो। ला लिगा गुमाएको बार्सिलोनाले च्याम्पियन्स लिगमा पनि लज्जास्पद हार भोग्दै उपाधिविहीन बन्यो। यस्तोमा बार्सिलोनाबाट लोनमा जर्मन क्लब बायर्न म्युनिक पठाइएका फिलिप कोउटिन्होले भने नयाँ उचाइ पाए- च्याम्पियन्स लिग उपाधिसँगै।
आइतबार राति फ्रेन्च क्लब पिएसजीलाई १–० ले हराउँदै बायर्नले च्याम्पियन्स लिग जित्यो। खेलमा कोउटिन्हो ६८औँ मिनेटमा सर्ज गेनाब्रीको स्थानमा मैदान पसेका थिए। त्यसअघि ५९औँ मिनेटमा नै किंग्स्ले कोम्यानको गोलमा बायर्नले अग्रता बनाइसकेको थियो।
च्याम्पियन्स लिग विजेता कोउटिन्हो आफ्नो भविष्यलाई लिएर अहिले सुनिश्चित भने छैनन्। २०१८ को जनवरीमा १४२ मिलियन पाउण्ड खर्च गरेर बार्सिलोनाले कोउटिन्होलाई लिभरपुलबाट किनेको थियो। तर बार्सिलोनामा कोउटिन्होको पहिलो सिजन सोचेजस्तो हुन सकेन। गएको सिजन लिभरपुलले च्याम्पियन्स लिग जित्दा कमजोर देखिएका कोउटिन्होलाई धेरैले उल्याए।
बार्सिलोनामा आफ्नो भरपर्दो पोजिसनमा खेल्न नपाएका कोउटिन्हो २०१९ को अगस्टमा एक सिजनको लोनमा बायर्न म्युनिक पठाइए। लोनमा रहेका कोउटिन्होलाई बायर्नले स्थायी रुपमा अनुबन्ध गर्न सक्ने बाटो रहँदा रहँदै पनि इच्छा देखाएन। जसले अब कोउटिन्हो पुनः बार्सिलोना फर्कने छन्।
‘पक्कै पनि म अब बार्सिलोना फर्कनु पर्छ। त्यसपछि हेरौँ के हुन्छ’ च्याम्पियन्स लिग जितेपछि कोउटिन्होको प्रतिक्रिया यस्तो रह्यो।
‘हुन त अब के हुन्छ भन्ने बारेमा मैले सोचेकै थिइनँ, मेरो सम्पूर्ण ध्यान फाइनल खेलमा थियो। मेरो खेल राम्रो होस् भनेर मैले एक वर्ष खेलमा मात्र ध्यान दिएर पूरा मेहनत गरेको हुँ, हेरौँ अब के हुन्छ’ उनले भने।
कोउटिन्होले यो सिजन बायर्न म्युनिकमा ११ गोलका साथै ९ असिस्ट गरे। अहिले पनि उनको समय सोचेको जस्तो नभए पनि उनले दिएका योगदान र जितेका उपाधिले सिजन सफल रह्यो।
च्याम्पियन्स लिग क्वाटरफाइनल खेलमा बायर्न म्युनिकले बार्सिलोनालाई ८–२ ले हराउँदा कोउटिन्होले २ गोल र १ असिस्ट गरेका थिए। जसले बार्सिलोना समर्थकमा पीडा बढाउन ठूलो भूमिका खेल्यो। जहाँ बार्सिलोना ब्यवस्थापनलाई नयाँ परिवर्तनका लागि बढ्न दबाब सिर्जना भयो। जसपछि प्रशिक्षक क्विके सेटियन बर्खास्त भए। नयाँ प्रशिक्षकमा रोनाल्ड कोम्यान नियुक्त भए।
कोम्यानले नयाँ सिजनका लागि अहिले आफ्नो योजना बनाइरहेका छन्। आफ्नो योजनामा समिटिने खेलाडीलाई राख्ने र अरुलाई टिमबाहिर राख्न नहिचकिचाउने कोम्यानले बताउँदै आएका छन्। जसका कारण सर्जियो बुस्केट्स, सर्जि रोबर्टो, जोर्डि अल्बा, लुइस स्वारेज, आर्टुरो भिडाल जस्ता खेलाडीहरु टिमबाहिर पर्ने खबर आइरहेकै छन्। यस्तोमा कोउटिन्हो कोम्यानको योजनामा छन् या छैनन् स्पष्ट छैन।
बार्सिलोना ब्यवस्थापन कोउटिन्होलाई बेच्न नै चाहन्छ। कोरोना माहामारीका कारण संकटमा परेको फुटबल बजारमा महँगा खेलाडीको बिक्री सहज भने छैन। यसैले आउने सिजन पनि कोउटिन्हो लोनमा कतै पठाइने अनुमान सत्यताको नजिक छ। केही इंग्लिस क्लबहरुले कोउटिन्हो लैजाने इच्छा पनि देखाइरहेका छन्।
कोउटिन्हो के चाहन्छन् र उनको सोच के छ भन्नेमा अब प्रशिक्षक कोम्यानले कुराकानी गर्नेछन्। आइतबारको फाइनल खेल पछि त्यो जरुरी पनि देखिन्छ। प्रिमियर लिगदेखि नै कोउटिन्होको खेल देखेका कोम्यानले उनलाई बार्सिलोनामा मिडफिल्ड प्लेमेकरका रुपमा बढाउने सोच पनि बनाइरहेका छन्।
कोउटिन्होका फुटबल एजेन्ट किया जुराबाचिन भने उनलाई प्रिमियर लिगमा नै फर्काउन लागिपरेका छन्। स्थायी रुपमा सम्भव नभए लोनमा भए पनि आर्सनल, लिसेस्टर या टोटनह्याममध्ये एउटामा लैजाने प्रयासमा उनी लागिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779634726.png)
-1764146706.png)
-1775812183.jpg)
-1779545841.jpg)
