काठमाडौं- कोशी प्रदेशको मन्त्रिपरिषद् बैठक धनकुटामा बस्दैछ। मंगलबार दिउँसो ३ बजेका लागि बैठक बोलाइएको प्रदेश सरकारका प्रवक्ता तथा आन्तरिक मामिला तथा कानुन मन्त्री शमशेर राईले नेपाल लाइभलाई बताए।
प्रदेशको राजधानी विराटनगर हो र मन्त्रिपरिषद्का यसअघिका बैठक विराटनगरमै बस्ने गरेको थियो। त्यसैले धनकुटामा बस्ने आजको बैठक विराटनगरबाहिर राखिएको पहिलो बैठक हो।
धनकुटामा मुख्यमन्त्री तथा मन्त्रिपरिषद्को सम्पर्क बनाइएको छ। सो कार्यालय तत्कालीन मुख्यमन्त्री शेरधन राईले धनकुटा नगरपालिका-४ देब्रेबाँसस्थित तत्कालीन क्षेत्रीय प्रशासन कार्यालयको भवनलाई सम्पर्क कार्यालयको रुपमा स्थापना र उद्घाटन गरेका थिए। मंगलबार सोही कार्यालयमा बैठक बस्न लागेको हो।
बैठकका लागि मन्त्रीहरू उपस्थित भइसकेको राईले बताए।
उनले धनकुटामा बैठक बस्नुको केही कारण प्रस्तुत गरे। भने, ‘पहिलो त सम्पर्क कार्यालयको सदुपयोग गर्ने कुरा नै हो।’
त्यस्तै, सरकार जनताको पहुँचमा हुनुपर्ने र कोशी सरकार जनताको पहुँचमा छ है भन्नका लागि पनि आजको बैठक धनकुटामा राखिएको उनले बताए। ‘धनकुटामा मन्त्रीहरू आउँदा धनकुटाका मात्रै होइन। वरपरका जिल्लाहरूका साथीभाइहरूसँग पनि भेट हुन्छ’, उनले भने।
उनले धनकुटा भनेको ऐतिहासिक बजार भएको बताए। हिजोका दिनमा यो पूर्वाञ्चलकै सदरमुकाम भएको र त्यसको महत्त्वलाई आत्मसात् गर्दै बैठक राखिएको पनि उनको तर्क छ।
यतिञ्जेल प्रदेश राजनीतिको केन्द्र विराटनगर भइरहेको र प्रदेशको सबै भू-भाग समान महत्त्वको रहेको सन्देश जाओस् भनेर पनि धनकुटामा बैठक राखिएको उनको तर्क छ। ‘प्रदेश भनेको विराटनगर मात्रै होइन। अन्य भूभाग पनि छन्’, उनले भने।
मन्त्रिपरिषद्ले पारित गर्ने निर्णय भने खास विशेष र सन्देशमूलक भने नभएको राईले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
