काठमाडौं- दसैंका लागि सार्वजनिक बसको अग्रिम टिकट बुकिङ खोल्ने विषयमा आज भएको छलफल निष्कर्षविहीन बनेको छ। यातायात व्यवस्था विभागले गरेको छलफलमा यातायात व्यवसायी, ट्राफिक प्रहरीलगायत सरोकावालाहरुको सहभागिता रहेको थियो।
सरकारले अग्रिम टिकट बुकिङको विषयमा चासो राखेर गत शुक्रबार प्रधानमन्त्री कार्यालयमा विभागलाई बोलाएर आवश्यक छलफल थाल्न भनेको थियो। त्यसकै आधारमा बुधबार भएको छलफल सकारात्मक भएको विभागका महानिर्देशक गोगनबहादुर हमालले बताए। ‘बुधबार हामीले यातायात व्यवसायी, ट्राफिक, सडक विभाग लगायतलाई बोलाएर छलफल गरेका हौं,’ उनले भने, 'छलफल सकारात्मक भएको छ। अर्को साताका लागि छलफल तय भएकाले त्यतिबेलासम्म मिति तय हुन्छ।’
विगतका वर्षहरुमा दसैं सुरु हुनु १ महिना अघिदेखि अग्रिम टिकट बुकिङ खुल्दै आएको थियो। तर, पछिल्लो दुई वर्षयता विभिन्न कारणले एक साता अघिमात्र बुकिङ खुल्ने गरेको छ। यो वर्ष पनि दसैं सुरु हुनु करिब दुई साता अघिमात्र बुकिङ खुल्ने अवस्था देखिएको छ।
विभागसँग भएको छलफल सकारात्मक भएको नेपाल यातायात व्यवसायी राष्ट्रिय महासंघका महासचिव सरोज सिटौलाले बताए। ‘हामीले सरकारलाई बिग्रिएका सडकहरु समयमै मर्मत गर्न भनेका छौं,’ उनले भने, ‘सरकारले त्यही अनुसार काम गर्यो भने अर्को साता दसैंका लागि अग्रिम टिकट बुकिङ खुल्ने आधार तय हुन्छ।’
यो वर्ष व्यवसायीहरु नयाँ बस थप्नसक्ने अवस्थामा नरहेको समेत सिटौलाले बताए। विविध कारणले व्यवसायीहरुले यो वर्ष नयाँ बस थप्ने अवस्था नरहेको भन्दै उनले भने, ‘भएका बसहरुलाई व्यवस्थापन गर्ने सम्बन्धमा हामी व्यवसायीहरुले पनि एक सातामा सकेको गर्ने कोशिस गर्नेछौं।’
राजधानीमा अध्ययन तथा कामकाजका लागि अस्थाई रुपमा बसोबास गर्दै आएका ७७ वटै जिल्लाका अधिकांश नागरिक दसैं मान्न भने जन्मघर नै जाने गरेका छन्। यो समयमा दैनिक हजारौंको संख्यामा यात्रु काठमाडौं छाडेर विभिन्न जिल्ला जाने भएकाले बसको संख्या धेरै चाहिने हुन्छ। त्यसका लागि सरकारको समन्वयमा यातायात व्यवसायीहरुले आवश्यकताअनुसार विभिन्न रुटमा रहेका बसहरु चाप धेरै हुने रुटमा व्यवस्थापन गर्दै आएका छन्।
यो समयमा व्यवसायीहरुले यात्रुबाट आवश्यकताभन्दा धेरै भाडा असुल गर्ने सम्भावना रहेकाले सरकारले अनुगमन समेत गर्ने गरेको छ। त्यसका लागि विभाग, ट्राफिक प्रहरी र उपभोक्ता आधिकारवादीहरुको समेत सहभागिता रहँदै आएको छ।
व्यवसायीहरुले काठमाडौंका साथै अन्य जिल्लाहरुमा समेत यात्रु सहायता कक्ष खोल्नुपर्ने माग गरेको सिटौलाको भनाइ छ। यो वर्षको अग्रिम टिकट बुकिङ भदौको अन्तिम सातासम्ममा खुल्ने अनुमान विभागले गरेको छ। छलफल सकारात्मक भएकोले अर्को साता टिकट बुकिङको मिति तय हुने महानिर्देशक हमालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_onKknejCDZ-1789020979.webp)
-1786602170.png)
