काठमाडौं- संस्कृति पर्यटन तथा नागरिक उड्डयन मन्त्रालयले झण्डै एक वर्षपछि तत्कालीन विभागीय मन्त्री रविन्द्र अधिकारीसहित ७ जनाको ज्यान जाने गरी भएको दुर्घटनाको अन्तिम रिपोर्ट सार्वजनिक गरेको छ। जाँचबुझ आयोगले सबै निकायको राय सल्लाहपछि रिपोर्ट सार्वजनिक गरेको हो।
जाँचबुझ समिति संयोजकमा पूर्वपर्यटन सचिव यज्ञप्रसाद गौतमसहित नेपाल आर्मीका सहायक रथी दिपकप्रसाद बास्तोला, क्याप्टेन प्रमोद लामा सदस्य तथा मन्त्रालयका सहसचिव बुद्धिसागर लामिछाने सदस्यसचिव रहेका थिए। उक्त समितिले मौसम र चालकको आत्मविश्वास बढी हुँदा दुर्घटना भएको निचोडसहितको रिपोर्ट सार्वजनिक गरेको छ।
सो रिपोर्टले चालकको ‘ओभर कन्फिडेन्स’ नै दुर्घटनाको प्रमुख कारणमध्येको एक भएको निचोड निकालेको छ।
गत फागुन १५ गते ताप्लेजुङको पाथिभरामा भएको एयर डाइनेस्टी हेलिकोप्टर दुर्घटनामा तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित ७ जनाले ज्यान गुमाएका थिए।
हेलिकोप्टर दुर्घटनामा मन्त्री अधिकारीसहित एयर डाइनेस्टीका सिइओ तथा पर्यटन व्यवसायी आङछिरिङ शेर्पाको समेत निधन भएको थियो। सोही दुर्घटनामा नेपाल नागरिक उड्डयन प्राधिकरणका उपमहानिर्देशक विरेन्द्रप्रसाद श्रेष्ठ, निर्देशक ध्रुवदास भोछिभया, मन्त्रिपरिषद् कार्यालयका उपसचिव युवराज दाहाल, मन्त्री अधिकारीका अंगरक्षक नेपाली सेनाका जमदार अर्जुन घिमिरे र हेलिकोप्टर चालक प्रभाकर केसीको निधन भएको थियो।
दुर्घटनाको भोलिपल्ट सरकारले पूर्वपर्यटन सचिव यज्ञप्रसाद गौतम सहितको ४ सदस्यीय दुर्घटना जाँचबुझ समिति गठन गरेको थियो। जाँचबुझ समितिमा नेपाल आर्मीका सहायक रथी दिपकप्रसाद बास्तोला, क्याप्टेन प्रमोद लामा सदस्य तथा मन्त्रालयका सहसचिव बुद्धिसागर लामिछाने सदस्यसचिव रहेका थिए।
जाँचबुझ समितिले हेलिकोप्टर दुर्घटना भएको झन्डै ९० दिनपछि अर्थात् असार ११ गते संस्कृति, पर्यटन तथा नागरिक उड्डयन राज्यमन्त्री धनबहादुर बुढासमक्ष प्रारम्भिक प्रतिवेदन पेस गरेको थियो।
समितिले राज्यमन्त्री बुढासमक्ष बुझाएको प्रतिवेदनमा सो हेलिकोप्टर दुर्घटनाको कारण मुख्यगरी मौसम र पाइलटको कमजोरी रहेको तत्कालीन समयमा अनौपचारिक रुपमा मिडियामा जानकारी गराइएको थियो।
राज्यमन्त्री बुढाले बुझेको प्रतिवेदन मन्त्रालयले अन्तर्राष्ट्रिय नागरिक उड्डयन संगठन (आइकाओ) र सम्बन्धित सरोकारवाला निकायको रायपछि प्रतिवेदन बुझाएपछि अन्तिम रिपोर्ट मन्त्रालयले सोमबार सार्वजनिक गरेको हो।
समितिले प्रतिवेदन बुझाएलगत्तै अनौपचारिक रुपमा हेलिकोप्टर दुर्घटनाका प्रमुख कारण भन्दै मौसम, ओभर लोड, पाइलटको कमजोरी र कम्पनीले स्टान्डर्ट अपरेटिङ प्रोसिड्यअरसमेत पालना नभएको जानकारी दिइएको थियो‚ उक्त विषयलाई नै अन्तिम रिपोर्टमा समावेश गरिएको छ।
सोमबार सार्वजनिक भएको प्रतिवेदन यसअघि नै नेपाल लाइभले प्राप्त गरी ‘यस्तो रहेछ पूर्वमन्त्री रविन्द्र अधिकारी चढेको हेलिकोप्टर दुर्घटनाको कारण’ शीर्षकमा घटनाको विस्तृत कारणहरू सम्प्रेषण गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1764146706.png)
-1786513116.png)
