काठमाडौँ- सहकारी ठगी प्रकरणमा उपप्रधानमन्त्री एवं गृहमन्त्री रवि लामिछानेलाई कारबाही गर्न नेपाली कांग्रेस केन्द्रीय सहकारी विभागले माग गरेको छ। विभागका प्रमुख देवेन्द्रराज कँडेलले बुधबार विज्ञप्तिमा जारी गर्दै गृहमन्त्री लामिछानेलाई कारबाही गर्न सरकारसँग माग गरेका हुन्।
बुटवलको सुप्रिम, पोखराको सूर्यदर्शन, काठमाडौँको स्वर्णलक्ष्मी र चितवनको सहारा सहकारीबाट गोर्खा मिडिया नेटवर्क प्रालिमा ९५ करोड ८१ लाख रुपैयाँ गैरकानुनी रूपमा लगानी भएको भन्दै उक्त प्रालिका तत्कालीन सञ्चालक तथा प्रबन्ध निर्देशक लामिछानेमाथि कारबाही गर्नुपर्ने माग विज्ञप्तिमा गरिएको छ।
‘सर्वसाधारण जनताले विभिन्न सहकारी संस्थामा जम्मा गरेको रकमको ठूलो हिस्सा सहकारी ऐन २०७४ र नियम २०७५ विपरीत गोर्खा मिडिया नेटवर्क प्रालिमा गैरकानुनी रूपमा अपचलन गरेको र सो अपचलनमा तत्कालीन कार्यकारी प्रमुख हालका गृहमन्त्री लामिछानेको संलग्नता देखिएको हुँदा उनीमाथि छानबिन गरी कारबाही हुनुपर्छ,’ विज्ञप्तिमा भनिएको छ।
सहकारी संस्थाबाट सदस्यहरूले मात्रै ऋण लगानी पाउने कानुनी व्यवस्था भएकोले कानुन विपरीत सर्वसाधारणले जम्मा गरेको रकम अपचलन भएकोले उक्त रकम तत्काल फिर्ता गर्न, सहकारीको वचत अपचलन गर्ने सहकारीका सञ्चालक, कार्यकारी प्रमुख साथै गोर्खा मिडिया नेटवर्क प्रालिका सञ्चालक एवं कार्यकारी प्रमुखलाई कानुन बमोजिम तत्काल कारबाही गरी सहकारी ऐनको दफा १२४ बमोजिम दण्ड, जरिवाना, सजाय हुनुपर्ने विज्ञप्तिमा उल्लेख छ।
अनियमितता, ठगी, अपचलन गर्ने जोसुकै व्यक्ति, कम्पनीलाई कानुनी दायरामा ल्याई कडा कारबाही गर्न र सर्वसाधारण जनताको बचत सुरक्षा गर्न सरकारसँग नेपाली कांग्रेस केन्द्रीय सहकारी विभागले माग गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
