काठमाडौं – काठमाडौं महानगरका मेयर बालेन शाह र्याप गायकको रुपमा पनि परिचित छन्।
उनले गाएको ‘गरिबको चमेली बोल्दिने कोही छैन’ गीत युवापुस्तामा निकै चर्चित छन्। ‘मन यो उड्यो’, ‘नेपाल हाँसेको’, ‘स्टे ट्रु’, ‘गोर्खाली तोप’, ‘स्याभेज’, ‘मार्फाको मदिरा’, ‘यथार्थ’, ‘आस्तिक’ पनि उनका चर्चित गीतहरुमा पर्छन्। तर, काठमाडौंको मेयर बनेपछि उनका गीत सार्वजनिक भएका छैनन्।
अब लामो समयपछि बालेनको गीत दर्शकले सुन्न पाउने भएका छन्। आगामी फागुन १४ गते अर्थात् महाशिवरात्रिबाट प्रदर्शनमा आउन लागेको फिल्म ‘लाज शरणम्’मा एक गीत गाउँदै उनले पार्श्व गायनमा डेब्यु गरेका छन्। केही दिनअघि रेकर्ड भइसकेको गीतमा बालेन स्वयंको शब्द तथा संगीत छ। उक्त गीत फिल्म रिलिजअघि नै सार्वजनिक गर्ने तयारीमा निर्माता छन्।
‘लाज शरणम्’का मुख्य कलाकार अर्जुन घिमिरे (पाँडे)सँग बालेनको घनिष्ट सम्बन्ध छ। उनलाई मेयरमा जिताउन अर्जुन अहोरात्र खटिएका पनि थिए। अर्जुनकै आग्रहमा बालेनले फिल्ममा गीत गाएको बताइन्छ। प्राप्त जानकारी अनुसार उनले तयार पारेको गीत फिल्ममा कथावाचनको रुपमा प्रयोग हुनेछ। उनको गीतले फिल्मको हाइप बढाउने निश्चित छ।
‘लाज शरणम्’लाई हास्य सिरियल ‘सक्किगोनि’ समूहले निर्माण गरेको हो। कुमार कट्टेल (जिग्री ब्रो)को निर्देशनमा बनेको फिल्ममा अर्जुनसहित हरिस निरौला, विजय बराल, सागर लम्साल, प्रशान्त ताम्राकार, महेश त्रिपाठी, अर्पण थापा लगायतको अभिनय रहेको छ। फिल्मले वैदेशिक रोजगारीमा जानुपर्ने देशको स्थिति र त्यसले निम्त्याएको कहालीलाग्दो कहरको कथा बोल्ने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
