महेन्द्रनगर- प्रहरीले कञ्चनपुरबाट लागुऔषधको कारोबार तथा दुर्व्यसनमा संलग्न ७७ जनालाई पक्राउ गरेको छ। खैरो हिरोइन, चरेश लगायतका लागुऔषध सहित कञ्चनपुर प्रहरीले तीन महिनायता उनीहरुलाई पक्राउ गरेको हो। पक्राउ पर्नेमा ८ जना महिला समेत छन्।
पक्राउ परेका सबैलाई कारबाहीको दायरामा ल्याइएको जिल्ला प्रहरी कार्यालय कञ्चनपुरद्वारा मंगलबार आयोजित पत्रकार सम्मेलनमा प्रहरी उपरीक्षक चक्रराज जोशीले जानकारी दिए। प्रहरीले फागुनमा लागुऔषध मुद्दामा ३०, चैतमा २४ र वैशाखमा २३ जनालाई पक्राउ गरेको हो। पक्राउ परेकाहरुबाट प्रहरीले ६ सय ८० ग्राम चरेस र ९३ ग्राम खैरोहिरोइन समेत बरामद गरेको छ।
‘कञ्चनपुर कारागारमा ३५ प्रतिशतभन्दा कैदीबन्दी लागुऔषध मुद्दाका छन्,’ प्रहरी उपरीक्षक जोशीले भने। प्रहरीले विभिन्न मुद्दामा अदालत र प्रशासनबाट कैद/जरिवाना भएर फरार रहेका एक सय १३ अभियुक्तलाई समेत पक्राउ गरी कानुनी दायरामा ल्याएको छ। प्रहरीले फागुनमा ४३, चैतमा २९ र वैशाखमा ४१ फरार अभियुक्तलाई पक्राउ गरेको हो।
यसैगरी कञ्चनपुर प्रहरीले तीन महिनायता नेपाल-भारत सीमानाकाबाट ४९ जनाको उद्धार गरेको छ। हराएका ९७ जनामध्ये ६२ जना फेला परेका प्रहरी उपरीक्षक जोशीले बताए। ‘सामुदायिक प्रहरी साझेदारी कार्यक्रममार्फत बाल विवाह न्यूनीकरण, लागुऔषध दुर्व्यसन, आत्महत्या न्यूनीकरण लगायतका कार्यक्रम जारी छन्,’ उनले भने।
यसैगरी कञ्चनपुर प्रहरीले तीन महिनाको अवधिमा भारतबाट भन्सार छली गरी नेपाल ल्याएको रु एक करोड ५९ लाख मूल्यको सामान बरामद गरी भन्सार कार्यालय गड्डाचौकीको जिम्मा लगाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768964846.png)
-1764146706.png)
