एजेन्सी–बलिउड अभिनेता सुशान्तसिंह राजपूतको आत्महत्या मुद्दामा मुम्बई प्रहरीले मंगलबार धर्मा प्रोडक्सनका प्रमुख कार्यकारी (सीइओ) अपूर्व मेहतासँग बयान लिएको छ।
मुम्बईको अंबोली प्रहरी कार्यालयमा भएको झण्डै ३ घण्टा लामो सोधपुछमा प्रहरीले चलचित्र ‘ड्राइभ’ बनाउन किन ढिला भएको, चलचित्रलाई हलमा प्रदर्शन गर्नुको साटो किन ओटीटी प्लेटफर्ममा सार्वजनिक गरेकोलगायतका विषयमा सोधपुछ गरेको थियो। प्रहरीले उक्त प्रोडक्सन हाउस र सुशान्तबीचको विवादको विषयमा समेत सोधेको भारतीय सञ्चारमाध्यमले जनाएका छन्।
जवाफमा मेहताले धर्मा प्रोडक्सन र सुशान्तबीच कुनै विवाद नभएको बताएका छन्। उनले ‘ड्राइभ’ चलचित्र सन् २०१७ मा फ्लोरमा गएको र यो बन्न झण्डै दुई वर्ष लागेको जानकारी दिए। उनले चलचित्रमा भिएफएक्सको अत्याधिक प्रयोग गर्नुपर्ने भएकाले पनि समय लागेको स्पष्ट पारेका थिए।
यसका साथै चलचित्रका केही दृश्यहरुको पुनः छायांकन गर्नुपर्ने भएकाले पनि प्रदर्शनमा समय लागेको उनले बताएका थिए। थियो, यही काम गर्दा गर्दै चलचित्र प्रदर्शनको लागि समय लागेको हो। मेहताले यो चलचित्रलाई अनलाईन प्लेटफर्ममार्फत् प्रदर्शन गर्ने व्यावसायिक निर्णय भएको र यस विषयमा सुशान्तसँग केही पनि विवाद नभएको बताए।
यसअघि ‘ड्राइभ’ चलचित्रको विषयमा करण जोहर र सुशान्तबीच आपसमा झगडा भएको विषय सार्वजनिक भएको थियो।
यो चलचित्र हलमा प्रदर्शन होस् भन्ने सुशान्त चाहन्थे। तर करणले यसलाई अनलाइनमा प्रदर्शन गरिदिए। करणसँग विवाद भएपछि सुशान्तलाई फ्लप अभिनेताको ट्याग लाग्यो।
सुशान्तको मृत्युको डेढ महिना बितिसकेपछि पनि धर्मा प्रोडक्सनमाथि एकपछि अर्को आरोप लागिरहेका छन्। प्रहरीले प्रोडक्सनका सदस्यहरुसँग सोधपुछ जारी राखेको छ।
सुशान्तकी प्रेमिका रिया चक्रवर्तीविरुद्ध प्रहरीमा उजुरी
यसैबीच, सुशान्तकी प्रेमिका रिया चक्रवर्तीविरुद्ध प्रहरीमा उजुरी परेको छ। सुशान्तका पिता केके सिंहले उनीविरुद्ध पटनाको राजीवनगर थानामा उजुरी (एफआइआर) दर्ता गराएका हुन्।
उनले गत २५ जुलाईमा दर्ता गराएको उजुरीमा रियालाई सुशान्तसँग पैसा असुलेको र आत्महत्यका लागि उक्साएको आरोप लगाइएको छ। उजुरीपछि पटना प्रहरी मुम्बई गएको छ।
सुशान्त गत १४ जुनका दिन मुम्बईको बान्द्रास्थित आफ्नै घरमा झुण्डिएको अवस्थामा मृत भेटिएका थिए। प्रहरीले यसलाई आत्महत्या भनेको छ। तर उनका फ्यानहरुले यसलाई हत्या भन्दै सिबीआईको संलग्नतामा छानबिन गरिनुपर्ने माग गर्दै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
