नेपाल लाइभ आजदेखि तेस्रो वर्षमा प्रवेश गरेको छ।
यस अवसरमा हामी पाठकहरुसँग उत्साह बाँड्न चाहन्छौं। यतिन्जेलसम्म पाठकहरुबाट प्राप्त विश्वास, उत्प्रेरणा र खबरदारी हाम्रा अमूल्य आर्जन हुन्। विश्वसनीय अनलाइन हुनुको परिचय पनि यही हो भन्ने हाम्रो ठम्याइ छ। यसको निरन्तरताको अपेक्षा राख्दछौं।
जुनसुकै माध्यमबाट गरिने पत्रकारिता होस्; त्यो मूलतः भूइँमान्छे र राज्यबीचको सेतु हो। राज्यमाथिको प्रश्नकर्ता हो। प्रतिपक्ष हो। सूचनाको हुलाकी हो। सरकार फेरिए पनि नेपाल लाइभले यो दायित्व भुलेको छैन। विगतमा प्रकाशित हाम्रा सामग्रीहरु प्रमाणका रुपमा सधैं रहनेछन्।
हामीले सधैं भनिरहेका छौं- पत्रकारिता तटस्थ र निष्पक्ष हुँदैन। यस बुझाइलाई हामीले आफ्ना सामग्रीमार्फत प्रतिविम्बित गर्ने प्रयास गरेका छौं। समावेशी लोकतन्त्र, अभिव्यक्ति स्वतन्त्रता, नागरिकका मौलिक हक, मानव अधिकार, सुशासन, सीमान्तकृतका पक्षमा उभ्याउने प्रयत्न गरिरह्यौं। शक्तिको आगोभन्दा सत्य/तथ्यको झिल्कोलाई बढी महत्त्व दियौं। हाम्रा प्राथमिकता र पत्रकारिताको अभ्यासको विषयमा पाठकहरु नै बढी जानकार हुनुहुन्छ। विभिन्न माध्यमबाट प्राप्त उहाँहरुको मूल्यांकनकै कारण हामीले यस्तो दाबी गर्न सकेका हौं।
पत्रकारिता समग्रमा थप चुनौतीपूर्ण भएको हाम्रो विश्लेषण छ। त्यसका केही कारण छन्।
पहिलो त, आफैंभित्रका कमजोरी सुधारका लागि सचेत प्रयत्न गर्न ढिला हुँदै गएको छ। आफ्नो कमजोरी नसुधार्ने तर अरुलाई पाठमात्रै पढाउने शैलीका कारण आज यो क्षेत्र पनि आलोचित हुँदै गएको छ। यो क्षेत्रको दायरा र दायित्व बुझ्न ढिला भइरहेको महसुस हामीलाई भएको छ।
दोस्रो, सत्ताबाट मुख थुन्ने प्रयत्नले पनि पत्रकारितामाथि चुनौती थपिदिएको छ। पछिल्लो समय पत्रकारितालाई आफ्नो नियन्त्रणमा राख्ने आकांक्षा स्वरुप भइरहेका विभिन्न प्रयासलाई सफल हुन नदिई संविधानप्रदत्त प्रेस स्वतन्त्रताको अधिकारलाई जोगाइराख्नु अर्को चुनौती हो।
नेपाल लाइभ आफूलाई कहाँ सुधार गर्नुपर्ने र अरुलाई कहाँ प्रश्न उठाउनुपर्ने हो भन्नेमा सचेत छ। जिम्मेवार र व्यावसायिक पत्रकारिताको सन्दर्भमा हामी अग्रपंक्तिमै छौं।
तेस्रो वर्ष प्रवेश गरेको यो सुखद् समयमा नेपाल लाइभलाई अझै विविधतापूर्ण बनाउने वाचा गर्छौं। विश्वसनीयतालाई केन्द्रमा राखेर नेपाल लाइभलाई अझै पूर्ण र सम्पूर्ण अनलाइन बनाउने हाम्रो प्रयास जारी नै छ। सबै प्रयत्नका केन्द्रमा स्वतन्त्र, जिम्मेवार र जवाफदेही पत्रकारिता नै हाम्रो मूल मन्त्र हुनेछ।
हाम्रै स्वादको सामग्री दिने हाम्रो प्रयत्न आगामी दिनमा पनि जारी नै रहनेछ। हामी 'सबैको नेपाल लाइभ' बन्ने गन्तव्य पछ्याइरहेका छौं।
ताजा, सत्यतथ्य, खोजमूलक र विश्लेषणात्मक समाचार पस्कने उद्देश्यले आएको नेपाल लाइभप्रति प्रश्न र विश्वास गर्नुहुने सबैप्रति आभार। तपाईं सम्पूर्ण पाठक, लेखक, पेसाकर्मी, विज्ञापनदाता, व्यवसायी, चिकित्सक, स्वास्थ्यकर्मी र शुभेच्छुकको साथ र सहयोग आगामी दिनमा पनि उत्तिकै रहनेछ भन्ने विश्वासका साथ धन्यवाद ज्ञापन गर्दछौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
