अन्तर्राष्ट्रिय चिया महोत्सव काठमाडौंमा हुँदै

अनुसन्धान

नेपाल लाइभ बुधबार, फागुन ३०, २०७४ १६:३१

काठमाडौं– तेश्रो अन्तर्राष्ट्रिय चिया महोत्सव आयोजना हुने भएको छ। राष्ट्रिय चिया तथा कफी विकास बोर्डले ‘डिस्कभरिङ हिडेन ट्रेजर’ भन्ने नाराका साथ आयोजना गर्ने महोत्सव आगामी चैत २३ देखि २५ सम्म राजधानीको याक एन्ड यती होटेलमा हुनेछ। महोत्सवको प्रधानमन्त्री केपी शर्मा ओलीले उद्घाटन गर्ने कार्यक्रम छ।

महोत्सवबारे जानकारी दिन राजधानीमा आयोजित पत्रकार सम्मेलनमा आयोजक समितिका संयोजक उदय चापागाईंले महोत्सवमा विभिन्न १३ देशका २५ प्रतिनिधि सहभागी हुने जानकारी गराए। उनले नेपाली चियालाई विश्वस्तरीय ब्रान्डका रुपमा स्थापित गर्ने लक्ष्यका साथ महोत्सव आयोजना गर्न लागेको बताए। महोत्सवकै अवसरमा नेपाली चियाको ट्रेडमार्क औपचारिक रुपमा सार्वजनिक गरिने जानकारी समेत दिइयो।

नेपालमा उत्पादित चियाले विश्व बजारमा सकारात्मक छाप छोड्न सफल भएकाले चियामा नेपालको अन्तर्राष्ट्रिय ब्रान्ड स्थापित गर्नेगरी काम सुरु गरिसकेको नेपाल चिया तथा कफी विकास बोर्डका कार्यकारी निर्देशक शेषकान्त गौतमले बताए। उनले भने, ‘उच्च गुणस्तरको चिया उत्पादनका लागि चिया बोट, उर्वर माटो, अनुकूल मौसम, लगायत विभिन्न तत्वले भूमिका खेल्छ र नेपाल यी सबै क्षेत्रबाट चिया खेतीका लागि अनुकूल छ। तर, अहिलेसम्म हामीले उत्पादन गरेका गुणस्तरीय चियाको नेपाली ब्रान्ड स्थापित भएको छैन। हामी एउटै टे«डमार्कभित्र रहेर नेपाली चिया निर्यात गर्ने योजनामा छौं।’

नेपालमा चिया उत्पादनका लागि उर्वर मानिने ठूलो क्षेत्रफल जमिन बाँझै रहेको चापागाईंले जनाए। यद्यपि, हाल मुलुकको २८ हजार हेक्टर क्षेत्रफलमा चिया खेती हुँदै आएको छ। जसमध्ये अधिकांश खेती पूर्वी भेगमा हुने गरेको छ। पछिल्लो समय भने मध्य र पश्चिमी भेगमा पनि चिया खेती बिस्तार हुँदै गएको उनले बताए।

‘नेपालमा बार्षिक करिब २ करोड ४० लाख किलो चिया उत्पादन हुँदै आएको छ, जसमध्ये ५५ लाख किलो चिया अर्थोडक्स छ,’ विकास बोर्डका कार्यकारी निर्देशक गौतमले भने, ‘विशेष स्वादको अर्थोडक्स चिया मुलुकको पहाडी क्षेत्रमा उत्पादन हुन्छ भने सिटिसी चिया मुलुकको तराई भेगमा उत्पादन हुने गरेको छ। अर्थोडक्स चिया ९० प्रतिशत भारत तथा तेस्रो मुलुकमा निर्यात भइरहेको छ।’ उनका अनुसार नेपालले बर्सेनि ३ अर्ब रुपैयाँ बराबरको चिया निर्यात गर्दै आएको छ।

गुणस्तरीय चियाको निर्यात प्रवर्धन गर्न सम्मेलनमा विशेषगरी अन्तर्राष्ट्रिय जगतमा चिया व्यापारमा कहलिएका प्रतिनिधिलाई निम्त्याइएको आयोजक समितिका संयोजक चापागाईंले जानकारी दिए।

दुई दिने औपचारिक सम्मेलनमा नेपाली चिया प्रवर्धनबारे सरकारी तवरबाट भइरहेका काम कारबाही बारे जानकारी दिनुका साथै विदेशी प्रतिनिधिहरुले समेत चिया सम्बन्धी प्रतिवेदनहरु प्रस्तुत गर्नेछन्। चापागाईंका अनुसार विदेशी प्रतिनिधिलाई औपचारिक कार्यक्रम सकिएपछि देशका विभिन्न चिया बगानको स्थलगत भ्रमणसमेत गराइनेछ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

ग्लोबल आइएमई बैंकद्वारा कार्डमा आधारित ग्लोबल पेमेन्ट गेटवे सुचारु

सुनको मूल्य तोलामा ५ हजार ३०० सयले बढ्यो, चाँदीको कति ?

‘इण्डियन आइडल १२’ का विजेता पवनदीप राजन सवारी दुर्घटनामा गम्भीर घाइते