काठमाडौं -कोरोना भाइरस पोजेटिभ भेटिएकी बाग्लुङकी युवतीबारे पाँच दिन अघि नै बाग्लुङ अस्पतालमा जानकारी गराइएको पाइएको छ। उनलाई स्थानीय नारायण कँडेलले अस्पताललाई जानकारी गराएका हुन्।
कँडेलसँग नेपाल लाइभले सम्पर्क गरेको थियो। बाँकी कँडेलकै शब्दमा
चैत १० मा फ्रान्सबाट आएकी एक युवतीमा कोरोना भाइरस पोजिटिभ देखियो। उनी फ्रान्सबाट कतार हुँदै चैत ४ गते नेपाल आएकी थिइन्। उनी आएको विमानमा धेरै नेपाली पनि आएको खबर थाहा भयो। उनलाई संक्रमण देखिएपछि उनीसँगै आउनेहरूको बारेमा जान्ने चासो बढ्यो।
चैत ११ मा बाग्लुङ आफन्तलाई फोन गरी चैत ४ गते आउने कोही गाउँमा छन् कि भनी सोधें। दुई जना बेल्जियमबाट आएको सुनाउनु भयो। उनी मेरो छिमेकी नै हुन्। उनीहरूले घर गाउँमा मिठाई बाँडेको, पूजा र गाउँको भिडभाडमा सहभागी भएको समेत सुनाउनुभयो।
चैत ४ मा काठमाडौंमा साढे १० मा अवतरणपछि उनीहरू पौने १२ बजेको यति एयलाइन्सको फ्लाइटमा पोखरा गएका रहेछन्। उनीहरू एउटै देशबाट आएपनि बागलुङमा घर भने टाढा-टाढा पर्छ। युवतीसँग आउने अर्की महिला वृद्ध हुन्। उनको उमेर ७० पुगेको भनिएको छ।
४ गते आएकी उनलाई ज्वरो‚ खोकी देखिन थालेछ। स्थानीय मेडिकलमा गएर औषधि खाइन्। तर,अस्पताल गइनन्। उनको घरमा बुढा हजुरबुबा र हजुरआमा छन्। दुवै दम र सुगरका बिरामी हुन्। उनको बुवा पनि एक महिनादेखि घरमा छन्। उनी समेत बेल्जियम थिए। उनकी आमा बेल्जियममै छिन्।
म चिकित्सा क्षेत्रसँग सम्बन्धित भएकाले पनि उनीहरूप्रति बढी चासो राखें। युवतीको बुबालाई फोन गरें। तपाईंको छोरीसँगै आएकी युवतीलाई कोरोना भाइरस पोजिटिभ देखिएकाले क्वारेन्टाइनमा बस्न भनें। मेरो कुरालाई उनीहरूले सुनेनन्। अटेरी गरे। सामान्य रुघाखोकी लागेको भन्दै मेरो कुरा सुनेनन्।
अस्पताल जान मेरो सुझावलाई अस्वीकार गरेपछि मैले १२ गते धौलागिरी अञ्चल अस्पताल बागलुङका प्रमुखलाई फोन गरें। त्यहाँ चिकित्सकले लगाउने सुरक्षा कवच रहेनछ। नमूना संकलनमा पिपिई नहुँदा धौलागिरी अञ्चल अस्पतालबाट सम्भव भएन। उनीहरूले अटेरी गरेको कुरा मैले बताइदिएँ।उनीहरू युवती भएको स्थानमा गए तर पिपिई नहुँदा स्वाब संकलन हुन सकेन। अस्पताल जान युवतीलाई आग्रह गर्दा टेरिनन्। एम्बुलेन्ससहित गएको टोली फर्कियो। पिपिई बागलुङ अञ्चल अस्पतालमा नभएपछि पोखरालाई गुहारिएछ।
पोखराबाट पिपिई गइसकेपछिमात्रै नमूना लिने कार्य भयो। युवतीको नमूना लिए पनि उनीसँगै आएकी अर्की महिलाको स्वाब हालसम्म लिइएको छैन।
आइसोलेसनमा राख्ने भनेपनि त्यो कति प्रभावकारी थियो, जानकारी हुन सकेन। त्यहाँ मोनिटरिङ गर्ने पनि कोही थिएन।
हाल बुझ्दा, उनको आमालाई २ महिनाअघि नै रुघाखोकी थियो भन्ने बुझिएको छ। उनको आमा काम गर्ने रेस्टुरेन्ट इटालीयन भएको भनिएको छ। तथापि पुष्टि भएको छैन। उनको होटल सञ्चालक एक साताअघिमात्रै इटालीबाट फर्केको भन्ने बुझिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
