सभामुख महोदय,
कोरोनाको विश्वव्यापी महामारीबाट नेपाल र नेपालीको रक्षा गर्न हालसम्मका प्रयासहरुको गहिरो समिक्षा गर्दै विशेष रणनीति निर्माण र कार्यान्वयन गर्न/गराउन यो संसद सफल हुनैपर्ने इतिहासकै विशेष अभिभारा म शुरूवातमै सबैलाई स्मरण गराउन चाहन्छु।
श्रद्धाञ्जली र समवेदना
कोरोना भाइरस अर्थात् कोभिड १९ का कारण संसारका विभिन्न देशमा जीवन गुमाएका नेपालीहरु प्रति श्रद्धाञ्जली अर्पण गर्दै परिवारजनमा समवेदना व्यक्त गर्दछु। साथै कोरोनाका कारण जीवन गुमाएका विश्वभरिका सबै मानवको आत्माको चीर शान्तिको कामना गर्दछु।
स्वास्थ्यलाभ कामना
कोरोना संक्रमित भई उपचाररत नेपालभित्रका सबै नेपाली र विभिन्न देशमा रहेका ३ हजारभन्दा बढी नेपालीको शीघ्र स्वास्थ्यलाभको कामना गर्दछु।
उच्च सम्मान र कदर
पर्याप्त स्वास्थ्य सामग्री अभावका बावजुद उच्च मनोबल र उच्च मानवीय भावना साथ ‘फ्रन्ट लाईन’ मा कार्य गरिरहनुभएका सबै आदरणीय स्वास्थकर्मीको उच्च कदर गर्दै उच्च सम्मान प्रकट गर्दछु। यसरी नै अहोरात्र जिम्मेवारी निभाइरहेका सुरक्षाकर्मी, संचारकर्मी एवं सफाईको क्षेत्रमा निरन्तर कार्य गरिरहेका सफाइकर्मीको प्रशंसा गर्दै श्रद्धा प्रकट गर्दछु।
जनताको धैर्यको प्रशंसा
कोरोनाका कारण उत्पन्न अनेक जटिलता असीम धैर्य साथ सामना गरिरहनु भएका स्वदेश र विदेशका समस्त नेपाली दिदीबहिनी दाजुभाइको धैर्यको प्रशंसा गर्दै आजको परिस्थितिलाई संयम र एकता साथ सामना गर्न यो सम्मानित संसद मार्फत अपिल गर्दछु।
प्रतिपक्षको सहयोग र खबरदारी
कोरोनाको यो संकटका बेला ‘सरकारमा सँगै नरहेर पनि संकटमा सँगै लड्न सकिन्छ’ भन्ने राष्ट्रिय एकताको भावनाले प्रतिपक्षी दल नेपाली कांग्रेसले कार्य गरिरहेको छ। नेपाली कांग्रेसले पार्टीको सबै तहका नेता तथा पार्टी सदस्यलाई कोभिड १९ को नियन्त्रण र निर्मूल गर्न आ-आफ्नो तर्फबाट निरन्तर कार्य गर्न आह्वान गरेको छ र सबै साथीहरुले जिम्मेवारीपूर्वक कार्य गरिरहनु भएको छ। कोरोनाबाट नेपाल र नेपालीको रक्षा गर्ने विषयमा सरकारलाई हरसंभव सघाउने तर बेथिति, भ्रष्टाचार र अधिनायकवादी नियतविरुद्ध निरन्तर लड्ने यी दुई नितिलाई हामी निरन्तरता दिनेछौं।
राहतको व्यवस्थित प्याकेज ल्याउन माग
• लकडाउनले श्रमिक, बेरोजगार र विद्यार्थीलाई सबैभन्दा संकटमा पार्यो। सरकारले पर्याप्त राहत नदिँदा हजारौं श्रमिक पैदल हिंडेर गाउँ फर्किए। न खान दिने न गाउँ जान दिने, सरकारको यस्तो व्यवहारले जनतालाई आहत तुल्यायो। कोरानाका कारणले रोजगारी गुमेका र राज्यबाट सहज रुपमा तत्काल राहत पाउनुपर्ने व्यक्तिले राहत पाउन सकेका छैनन्।
