काठमाडौं- निजामती कर्मचारी भर्नामा संघीय निजामती सेवा गठन, सञ्चालन र सेवा सर्तका सम्बन्धमा विधेयकमा मार्फत नयाँ व्यवस्था गर्न लागिएको छ।
विधेयकमा सरकारी सेवामा प्रवेश गर्दा कुन समुदायको प्रतिनिधित्व कति हुन्छ भन्ने विषयमा समेत स्पष्ट रुपमा उल्लेख गरिएको छ।
विधेयकमा निजामती सेवालाई समावेशी बनाउने कुल माग संख्याको ५१ प्रतिशत खुला प्रतिस्पर्धा (सबै समुदाय)बाट लिइने व्यवस्था छ।
खुलामा खसआर्य, महिला, दलित, आदिवासी जनजाति, मधेसी, थारु, मुस्लिम लगायत सबै समुदायले प्रतिस्पर्धा गर्न पाउने छ। बाँकी ४९ प्रतिशत भने महिला, दलित, आदिवासी जनजाति, थारु, मधेसी, मुस्लिम, पिछडिएको क्षेत्र, अपांगबाट मात्रै लिइने छ। आरक्षण कोटामा आवेदन दिनेले खुलामा पनि दिन पाउने छन्।
१ हजार जनाको विज्ञापन हुँदा कुन क्षेत्रबाट कति?
खुलातर्फ
१ हजार जनाको माग हुँदा खुलातर्फ ५१ प्रतिशत लिइने छ। यो भनको ५ सय १० जना खुला प्रतिस्पर्धाबाट आउने छन्। यसमा आरक्षण भन्ने हुँदैन। जो प्रतिस्पर्धामा अगाडि हुन्छ उसले नै अवसर पाउँछ।
आरक्षण
खुलाबाट पदपूर्ति हुने ५१ प्रतिशत अर्थात् ५ सय १० बाहेक ४९ प्रतिशत अर्थात् ४ सय ९० जना भने आरक्षण शीर्षकबाट पदपूर्ति गरिने छ।
आरक्षणमा महिला
आरक्षणको ४९ प्रतिशत अर्थात् ४ सय ९० लाई पनि सतप्रतिशत मानी त्यसको ५० प्रतिशत अर्थात् २ सय ४५ कर्मचारी महिला मात्रै लिइने व्यवस्था विधेयकमा उल्लेख छ।
महिलाको ५० प्रतिशतलाई पनि पुनः सतप्रतिशत मानी फेरि महिला भित्रबाट पनि दलित, आदिवासी जनजाति, खसआर्य, मधेसी, थारु, मुस्लिम, पिछडिएको क्षेत्र र अपांग महिलाबाट २ सय ४५ जना पदपूर्ति हुने व्यवस्था गरिएको छ।
- दलित महिला: १३ प्रतिशत (३२ जना)
- आदिवासी जनजाति महिला: २६ प्रतिशत (६४ जना)
- खसआर्य महिला: २८ प्रतिशत (६९ जना)
- मधेसी महिला: १६ प्रतिशत (३९ जना)
- थारु महिला: ५ प्रतिशत (१२ जना)
- मुस्लिम महिला: ४ प्रतिशत (१० जना)
- पिछडिएको क्षेत्रका महिला: ४ प्रतिशत (१० जना)
- अपांग महिला: ४ प्रतिशत (१० जना)
आरक्षणमा अन्य वर्ग
खुलाबाट पदपूर्ति हुने ५१ प्रतिशत अर्थात् ५ सय १० बाहेक ४९ प्रतिशत अर्थात् ४ सय ९० जना भने आरक्षण शीर्षकबाट पदपूर्ति गरिने छ। आरक्षणको ४९ प्रतिशतलाई सतप्रतिशत मानी त्यसको ५० प्रतिशत महिला हुने छन्। त्यसपछि बाँकी रहेको ५० प्रतिशत अर्थात् २ सय ४५ लाई पनि सतप्रतिशत मानी ८ वटा समुदायबाट पदपूर्ति गरिने छ।
दलित: १६ प्रतिशत (३९ जना)
आदिवासी जनजाति: ३३ प्रतिशत (८१ जना)
विपन्न खसआर्य: १० प्रतिशत (२५ जना)
मधेसी: २० प्रतिशत (४९ जना)
थारु: ७ प्रतिशत (१७ जना)
मुस्लिम: ५ प्रतिशत (१२)
पिछडिएको क्षेत्र: ५ प्रतिशत (१२)
अपांग: ४ प्रतिशत (१० जना)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
