काठमाडौं- इंग्ल्यान्डका तीब्रगतिका बलर स्टुआर्ट ब्रोडले टेस्ट क्रिकेटमा पाँच सय विकेट लिएका छन्। वेष्ट इन्डिजसँगको सिरिजमा तेस्रो टेस्टको अन्तिम दिन उनले पाँच सय विकेट पूरा गरेका हुन्।
उनले वेष्ट इन्डिजको दोस्रो इनिङमा तीन विकेट लिइसकेका छन्। यसअघि वेष्ट इन्डिजको पहिलो इनिङ ध्वस्त पार्ने क्रममा उनले ६ विकेट लिएका थिए। पाँच सय विकेट लिएसँगै टेस्ट क्रिकेटमा सर्वाधिक विकेट लिने खेलाडीको सूचिमा ब्रोड सातौं स्थानमा छन्। उनले दुई सय ५४ इनिङमा पाँच सय विकेट पूरा गरेका हुन्।
तीब्र गतिका बलरमा पाँच सय विकेट पूरा गर्ने ब्रोड चौथो खेलाडी हुन्। जसमा उनले घरेलु मैदानमा ७९ खेलमा ३ सय २० विकेट र अवे मैदानमा ६१ खेलमा १ सय ८० विकेट लिएका छन्।
टेस्ट क्रिकेटमा सर्वाधिक विकेट लिने खेलाडीमा श्रीलंकाका मुथैया मुरलीधरन छन्। उनले दुई सय ३० इनिङमा आठ सय विकेट लिएका छन्। टेस्ट क्रिकेटमा सर्वाधिक विकेट लिने दोस्रो खेलाडीमा अस्ट्रेलियाका शेन वार्न छन्। उनले दुई सय ७३ इनिङमा ७ सय ८ विकेट लिएका छन्।
यस्तै, तेस्रो स्थानमा रहेका अनिल कुम्लेले २ सय ३६ इनिङबाट ६ सय १९ विकेट लिँदा चौथो स्थानमा रहेको इंग्ल्यान्डका जेम्स एन्डर्सनले २ सय ८२ इनिङबाट ५ सय ८९ विकेट लिएका छन्।
यस्तै पाँचौं स्थानमा रहेको अस्ट्रेलियाका ग्लेन म्याक्ग्राथले २ सय ४३ इनिङबाट ५ सय ६३ र छैटौं स्थानमा रहेको वेष्ट इन्डिजका कार्टनी वाल्सले २ सय ४२ इनिङबाट ५ सय १९ विकेट लिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
