रोजगारीका लागि टर्कीमा पठाइदिने भन्दै ठगी गरेको आरोपमा पक्राउ

सुरक्षा/अपराध

नेपाल लाइभ सोमबार, वैशाख ३१, २०८१ १८:५५

काठमाडौँ- टर्कीस्थित यूएन मिसन कार्यालयमा रोजगारी दिलाउने भन्दै रु चार करोड ठगी गरेको आरोपमा प्रहरीले एक जनालाई पक्राउ गरेको छ। पोखरा महानगरपालिका-५ का ४२ वर्षीय विनोद श्रेष्ठलाई पक्राउ गरी सोमबार प्रहरीले सार्वजनिक गरेको हो।

उपत्यका अपराध अनुसन्धान कार्यालयका प्रमुख एवं प्रहरी वरिष्ठ उपरीक्षक सानुराम भट्टराईले भने, ‘टर्कीको यूएन मिसन कार्यालयमा वर्क परमिटमा कामदार पठाउने, त्यहाँ गएपछि आकर्षक तलब हुने प्रलोभनमा पारी मीनबहादुर कार्की लगायत एक सय २४ जना व्यक्तिबाट रु चार करोड ३४ लाख उठाएपछि फरार रहेको उजुरीका आधारमा पक्राउ गरेका हौँ।’

आरोपित श्रेष्ठले चुच्चेपाटीस्थित जमघट रेस्टुरेन्टमा पीडितहरुसँग भेटेर सुरुमा रु ५० हजार र भारतमा लगेर प्रतिव्यक्ति रु तीन लाख लिएको अनुसन्धानबाट खुलेको उपत्यका अपराध अनुसन्धान कार्यालयका प्रहरी नायब उपरीक्षक गोविन्द पन्थीले बताए।

उनका अनुसार पीडितहरुबाट लिएको रकमले आरोपित श्रेष्ठले चाबहिलमा सालो नाता पर्ने सुजन भुजेलका नाममा तीन करोड ५० लाखमा घर किनेको भेटिएको छ। केन्द्रीय अनुसन्धान ब्यूरोबाट ठगी मुद्दामा अनुसन्धानमा परी श्रेष्ठकी पत्नी सुरुची भुजेल र सालो सुजन भुजेल पुर्पक्षका लागि कारागारमा पठाइसकिएको प्रहरीले जनाएको छ।

श्रेष्ठलाई काठमाडौँ महानगरपालिका-७ चाबहिलबाट पक्राउ गरी थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको प्रहरी वरिष्ठ उपरीक्षक भट्टराईले बताए।

-रासस

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

तीन वटा वैकल्पिक बाटो प्रयोग गरेर खुलाइँदैछ पूर्व–पश्चिम राजमार्ग

नवलपुरको विनयी खोला पुल भासियो, पूर्व-पश्चिम राजमार्ग बन्द

पाँच महिनाको अवधिमा ६ खर्ब बढी रेमिट्यान्स भित्रियो