काठमाडौं- प्रहरीले नेपाली फिल्मका नायक अनमोल केसीलाई ठगी प्रकरणमा खोजिरहेको छ। एक हप्ता भयो‚ तर उनी प्रहरी कार्यालय गएका छैनन्। केसीविरुद्ध महानगरीय प्रहरी परिसर काठमाडौंमा पाँच लाख ठगीको उजुरी परेको हो।
प्रहरी प्रारम्भमा उनलाई कार्यालयमा बोलाएर छलफल गराउने मुडमा देखिएको छ। उनी नआए उजुरी प्रक्रियाअनुसार अगाडि बढाउने तयारी गरिएको महानगरीय प्रहरी परिसर काठमाडौंका डिएसपी होविन्द्र बाेगटीले जानकारी दिए।
उजुरीकर्ता हुन् जयन श्रेष्ठ र रुपेन्द्र खड्गी। ‘धुपौरे’ फिल्मका निर्माता रहेका उनीहरुले ‘अनमोल केसीले फिल्म खेल्छु भनेर पाँच लाख एड्भान्स लिएको तर फिल्म पनि नखेलेको र सो पैसा पनि नदिएको’ भन्दै परिसरमा उजुरी दिएका हुन्।
दुवै फिल्म निर्माताका अनुसार उनले असोज ३ मा ४० लाख पारिश्रमिकमा फिल्ममा अभिनय गर्ने भन्दै एड्भान्स बापत पाँच लाख रुपैयाँ लिएका थिए।
सहमति गरेर पारिश्रमिकको एड्भान्स समेत लिइसकेपछि निर्माण टिमले अनमोलले धुपौरे फिल्म खेल्ने भनेर घोषणा समेत गरे। फिल्म साम्तेन भुटियाले निर्देशन गरेका थिए। तर एकाएक अनमोलले फिल्म नखेल्ने समाचार बाहिरिएको थियो।
निर्माण टोलीले उजुरीमा गरेको दाबीअनुसार अनमोलले आफूले पाँच लाख लिएको र अन्य प्राविधिकहरुलाई समेत अग्रिम पैसा दिन लगाउँदा ३० लाख बढी खर्च भएको तर पछि फिल्म नखेल्ने भनेकाले क्षतीपूर्तीसमेत माग गरिएको छ।
छलफलका लागि कुर्दै प्रहरी
बिहीबार सार्वजनिक कार्यक्रममा अनमोल
महानगरीय प्रहरी परिसर काठमाडौंका डिएसपी होविन्द्र बोगटीका अनुसार केसीविरुद्ध उजुरी आएको एक हप्ताअघि हो।
फिल्ममा अभिनय गर्छु भनेर पैसा लिएको तर पैसा फिर्ता पनि नगरेको र फिल्म पनि नखेल्दा घाटा लागेको भन्दै उजुरी परेपछि छलफलका लागि केसीलाई जानकारी गराइएको थियो। तर उनी प्रहरी कार्यालय गएका छैनन्।
प्रहरीका अनुसार उनले आफू काठमाडौं बाहिर भएको दाबी गरेर छलफलमा आएका छैनन्। तर उनी काठमाडौंमै छन्। शुक्रबारमात्रै उनी फिल्म ‘ए मेरो हजुर ४’ को शुभमुहुर्तमा सहभागी भएका थिए।
‘फिल्म क्षेत्रको समस्या हेर्ने संघसमेत नभएकाले प्रारम्भमा ती संगठनका प्रतिनिधि समेत राखेर दुवै पक्षलाई छलफल गराउन खोजेका हौं,’ डिएसपी बोगटीले भने‚ ‘छलफलमा नआए कानुनी प्रक्रियाअनुसार निवेदन अगाडि बढाउछौँ।’
नरम देखियो प्रहरी
युट्युवर प्रनेश गौतम,र्यापर भिटेन अनि गायिका आस्था राउतविरुद्ध प्रहरीको व्यवहार कडा थियो। प्रहरी अनमोलको केसमा भने नरम देखियो।
छलफलबाट समाधान निस्कन सक्ने केसमा पनि प्रहरी थुनेर तर्साउन लागेको भन्दै भएको आलोचनाको प्रभाव अनमोलको केसमा देखियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Oytk9IM17G-1753948133.jpg)
-1764146706.png)
