नेकपा सचिवालय बैठकमा सहभागी नेताहरू। तस्बिर : प्रधानमन्त्रीको निजी सचिवालय
काठमाडौं- नेकपा सचिवालय बैठकमा बोल्ने अधिकांश नेताहरूले चीनबाट ल्याएका औषधि र मेडिकल सामग्री खरिद प्रकरणका दोषीलाई हदैसम्मको कारबाही गर्न माग गरेका छन्। बैठकमा बोल्दै अध्यक्ष प्रचण्डसहित नेताहरू झलनाथ खनाल, माधवकुमार नेपाल, वामदेव गौतमलगायतले माहामारीमा अनियमितता हुनु राम्रो नभएकाले दोषीलाई कडाभन्दा कडा कारबाही गर्न माग गरेका हुन्।
मंगलबार बेलुका ४ बजेदेखि करिब ९ बजेसम्म झन्डै ५ घण्टासम्म चलेको बैठकमा नेताहरूले अनियमितामा मुछिएका दोषीलाई कारबाही गर्नुका साथै कोरोना भाइरस नियन्त्रणमा सरकारले प्रभावकारी काम गर्नु सुझाव दिएका थिए।
बैठकमा बोल्ने अधिकांश नेताहरूले मेडिकल सामग्री खरिद प्रकरणका दोषीलाई कारबाही गर्न माग गरेपछि प्रधानमन्त्री केपी शर्मा ओलीले प्रमाणित भए कारबाही गर्ने बताएको वरिष्ठ नेता झलनाथ खनालले नेपाल लाइभसँग बताए।
‘हामी मेडिकल सामग्री खरिद प्रकरणमा अनियमितताको कुरा आयो। के भएको हो भन्दै प्रश्न गर्यौं। किन दोषीलाई कारबाही गरिएन भन्यौं,' नेता खनालले भने, ‘प्रधानमन्त्रीज्यूले मैले पनि सुनेको छु। के भएको हो अध्ययन गर्दैछु। दोषी देखिए हदैसम्मको कारबाही गर्छु भन्नु भयो।’ स्वास्थ्य सामाग्री खरिदका लागि ओम्नीसँग भएको सम्झौताबारे भने आफूलाई जानकारी नै नभएको उनले बताएका थिए।
नेकपा सचिवालय बैठकमा प्रधानमन्त्री ओली। तस्बिर : प्रधानमन्त्रीको निजी सचिवालय
बैठकमा प्रचण्डले माहामारीका बेला अनियमिता हुनु दुखद् भएको भन्दै दोषी देखिए कारबाही गर्नुपर्ने बताएका थिए। संकटको घडीमा जनतालाई सहुलियत दिनुपर्ने बेला अनियमितता हुँदा सरकार र पार्टी दुवैलाई फाइदा नगर्ने प्रचण्डको भनाइ थियो।
संक्रमणका बेला अनियमिता हुनु अक्षम्य अपराध भएको बताउँदै नेता खनालले जिम्मेवार व्यक्तिबाट कसरी अनियमितता भयो भन्दै प्रश्न गरेका थिए। चीनबाट ल्याएका मेकिडल सामाग्री खरिदमा प्रधानमन्त्रीका मुख्य सल्लाहकार विष्णु रिमाल र आइटी सल्लाहकार असगर अली अनियमिततामा जोडिएको आरोप लागेको छ। रक्षा मन्त्री ईश्वर पोखरेल र स्वास्थ्यमन्त्री भानुभक्त ढकालललाई समेत अनियमितताको आरोप लागेको छ। यस विषयलाई प्रमुख प्रतिपक्ष दल नेपाली कांग्रेस मात्रै होइन, सत्तारुढ नेकपाs} नेताहरुले समेत चर्को विरोध छन्।
कारोना नियन्त्रणलाई प्रभावकारी बनाऔं
बैठकमा कोरोना भाइरस रोकथाम र नियन्त्रणका लागि सरकारले प्रभावकारी रुपमा भूमिका खेल्नु पर्ने नेताहरूले धारणा राखेका थिए। बैठकमा बोल्ने सबैजसो नेताहरुले विश्वव्यापी रुपमा कोराना भाइरसको संक्रमण बढ्दै गएकाले सरकारले थप प्रभावकारी काम गर्नुपर्ने सुझाव दिए।
प्रधानमन्त्री केपी शर्मा ओलीले कोरोना नियन्त्रणका सम्बन्धमा सरकारले गरेका प्रयासबारे बैठकमा जानकारी गराएका थिए। यस्तै उच्चस्तरीय समितिका संयोजक ईश्वर पोखरेलले कोरोना भाइरसको संक्रमणको उत्पन्न स्थितिको सामना गर्न चालिएका कदम र गरिएको कामबारे धारणा राखेका थिए।
बैठक बोल्दै बाँकी नेताहरुले पनि कारोना भाइरस नियन्त्रणका सम्बन्धमा सरकारले चालेका काम प्रभावकारी बनाउन सुझाव दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
