समाचार

के अभिनेता सुशान्त 'नेपोटिजम'को सिकार भएका हुन्?

नेपाल लाइभ मंगलबार, असार २, २०७७ १४:४३

एजेन्सी- पोस्टमार्टम रिपोर्ट अनुसार अभिनेता सुशान्त राजपुतको मृत्युको कारण हो 'झुन्डिनु'। उनको शव झुन्डिएको अवस्थामा फेला परेको थियो। तर सुसाइड नोट फेला नपर्दा उनको मृत्युको कारणको रहस्य खुल्न सकेको छैन। उनी केही महिनादेखि डिप्रेसनमा थिए भन्ने उनकै परिवारले बताएका छन्।

बलिउड फिल्म नगरीमा उनको आत्महत्याको कारणलाई लिएर बहस चर्किएको छ। उनको पक्षमा जो-जो कलाकार उभिएका छन्, उनीहरुले बलिउडमा हुने तुच्छ व्यवहारका कारण डिप्रेसनमा पुगेको र आत्महत्या गर्न बाध्य भएको तर्क गरिरहेका छन्। कतिले व्यावसायिक प्रतिद्वन्द्वका कारण उनी आत्महत्याको मोडमा पुगेको बताइरहेका छन् भने कतिले बलिउड फिल्म नगरीमा व्याप्त नातावादका कारण तनावमा परेर उनले आत्महत्या गरेको तर्क गरिरहेका छन्।

अभिनेत्री कंगना रनौतले सुशान्तको आत्महत्याको कारण बलिउडमा जरा गाडिसकेको नातावाद रहेको दाबी गरिरहेकी छिन्। नातावादको जालोका कारण उनी समस्यामा परेको र कसैले उनको समस्याको वास्ता नगर्दा उनी आत्महत्या गर्न बाध्य भएको उनले बताएकी छिन्।

बलिउडकी परिचित हेयर स्टाइलिस सपना भवानीले सुशान्त केही समस्यासँग जुधिरहेको बताउँदै कसैले उनलाई साथ नदिदा तनावमा आएर आत्महत्या गरेको बताएकी छिन्।

उनले लेखेकी छिन्' यो लुकेको विषय हैन कि सुशान्त पछिल्लो केही वर्ष समस्यामा थिए। कसैले उनलाइ साथ दिएनन्। सहयोग गर्न कोही अगाडि सरेनन्। आज हरेक कोही ट्विट गरेर दुख व्यक्त गरिरहेको छ। जसबाट थाहा हुन्छ कि बलिउड कत्तिको खोक्रो छ। यहाँ कोही तपाइको साथी छैनन्।'

उनी पेशेवर प्रतिद्वन्द्विताको सिकार भएर तनावमा परेको दाबी आइरहेको बेला महाराष्ट्रका गृहमन्त्री अनिल देशमुखले फिल्म इन्डस्ट्रिमा बिजनेस प्रतिद्वन्द्विताका कारण सुशान्तले आत्महत्या गरेको मिडिया रिपोर्ट आइरहेकाले यसबारेमा महाराष्ट्र प्रहरीले अनुसन्धा गर्ने बताएको बिबिसी हिन्दीले लेखेको छ।

'काई पो चे', 'धोनी द अनटोल्ड स्टोरी,' पिके' जस्ता सफल फिल्ममा अभिनय गरेका उनी आइतबार बान्द्रामा रहेको आफ्नै फ्ल्याटमा आत्महत्या गरेका थिए। प्रहरीका अनुसार उनी क्लिनिकल ड्रिप्रेसनको उपचार गराइरहेका थिए।