काठमाडौं- ‘धेरै भो’,‘रुमाल लुकाई लुकाई खेल्दा’,‘हुदैन कसैको मुटु ढुङ्गाको’ लगायतका गीतमार्फत गायनमा स्थापित भएका गायक सञ्जय किशोर श्रेष्ठले झन्डै दुई दशकपछि नयाँ गीत ‘तिमी जस्तै’ सार्वजनिक गरेका छन्। उनले बिहीबार साँझ काठमाडौँ जमलस्थित विश्वज्योति चलचित्र भवनमा पत्रकार सम्मेलनको आयोजना गर्दै गायनमा फर्किएको बताए।
‘पुनः गायनमा सक्रियता बढाउने जमर्को गरेको छु। जेम्स दाइका कारण यो सम्भव भएको हो। आश छ, पहिला झैँ माया पाउने छु’, गायक श्रेष्ठले भने,‘समय अनुसार आफूलाई परिमार्जित गर्ने कोसिस गरेको छु। आगामी दिनमा पनि समय सापेक्ष गीत सार्वजनिक गर्नेछु।’
उनले सार्वजनिक गरेको गीतमा जेम्स प्रधानको शब्द र सङ्गीत रहेको छ भने गीतको भिडियो पनि जेम्सले नै निर्देशन गरेका हुन्। भिडियोमा गायक श्रेष्ठ नै देखिएका छन्। उनी नेपाल आएपछि गायक तथा सङ्गीतकार जेम्स प्रधानसँग भेट भएपछि साङ्गीतिक सहकार्य जुटेको हो।
‘मैले गीतलाई तयार गरेर राखेको थिएँ। एक दिन गायक श्रेष्ठ आएर सुने। यही गीतमार्फत पुनः गायनमा सक्रियता दिन्छु भनेपछि हामीले सहकार्य गरेका हौँ’, सङ्गीतकार प्रधानले भने,‘यो गीतको श्रव्यदृश्य पनि मैले नै तयार गरेको छु। हामीले धेरै सोचेर गीतको मर्मअनुसार दृश्याङ्कन गरेका हौँ।’
कार्यक्रममा उपस्थित गायक शशि गुरुङले आफू झैँ दुई दशकपश्चात् सक्रियता देखाएको भन्दै गायक श्रेष्ठलाई शुभकामना दिए। उनले भने,‘म पनि बाइस वर्षपछि केही दिन अगाडि मात्र नयाँ गीत लिएर आएँ। संजयलाई पनि निरन्तरता दिनुपर्छ भन्न चाहन्छु। उनको गायन शैली र गायनको मिठास गज्जब छ।’
अर्का गायक भीम तुलाधरले गायक श्रेष्ठको आवाज अन्य भन्दा छुटै मिठास भएको बताए। ‘संजयले दुई दशक अगाडि पाएको चर्चा लोभ लाग्दो थियो। विविध कारणले उसले पाउनु पर्ने सफलता पाएन। अमेरिका पुगेर पनि नेपाल फर्किएर सङ्गीतमा भविष्य देख्नु सुखद कुरा हो। उसलाई निरन्तरताको कामना’, गायक तुलाधरले भने।
कार्यक्रममा गायक बबिन प्रधान, कविन्द्र श्रेष्ठ, डिजाइनर अनिल स्थापित, सञ्चारकर्मी तथा गीतकार नरेश भट्टराईले गायक श्रेष्ठको गायन यात्राको बारेमा चर्चा गर्दै शुभकामना दिएका थिए। सार्वजानिक भिडियोमा जेसिका प्रधानको रङ्ग संयोजन र सम्पादन, जेम्स प्रधानको शब्द र सङ्गीत, श्याम तामाङले छायाङ्कन गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
