स्पोर्टस लाइभ

कुशलको शतकको सोच : जो कीर्तिमानी अर्धशतकमा रमाएनन्

काठमाडौं- आइसिसी विश्वकप क्रिकेट लिग-टु अन्तर्गत त्रिदेशीय सिरिजमा अमेरिकाविरुद्ध १५ वर्षका कुशल मल्लले अवसर पाए। रोहित कुमार पौडेलको स्थानमा टिममा आएका कुशलले उनैको कीर्तिमान तोड्दै विश्व कीर्तिमानसमेत बनाए।

कुशलले एकदिवसीय अन्तर्राष्ट्रिय क्रिकेटमा अर्धशतक बनाउने सबैभन्दा कान्छो खेलाडीको कीर्तिमान बनाएका हुन्। १५ वर्ष ३ सय ४० दिनको उमेरमा कुशलले आफ्नो डेब्यु खेलमा अर्धशतक बनाए। जुन कीर्तिमान यसअघि नेपालकै रोहित कुमार पौडेलको नाममा थियो।

रोहितले १६ वर्ष १ सय ४६ दिनमा युएईविरुद्ध दोस्रो एकदिवसीय खेलमा अर्धशतक बनाउँदै विश्व कीर्तिमान बनाएका थिए।

अमेरिकाविरुद्ध कुशलले ५१ बलमा ५० रन बनाए। यो क्रममा उनले ४ चौका र ३ छक्का हानेका थिए। कुशलको सम्हालिएको खेल नेपालको ३५ रनको जितको महत्वपूर्ण एक आधार पनि हो। जसले नेपालले घरेलु मैदानमा पहिलो एकदिवसीय खेल जित्यो।

तर कीर्तिमानी अर्धशतक बनाएका कुशलले त्यसको ‘सेलिब्रेसन’ भने गरेनन्। अर्धशतक बनाएर ब्याटसमेत नउठाएका उनी आफू शतकको सोचमा रहेकाले अर्धशतकमा ब्याट नउठाएको बताउँछन्।

‘अर्धशतक हान्दा ब्याट उठाउन मन लागेन किनभने रन राम्रो बनिसकेको थिएन। नराम्रो बल कुरेर खेलिरहेको थिएँ, शतकसम्म पुग्न सक्छु कि भन्ने सोच पनि थियो। १४ ओभर बाँकी नै थियो, तर नराम्रो सटमा आउट भएँ’ खेलपछि कुशलले भने।

३६औँ ओभरको दोस्रो बलमा करिमा गोरेको बलमा कुशल मल्ल सम्हालिन नसक्दा क्याच आउट हुन पुगेका थिए। बिनोद भण्डारीसँग उनले ८४ रनको साझेदारी गरेर खेलिरहँदा शतकको सोचअनुसार उनी अघि बढ्न सकेनन्। तर अर्धशतक र टिमको जित नै कुशलका लागि मात्र होइन नेपाली क्रिकेट समर्थकका लागि नै खुसीको क्षण भयो।

‘नेपाल टिमबाट खेल्ने सपना थियो। सपना नजिक आएपछि गर्न सक्छु भन्ने आत्मविश्वास पनि थियो। गरेँ पनि। टिमको लागि रन बनाउनु पर्छ भन्ने थियो। त्यही सोचेर खेलिरहेको थिएँ’ कुशलले भने।

कुशलको खेलको विपक्षी टिमका कप्तान सौरभ नरेश नेत्रावल्करले पनि तारिफ गरे। ‘कुशल मल्लको खेल राम्रो भयो। उसले नडराई खेल्यो। नेपालले अप्ठ्यारो अवस्थामा राम्रो अप्सन प्रयोग गरेको हो। उसको ब्याटिङ राम्रो छ। अट्याक राम्रो गर्दै खेलेको थियो’ उनले भने।

नेपाली टिमका कप्तान ज्ञानेन्द्र मल्लले पनि कुशलको खेलको खुलेर प्रशंसा गरे। उनी भन्छन्– ‘छिटो विकेट झरेको बेलामा पनि कुशलले सम्हालिएर खेलेको हो। बिनोदसँगको उसको साझेदारी महत्वपूर्ण रह्यो।’