अर्थमन्त्री युवराज खतिवडाले चढ्ने गरेको गाडी।
काठमाडौं-अर्थमन्त्री डा युवराज खतिवडालाई मितव्ययी मन्त्रीका रूपमा चिनिन्छ। अन्य मन्त्रीहरुले पदको दुरुपयोग गर्दै अनावश्यक सुविधा लिए पनि अर्थमन्त्रीले तोकिएभन्दा बढी नलिएकोमा उनको प्रशंसा भएको थियो।
तर उनै खतिवडाले बनाएको बजेट तर्जुमा दिग्दर्शन २०७५ विपरीत गाडी सुविधा लिइरहेका छन्। खतिवडा अर्थमन्त्री भएपछि संशोधन भएको दिग्दर्शनमा मन्त्रीहरुले १६ सय देखि २ हजार सिसीसम्मका सवारी चढ्न पाइने स्पष्ट व्यवस्था गरिएको छ। ‘नयाँ सवारीअन्तर्गत संवैधानिक निकायका प्रमुख, पदाधिकारी/मन्त्रीका लागि १६ सयभन्दा माथि २ हजार सिसीसम्मको फुल अप्सनको पेट्रोलबाट चल्ने गाडी उपलब्ध गराउने’ उल्लेख छ।
अर्थमन्त्री खतिवडाले टोयोटाको ल्यान्ड क्रुजर प्राडो चढ्दै आएका छन्। त्यस्तै उनले चढ्ने अर्को गाडी हो निसानको एक्स–ट्रेल। औपचारिक कार्यक्रममा जाँदा निसानको एक्स-ट्रेलमा जाने अर्थमन्त्रीले अन्य समयमा भने टोयोटाको ल्यान्डक्रुजर प्राडो चढ्ने गरेका छन्।
१९ सय ९८ सिसी इन्जिन क्षमताको एक्स-ट्रेलको नेपाली बजार मूल्य करिब १ करोड २५ लाख रुपैयाँ पर्छ। यो एसयुभी गाडी बजेट तर्जुमा दिग्दर्शनअनुसार मन्त्रीले पाउने सुविधाअन्तर्गत नै पर्छ। तर टोयोटाको ल्यान्ड क्रुजर प्राडो भने त्यो दिग्दर्शनले निर्धारण गरेको मापदण्ड भन्दा बढी सुविधायुक्त हो। टोयोटाको यो एसयुभी गाडी २९ सय ८२ सिसी इन्जिन क्षमतायुक्त छ। नेपाली बजारमा यो गाडीको मूल्य २ करोड ५७ लाखदेखि ३ करोड २४ लाख रुपैयाँसम्म पर्छ।
नेपाल सरकारका मन्त्रीहरुमध्ये सबैभन्दा विलासी गाडी चढ्ने एकमात्र भाग्यमानी मन्त्री हुन् परराष्ट्रमन्त्री प्रदीपकुमार ज्ञवाली। मन्त्री ज्ञवालीले चढ्ने मर्सिडिजको सेडान कार हो, जसको मूल्य साढे दुईदेखि ३ करोड रुपैयाँभन्दा बढी पर्छ। उक्त कार कतार सरकारले नेपाललाई विशिष्ट विदेशी पाहुनाहरु नेपाल आएका बेला चढ्न प्रयोग गरिने भनिएको थियो। २०७३ वैशाख २२ गते नेपालका लागि कतारका तत्कालीन राजदूत अहमद जसीम माेहम्मद अलि अल–हमेरले ९ वटा मर्सिडिज बेन्जका विलासी कार हस्तारन्तरण गरेका थिए।
कतारले उपलब्ध गराएका ती कार बिमष्टेक, सार्क बैठक, विदेशी राष्ट्राध्यक्षको आगमनजस्ता अन्य महत्वपूर्ण कार्यका लागि प्रयोग हुने परराष्ट्र मन्त्रालयले बताएको थियो। तर सरकारले बनाएको मापदण्डविपरीत विलासी कार एक मन्त्रीले नै चढ्दै आएका छन्। ज्ञवालीले उपयोग गर्ने गरी परराष्ट्रमा मर्सिडिजकै ह्याचब्याक गाडी पनि राखिएको छ।
ज्ञवाली र खतिवडामात्र होइनन् नेपाल सरकारका कुनै पनि मन्त्रीले बजेट तर्जुमा दिग्दर्शनविपरीत गाडी सुविधा लिएका छन्। सबैमन्त्रीले चढ्ने गाडी मापदण्डमा तोकिएभन्दा बढी बिलासी छन्। अधिकांश मन्त्रीसँग टोयोटाको ल्याण्डक्रुजर र फर्चुनर, फोर्डको इन्डेभियोरजस्ता बिलासी गाडी छन्। यी गाडी नियमानुसार मन्त्रीले चढ्न मिल्दैन।
अर्थमन्त्रालयले यसबारेमा अध्ययन गरेर प्रतिवेदन बनाउने क्रममा रहेको मन्त्रालयका सहसचिव तथा प्रवक्ता उत्तरकुमार खत्रीले जानकारी दिए। ‘गाडी सुविधाको विषयमा अर्थमन्त्रालयले एउटा कमिटी बनाएर अध्ययन गरिसकेको छ,’ उनले भने, त्यो पारित भएपछि कसले, कस्तो सुविधा पाउने भन्ने स्पष्ट हुनेछ।’
नयाँ व्यवस्था परित भएर कार्यान्वयनमा आएपछि नेपाल सरकारबाट सुविधा पाउनेहरुले एकै खाले सुविधा पाउने उनको भनाइ छ। एकै तहका कर्मचारीले विभिन्न सुविधायुक्त गाडी चढ्दै आएकोमा नयाँ व्यवस्था कार्यान्वयनमा आएपछि एकै खालको सुविधायुक्त गाडी नै प्रयोग गर्ने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