सुकुम्बासीलाई जाउलो पुर्याउने तत्कालीन दायित्व बिर्सेर सरकारले योबेला सुकुम्बासी आयोग गठन गर्नुको कुनै तर्क थिएन।
• श्रमिक, बेरोजगार, कृषक, डेरा बस्ने विद्यार्थी, पत्रकार, मिडिया हाउस, पर्यटन व्यवसायीदेखि साना व्यापारी हुँदै उद्योगी व्यवसायीसम्मलाई विविध ढंगले राहत दिने वृहत्तर प्याकेज निर्माण, घोषणा र कार्यान्वयन यथाशीघ्र गर्न म सरकार समक्ष माग गर्दछु।
स्वास्थ्य सामग्री अभाव र भ्रष्टाचारबारे
• कोरोनासँग जुध्न अत्यावश्यक पिपिई, परिक्षण कीटलगायतका सामग्रीको अझै अभाव रहनु दुःखद र लज्जास्पद छ। समयमै सामग्री प्रबन्ध नगर्नु, खरिद प्रक्रियामा पारदर्शिता नहुनु र बजार मूल्यभन्दा बढी रकम राज्यकोषबाट निकासा गराएर भ्रष्टाचार गरिनु अत्यन्तै गम्भीर र अक्षम्य छ। दोषीहरुलाई पदमुक्त गरेर अनुसन्धानलाई सघाउन र कडा कारबाही गर्न म माग गर्दछु।
प्रधानमन्त्रीको नियोजित नियत गलत
• सिंगो देश कोरोनाबाट आतंकित भएको बेलामा सरकारले लोकतान्त्रिक मूल्य र मान्यता एवं संविधानको मूल भावनाविपरीत दुईवटा विवादास्पद अध्यादेश जारी गरेर अलोकतान्त्रिक एवं गैह्रजिम्मेवार चरित्र प्रस्तुत गर्यो। विपक्षीलगायत राजनीतिक दल, संचार माध्यम र समस्त नागरिकसहित सबैले कोरोनाविरुद्धको लडाईमा एक भएर साथ दिई रहेका बेला दल विभाजनको अध्यादेश ल्याउनु र संवैधानिक परिषद्को गरिमा समाप्त पार्ने षड्यन्त्र गर्नु प्रधानमन्त्रीको नियोजित नियत थियो।
• एक सांसदको अपहरण र त्यसमा पनि कुनै न कुनै रुपले सरकारको संलग्नता देखिनु अर्को दुर्भाग्यपूर्ण कार्य हो। म यो घटनाको निन्दा गर्दै अपराधमा संलग्न सबैलाई कडा कारबाही गर्न माग गर्दछु।
• एकातर्फ कोरोनासँग लड्ने हाम्रो साझा दायित्व छ भने अर्कातर्फ वर्तमान सरकारले नियोजित नियतबाट लोकतन्त्र र संविधानका विरुद्ध गरिरहेको घातबाट वर्तमान संविधान र लोकतान्त्रिक व्यवस्थाको रक्षा गर्नुपर्ने परिस्थिति पनि छ। म सरकार बाहिर रहेका राजनीतिक दल, संचार माध्यम, बुद्धिजीवी र समस्त नेपालीलाई यसबारे सजग र एकताबद्ध रहन यो सम्मानित संसद मार्फत अपिल गर्दछु।
सरकारले शासन गर्ने नैतिक र राजनैतिक आधार गुमायो
