काठमाडौं- मलेसिया सरकारले १४ वटा देशबाट भेन्डर कम्पनी (संयोजनकर्ता संस्था)मार्फत् विदेशी कामदार लिने योजना अघि सारेको छ। मलेसियाको उक्त योजनासँगै भेन्डर कम्पनीसँग सहकार्य गरी नेपाली कामदार मलेसिया पठाउने व्यवसाय हात पार्न नेपालमा भने चलखेल सुरु भएको छ। यो प्रक्रियाका लागि नेपालका म्यानपावर व्यवसायी, ट्राभल एजेन्सी, मनी ट्रान्सफर सञ्चालकले लबिङ थालेको पाइएको छ।
मलेसिया सरकारले ग्लोबल टेन्डर गरी विदेशी कामदारको स्वास्थ्य परीक्षणलगायत अन्य प्रक्रियाका लागि २२ वटा संस्था छनोट पनि गरिसकेको छ।
ती संस्थाबाट छानिएका फर्मले मात्र मलेसिया जाने विदेशी कामदारको स्वास्थ्य परीक्षणलगायतका अन्य प्रक्रियाका लागि काम गर्न पाउँछन्। मलेसिया सरकारले ‘भेन्डर’मार्फत् दुई महिनापछि विदेशी कामदार लिने बताएको छ।
मलेसिया सरकारले छनोट गरेका संस्थासँग समन्वय गरेर नेपालबाट मलेसिया जाने कामदारको स्वास्थ्य परीक्षणलगायतका अन्य प्रक्रियामा सिन्डिकेट संस्था खोल्नका लागि नेपालका एक दर्जन संस्थाले लबिङ गरिरहेको पाइएको छ। यो प्रक्रियामा अटाउन उनीहरुले विभिन्न क्षेत्रमा लबिङ थालेको मलेसियास्थित नेपाली राजदूतावास स्रोतले जानकारी दिएको छ। 'यही प्रक्रियामा नेपाली कम्पनी छिराउनका लागि गैर-आवासीय नेपाली संघ मलेसियाले माध्यस्थकर्ताका भूमिका खेलिरहेको छ,' दूतावास स्रोतले भन्यो।
यसरी लबिङ गर्नेको अग्रपङ्क्तिमा एसओएस सर्भिस प्रालि, सिटी एक्सप्रेस मनी ट्रान्सर्फरका सञ्चालन हेम गुरुङ, सिओ चन्द टन्डन र म्यानपावर व्यवसायी संघको नेतृत्वमा रहेका व्यक्तिहरुसमेत छन्।
'रोजगार व्यवसायी र एनआरएनका प्रतिनिधिसहित एक दर्जन व्यक्तिहरुले यसका लागि लबिङ गरिरहेका छन्,' दूतावास स्रोतले भन्यो, 'एनआरएनका अध्यक्ष खगेन्द्र न्यौपानेलगायतका पदाधिकारीले मलेसियामै बसेर म्यानपावरको काम गरिरहेको सन्तोस कार्कीलाइ मध्यस्थताको काम गर्न जिम्मा दिएका छन्।'
बायोमेट्रिकका सञ्चालक कैलाश खड्का, ओएसीका गोविन्द थपलिया, म्यानपावर व्यवसायी हरि भट्टराई, उर्जा व्यवसायी पूजा चन्द र अर्का म्यानपावर व्यवसायी रघु पुरी पनि दौडधुपमा रहेको ती कर्मचारीले बताए। उनीहरू राजनीतिक लबिङमा समेत लागेका छन्।
यस्तै, सोसाइटी ट्राभल एजेन्सीका सञ्चालक रवि सिंह पनि मलेसिया जाने कामदारमाथि खडा हुने संस्थामा आबद्ध हुन लागि परेको दूतावासका ती कर्मचारीले बताए।
तर पुरानै प्रक्रियामा संलग्न भएका केही संस्था र व्यक्तिले समेत सहभागी हुन चलखेल गरिरहेको ती कर्मचारीले बताए।
केही संस्थाका विरुद्ध नेपालमा ठगी मुद्दासमेत अदालतमा विचाराधीन रहेको छ। बायोमेट्रिकका कैलाश खड्का र ओएससीका सञ्चालक गोविन्द थपलिया प्रहरीको फरार सूचीमा रहेका व्यक्ति हुन् भने वान स्टप सेन्टरका सञ्चालक राम श्रेष्ठ भने ललितपुर जिल्ला अदालतबाट धरौटीमा गत मंसिर २५ गते रिहा भएका छन्। तर मुद्दा काठमाडौं जिल्ला अदालत र उच्च अदालत पाटनमा उनको मुद्दा विचाराधीन छ।
बायोमेट्रिक, भिएलएन, जीएसजी, वान स्टप सेन्टर, ओएससी र माइग्राम्सले मलेसिया जाने कामदारलाई गैरकानूनी रूपमा ठगी गदै आएको भन्दै गत जेठ २ गते सरकारले खारेज गरेको थियो।
मन्त्रालयले ती संस्था खारेज गरेसँग त्यहाँ जाने कामदारको प्रक्रिया बन्द छ। मन्त्रालय र श्रममन्त्री गोकर्ण विष्टले भने यो प्रक्रियामा कसैको सिन्डिकेट कायम हुन नदिने बताउँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
