काठमाडौं- नेपाल कम्युनिस्ट पार्टी (नेकपा) का अध्यक्ष प्रधानमन्त्री केपी ओलीले निर्देशन दिएपछि लकडाउन उल्लंघन गर्दै दैनिक जसो प्रदर्शन भइरहेका छन्।
ओलीको पक्षमा देशका विभिन्न भागमा युवाहरुको समूहले प्रदर्शन गर्दै आएको छ। उनीहरुले आफ्नो समर्थन ओलीलाई रहेको, पाँचै वर्ष ओली प्रधानमन्त्री हुनुपर्ने, ओलीको नेतृत्व अहिलेलाई नभई भोलिलाई आवश्यक रहेको, भारतले ओलीलाई हटाउन लागेको जस्ता भावमा ओलीको समर्थन गरिरहेका छन्।
गत शनिबार प्रधानमन्त्री ओलीले युवा संघ र विद्यार्थी नेताहरुलाई बोलाएर आफ्नो पक्षमा प्रदर्शन गर्न भनेका थिए। लगतै आइतबार बिहानैदेखि ओली निकट नेता कार्यकर्ताले लघडाउन उल्लंघन गर्दै देशैभर प्रदर्शन गर्न सुरु गरेका थिए।
यसअघि सरकार विरुद्ध युवाहरु सडकमा आउँदा कोरोना महामारीमा संक्रमण बढ्ने भन्दै सडकमा नआउन मन्त्रीहरुले नै आग्रह गरेका थिए। महामारीकै बीच युवाहरु सडकमा आएको भन्दै प्रहरीले चरम दमन गर्दा गम्भीर घाइते समेत भएका थिए।
तर महामारीको जोखिम नघटेको अवस्थामा प्रधानमन्त्रीले नै आफ्नो पक्षमा माहोल बनाउन नेता कार्यकर्तालाई प्रदर्शनमा उतारेका छन्। सडकमा उत्रिने र नारा लगाउने शैली हेर्दा उनीहरु विरोधी समूहले जति पनि सचेतता अपनाएको पाइँदैन।
पार्टीमा पार्टी अध्यक्ष र प्रधानमन्त्री दुवै पदबाट ओलीको राजीनामा मागिएपछि उनले आफ्नो पक्षमा महाल बनाउन निर्देशन दिएका हुन्। आफू पार्टीमा लोकप्रिय भएको देखाउन ओलीले काठमाडौं सहित देशैभरका सहरहरुमा प्रदर्शन गर्न लगाएका छन्।
युवा संघ र विद्यार्थीका 'पब्लिक फिगर' भएका नेताहरु सडकमा उत्रिएका छैनन् भने अरुलाई सडकमा उतारेर प्रदर्शन गर्न लगाएका छन्।
सरकारका पक्षमा ओली समूहका नेता कार्यकर्ता सडकमा उत्रिदा प्रचण्ड-माधव नेपाल पक्षका कार्यकर्ताबीच कतिपय ठाउँमा झडप समेत भइसकेका छन्।
यसै विषयलाई लिएर बुधबार प्रधानमन्त्री ओलीलाई अध्यक्ष प्रचण्डले देशैभर भइरहेका प्रदर्शन बन्द गर्नुपर्ने आग्रह गरेका थिए। ‘प्रचण्डले प्रधानमन्त्री ओलीलाई पार्टीमा विवाद हुँदा यसरी देशैभर पदर्शन गर्नु ठीक भएन, यसलाई बन्द गर्नुपर् भन्नुभएको थियो’, प्रचण्ड निकट एक नेताले भने, ‘प्रतिवादमा ओेलीले मेरा विरुद्ध के-के षडयन्त्र गर्नुहुन्छ। थाहा छैन। बाहिर स्वतःस्फूर्त रुपमा जनता सडकमा आए मैले के गर्न सक्छु?’
बुधबारको संवादमा प्रचण्डले ओलीलाई सडकमा युवाहरुलाई उतारेर आफ्नो पक्षमा माहोल बनाउने काम राजामहाराजाको शैली जस्तै भएको भन्दै आपत्ति जनाएका थिए। यदि देशैभर प्रदर्शन भए संवाद गर्न गाह्रो हुने भन्दै तत्काल रोक्नुपर्ने धारणा प्रचण्डले राखेका थिए।
तर ओलीले प्रचण्डले भनेको विषयलाई कुनै ध्यानपूर्वक नलिएको स्रोतले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821305.jpg)
-1786602170.png)
