१७५ जना शिक्षकका लागि मनोविज्ञान र करिअर गाइड तालिम सुरु

समाज

नेपाल लाइभ सोमबार, वैशाख १७, २०८१ १७:३५

काठमाडौं- काठमाडौं महानगरपालिकाले सोमबारदेखि सामुदायिक विद्यालयका १७५ जना शिक्षकका लागि तालिम सुरु गरेको छ। तालिममा स्रोत शिक्षक, शिक्षामा सिप कार्यक्रमका फोकल शिक्षक र प्रारम्भिक बाल विकास कक्षाका शिक्षकलाई सहभागी गराइएको छ।

एउटा समूहमा २५ जनालाई सहभागी गराएर ७ वटा समूहमा तालिम सञ्चालन हुनेछ। ४२ घण्टाको यो तालिममा ३० घण्टा मनोवैज्ञानिक र मनोसामाजिक परामर्शको सिप सिकाइन्छ। बाँकी १२ घण्टा करिअर गाइड (म्यापिङ) को कक्षा चल्नेछ।

पहिलो समूहको तालिम सुरु गर्दै महानगरपालिकाकी उपप्रमुख सुनिता डंगोलले भनिन्, ‘बालबालिकाको सर्वाङ्गीण विकासका लागि शिक्षकहरु वहुआयामिक हुनु पर्छ। शिक्षण विधि कुशल हुनु असल शिक्षकको गुण हो। अब यतिले मात्र पुग्दैन। बालबालिकाले के चाहेका छन्? उनीहरुको क्षमता पहिचान गर्ने र रुचिअनुसारको बाटोमा लाग्ने वातावरण बनाइदिनुपर्छ।’

विद्यार्थीहरुलाई आफ्नो रुचि र आफूभित्रको क्षमता पहिचान गर्न सक्ने बनाएर आफैँले छानेको पेशामा लाग्न सक्ने जनशक्ति उत्पादनमा महानगरले जोड दिएको कार्यक्रममा सहरी योजना आयोगका सदस्य इञ्जिनियर शैलेन्द्र झाले बताए।

शान्ति शिक्षा मन्दिर थहितिमा सुरु भएको तालिममा २७ वटा विद्यालयका शिक्षक सहभागी गराइएको छ। तालिम वैशाख २४ गते समापन हुनेछ। वैशाख २५ गतेदेखि जेठ १ गतेसम्मको तालिम, शिवपुरी माध्यमिक विद्यालय, महाराजगञ्जमा हुनेछ। यस तालिममा पनि २७ वटा विद्यालयको सहभागिता रहनेछ।

जेठ २ गतेदेखिको तालिम पद्मकन्या माध्यमिक विद्यालय, डिल्लीबजारमा हुनेछ। ९ गतेसम्म चल्ने तालिममा ३४ वटा विद्यालयको सहभागिता हुनेछ। जेठ १३ गतेदेखि रत्नराज्य माध्यमिक विद्यालय, बानेश्वरमा तालिम हुनेछ। त्यसमा १५ वटा विद्यालयको सहभागिता हुनेछ। तालिम जेठ २० गते सकिनेछ।

यी तालिम स्थलमध्ये रत्नराज्य माध्यमिक विद्यालयमा एउटा समूह हुनेछ। अन्य सबै विद्यालयमा २/२ वटा समूहमा तालिम चल्नेछन्।

तालिम नेपाल स्किल ल्याब र अन्तरङ्गसँगको सहकार्यमा आयोजना गरिएको हो।

शिक्षामा सिप कार्यक्रमअन्तर्गत सामुदायिक विद्यालयका कक्षा ९ र १० मा १० वटा विधामा छोटो अवधिको सिपमूलक तालिम चलिरहेका छन्। बालबालिकाले आफ्नो रुचि र क्षमताअनुसार विषय वा क्षेत्र छान्न सकुन। यसमा शिक्षकको प्रोत्साहनबाट विद्यार्थीले अरुले दिएको सुझाव वा अरुले छानेको क्षेत्र हेरेर नभइ आफैँले रुचाएको क्षेत्र छान्न सक्ने हुनेछन्।

महानगरपालिकाले पुस्तकविहिन शुक्रबार कार्यक्रमअन्तर्गत प्रारम्भिक बाल विकासदेखि कक्षा ३ सम्म एकीकृत सिकाइ, कक्षा ४ देखि ८ सम्म सिर्जनात्मक सिकाइ सञ्चालन गरेको छ। यसमा हरेक विद्यार्थीले १५ वटा समूहमध्ये मन पर्ने समूह छान्न सक्नेछन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

साउदीमा कामविहीन भएका नेपालीलाई स्वदेश फर्काउने पहल शुरू

आजदेखि सुरु हुँदै ‘सगरमाथा संवाद’, १७५ विदेशी पाहुना काठमाडौंमा

आजको मौसमः देशका पहाडी भू–भागमा आंशिक बदली, वर्षाको सम्भावना