• विश्वव्यापी रुपमा नै मानवजाति समक्ष कोरोनाको रुपमा ठूलो चुनौती देखा परेको छ। नेपालमा यतिबेला एकसय बढी नागरिक संक्रमित भइसकेको स्थिति छ। सर्वत्र त्रासको अवस्था विद्यमान छ। यस्तो विषम परिस्थितिमा कोभिड १९ को नियन्त्रण र निर्मूल गर्न विवेकसम्मत तवरले जिम्मेवार भई कार्य गर्नुपर्नेमा सरकार यसमा पूर्णरुपले असफल भएको छ। सरकारले नागरिकलाई देशमा सरकारको अस्तित्व रहेको अनुभूति गराउन सकेको छैन। महामारीविरुद्ध लड्न पूर्वतयारी, लकडाउनका बेलामा राहत, क्वारेनटाइन, अस्पताल आदिको उचित व्यवस्थापन, स्वास्थ्य तथा सुरक्षाकर्मीलगायत अग्रपंक्तिमा काम गरिरहेका व्यक्तिहरुको व्यक्तिगत सुरक्षा सामग्री, परिक्षण सामग्रीको आपुर्तिका कामहरु उचित तवरले भएका छैनन्।
नेपालमा कोरोनाको पहिलो संक्रमण देखिएको ३ महिना बितिसक्दा पनि हालसम्म व्यापक परिक्षण भई सक्नुपर्नेमा अत्यन्त न्यून संख्यामा मात्र परीक्षण भएको छ। परीक्षण सामग्रीको विश्वसनियतामा प्रश्न उठेका छन्। विदेशमा अफ्ट्यारोमा परेका नेपाली नागरिकको उद्दारको कुनै योजना छैन। कोरोनाबाट विभिन्न क्षेत्रमा उत्पन्न हुने नकारात्मक प्रभावको अध्ययन गरी तत्कालीन र दीर्घकालीन रणनीति बनाउने दिशामा कुनै सुरसार छैन। यस्तो अत्यन्त विषम अवस्थामा भ्रष्टाचारका घटना हुनु, सरकार लोकतान्त्रिक मूल्य मान्यता र संविधानको भावनाविपरीत क्रियाकलापमा व्यस्त रहनु, सांसदको अपहरण हुनुजस्ता अवाञ्छित र आपराधिक गतिविधि कुनैपनि रुपले स्विकार्य हुन सक्दैनन्। यी विषयहरुलाई नेपाली कांग्रेसले गम्भीरतापूर्वक लिनुका साथै अत्यन्त सुक्ष्म ढंगले विश्लेषण गरी यो सरकारले शासन गर्ने राजनीतिक र नैतिक आधार गुमाइसकेको ठहर गरेको छ।
विदेशमा अप्ठ्यारोमा परेका नेपालीको उद्धार गरौं
विदेशमा रहेका नेपाली पनि यतिबेला कोरोनाबाट प्रताडित छन्। अप्ठ्यारोमा परेका नेपालीलाई उद्धार गर्नु सरकारको कर्तव्य हो। यससम्बन्धि आवश्यक व्यवस्थापनको योजना निर्माण गरेर सम्मानित संसदमा यथाशीघ्र पेश गर्न र उद्धार थाल्न म सरकारसमक्ष माग गर्दछु।
कोरोना केन्द्रित बजेट ल्याउन माग
• आगामी बजेटको मुख्य प्राथमिकता कोरोना केन्द्रित हुनुपर्छ भन्ने मेरो प्रष्ट माग छ। आवश्यक सचेतना, अत्यावश्यक स्वास्थ्य सामग्री, अनिवार्य उपचार, विविध क्षेत्रमा पर्याप्त राहत एवं विदेशमा अप्ठ्यारोमा रहेकाको उद्धार र पुनर्व्यवस्थापनमा अबको बजेट केन्द्रित हुनुपर्छ।
माननीय सभामुख महोदय,
आशा एवं विश्वास छ आज सुरु भएको प्रतिनिधिसभाको यो बैठकले कोरोनामाथि विजय हाँसिल गर्न आवश्यक पर्ने सबै अत्यावश्यक कदमहरुका बारे मार्गदर्शन गर्न र राष्ट्रिय एकतालाई अभिवृद्धि गर्न गराउन सक्नेछ।
(नेपाली कांग्रेसका सभापति एवं प्रमुख प्रतिपक्षी दलका नेता शेरबहादुर देउवाद्वारा २०७७ वैशाख २६ गते संसदमा प्रस्तुत सम्बोधनको पूर्ण अंश)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770205330.png)
-1764146706.png)
