काठमाडाैं- मालपोत कार्यालय बाराका लेखापाल युगल किशोर ठाकुरले मालपोत कार्यालयबाट असुल हुने राजस्व गैरकानुनी रुपमा आफ्नो खातामा जम्मा गर्ने गरेको पाइएको छ। अख्तियार दुरुपयोग अनुसन्धान आयोगको अनुसन्धानमा अवैधानिक आर्जन गरेको पैसा बैक खातामा जम्मा गरेको पाइएको छ।
अख्तियारको अनुसन्धानमा मालपोत कार्यालयका लेखापाल ठाकुरले मालपोत कार्यालयमा उठेकाे राजस्व रकम संयुक्त व्यक्तिगत खातामा जम्मा गर्ने गरेको खुलेको हो। ठाकुरसँग तत्कालीन मालपोत कार्यालय सिमराका कार्यालय प्रमुख मदनप्रसाद गुप्ताको मिलेमतो रहेको पाइएको छ। राजस्वको रकम ठाकुर र गुप्ता दुवैको संयुक्त खातामा मालपोतको राजस्व जम्मा गरी भ्रष्टाचार गर्ने गरेको पाइएको हो। अख्तियारले सोमबार विशेष अदालतमा भ्रष्टाचार मुद्दा दायर गरेको छ।
कार्यालयको खातामा दाखिला गरिनुपर्ने राजस्व रकमलाई समेत आफू अनुकूलका खर्च लगानीमा प्रयोजन तथा खर्च गर्न सक्ने गरी उनीहरुले जम्मा गरेको विशेष अदालतमा अख्तियारले दायर गरेको अभियोगपत्रमा उल्लेख छ। लेखापाल ठाकुर र कार्यालय प्रमुख गुप्ताको संयुक्त नाममा राष्ट्रिय वाणिज्य बैंक सिमरामा संचालित खातामा अख्तियारले २ करोड ६७ लाख ४४ हजार १ रुपैँया मौजाद रकमसमेत फेला पारेको छ। सरकारी खातामा जम्मा हुनुपर्ने रकम व्यक्तिगत खातामा देखिएको अभियोगपत्रमा उल्लेख छ।
मालपोत कार्यालय बारामा कार्यरत लेखापाल ठाकुरले गैरकानुनी सम्पत्ति आर्जन गरेको भन्ने आयोगमा दर्ता भएको उजुरीमा छानबिन गर्दा उक्त रहस्य बाहिर आएको हो। २०६८ सालमा कोष तथा लेखा नियन्त्रक कार्यालय बाराबाट सहलेखापालको पदमा नियुक्ति भएका उनी ९ वर्षमा ३ करोड १५ लाख ७५ हजार आर्जन गर्न सफल भएका थिए। यो सम्पत्ति मध्ये ३ करोड ४ लाख गैरकानुनी रुपमा आर्जन गरेको आयोगको अभियोगपत्रमा उल्लेख छ।
मालपोत सरुवापछि मालामाल
२ वर्षसम्म कोष तथा लेखा नियन्त्रण कार्यालयमा काम गरेका ठाकुर मालपोत पुगे लगत्तै गैरकानुनी सम्पत्ति आर्जनमा लागेका थिए। २०७२ वैशाख २२ गते लेखापालको पदमा बढुवा भई मालपोत कार्यालय सिमरामा ठाकुर पुगेका थिए। त्यहाँ कार्यरत रहँदा मालपोत कार्यालयमा उठेकाे राजस्व रकम कार्यालय प्रमुखसँग मिलेर संयुक्त व्यक्तिगत खातामा जम्मा गर्ने काममा लागेका थिए।
कार्यालयको खातामा दाखिला गरिनुपर्ने राजस्व रकमलाई समेत आफू अनुकूलका खर्च लगानीमा प्रयोजन तथा खर्च गर्न सक्ने गरी उनीहरुले व्यक्तिगत खातामा जम्मा गरेका थिए। शुरुमा व्यक्तिगत खाताबाट भ्रष्टाचार गर्ने गरेका उनीहरुले २०७५ भदौ ७ गतेदेखि संयुक्त खाता सञ्चालन गर्न थालेका थिए।
अख्तियारको अनुसन्धानमा ठाकुरले सार्वजनिक सेवामा प्रवेश पश्चातको अनुसन्धान जाँच अवधि २०७६ बैशाख मसान्तसम्ममा १० लाख ८० हजार बाहेककाे अन्य गैरकानुनी आर्जन गरेको अख्तियारको आरोपपत्रमा उल्लेख छ। लेखापाल ठाकुरले शोभा कुमारीको नाममा दर्ता कायम रहने गरी बारामा ३ लाख बराबरको जग्गा खरिद गरेको आरोपपत्रमा उल्लेख छ।
ठाकुरको नाममा विभिन्न बैंक तथा वित्तीय संस्थाहरुमा ११ लाख ३९ हजार रहेको, उनको घरबाट अख्तियारले २४ लाख ९२ हजार रुपैयाँ बरामत गरेको थियो। अख्तियारले ठाकुरसँग ३ करोड ४ लाख ९४ हजार ३ सय रुपैँया अवैध आर्जनको सम्पत्ति भएको दावी गर्दै सोही बराबरको विगो र जरिवाना माग गर्दै मुद्दा दायर गरेको हो। ठाकुरविरुद्ध भ्रष्टाचार निवारण ऐनअनुसार कैद सजायको माग गरिएकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
