काठमाडौं- कोशी प्रदेशको मन्त्रिपरिषद् बैठक अब महिनामा एकपटक धनकुटामा बस्ने भएको छ।
मंगलबार धनकुटामा बसेको मन्त्रिपरिषद् बैठकले अबदेखि महिनामा एकपटक धनकुटामा बैठक बस्ने निर्णय गरेको प्रदेश सरकारका प्रवक्ता तथा आन्तरिक मामिला तथा कानुन मन्त्री शमशेर राईले नेपाल लाइभलाई बताए।
तत्कालीन मुख्यमन्त्री शेरधन राईका पालामा धनकुटामा स्थापित मुख्यमन्त्री तथा मन्त्रिपरिषद्को सम्पर्क कार्यालयमा मंगलबार दिउँसो मन्त्रिपरिषद् बैठक बसेको थियो। कोशीको मन्त्रिपरिषद् बैठक विराटनगरबाहिर बसेको यो पहिलो पटक हो।
त्यस्तै, बैठकले कोशी प्रदेश मातहतका सम्पूर्ण कार्यालयहरूले मायाको चिनो तथा उपहार दिँदा प्रदेशमै उत्पादन भएका वस्तुहरू मात्रै दिने निर्णय गरिएको प्रवक्ता राईले बताए।
'प्रदेशमै उत्पादन भएको वस्तुहरू मात्रै दिनका लागि सम्पूर्ण मन्त्रालयहरूले आफ्ना मातहतका कार्यालयलाई पत्राचार गर्ने निर्णय गरिएको छ', मन्त्रिपरिषद्को निर्णयबारे जानकारी दिँदै उनले भने, 'अबदेखि स्थानीय उत्पादनलाई नै मायाको चिनोको रुपमा दिइने छ।'
त्यस्तै, त्रिवेणीमा रहेको खुवालुङ क्षेत्रलाई धार्मिक तथा सांस्कृतिक क्षेत्रको रुपमा विकास गर्ने निर्णय पनि मन्त्रिपरिषद् बैठकले गरेको राईले बताए।
यो पनि पढ्नुहोस्-
कोशी प्रदेशको मन्त्रिपरिषद् बैठक किन बस्दैछ धनकुटामा?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
